Read Central Bicolano Sirach 10 Bible Online

Sirach 10 - Central Bicolano bible

Sirach 10

¹Tutukdoan nin sarong madonong na pamayo an saiyang nasasakopan, asin magigin husay an saiyang pagpadalagan kan banwaan.

²An gabos na opisyal saka namamanwaan magigin arog kan namamayo sa sainda.

³An mayong inadalan na hade iyo an maraot kan saiyang banwaan, alagad orog na magkokosog an sarong syudad kun an mga pamayo kaiyan madodonong.

⁴Ibubugtak nin Kagurangnan an kapangyarihan sa tamang tawo sa tamang panahon.

⁵An kauswagan kan tawong iyan nasa kamot nin Kagurangnan. An Kagurangnan an ginigikanan kan onra na itinatao sa arin man na opisyal.

⁶Dai ka maanggot sa kiisay man huli sa lambang sadit na bagay na sala an saiyang pakagibo. Dai ka maggibo nin anoman huli sana ta napasopog ka.

⁷An kapaabaw-abawan saka an inhustisya ikinakaongis nin Kagurangnan asin nin mga tawo.

⁸An inhustisya, kapaabaw-abawan, saka an kayamanan iyo an dahelan kan pagbagsak nin mga nasyon asin an pagtunga nin iba sa lugar ninda.

⁹Alpog saka abo man sana kita; ano an pwede tang ipag-orgulyo? An satong mga hawak dikit-dikit na nalalapa mantang buruhay pa kita.

¹⁰An sarong halawig na paghelang ikinakaribong nin sarong doktor. Maski an sarong hade na buhay ngunyan na aldaw pwedeng magadan sa aga.

¹¹Kun nagagadan an sarong tawo, an nasasadirihan niya iyo an mga ulod saka mga langaw.

¹²Minapoon an kapaabaw-abawan kun tinatalikodan nin sarong tawo an Kagurangnan, na saiyang kaglalang.

¹³An kapaabaw-abawan nakakaagid sa sarong burabod na nagbubulos nin kasalan, asin an siisay man na mag-ontok diyan mapapano nin karatan. Iyan an dahelan kun tadaw ta dinarahan kan Kagurangnan nin makangirhat na padusa an nagkapirang tawo dangan pinuho sinda.

¹⁴An Kagurangnan an nagpabagsak sa mga hade dangan nagbugtak nin mga mapakumbabang mga tawo sa lugar ninda.

¹⁵An Kagurangnan an naggabot sagkod kan mga gamot nin mga nasyon dangan nagmukna nin mga mapakumbabang mga nasyon sa lugar ninda.

¹⁶An Kagurangnan an nagrumpag nin mga imperyo asin nagronot kan saindang mga daga.

¹⁷Siya an nagpuho kan nagkapira sa sainda kaya dai na ngani sinda nagigiromdoman.

¹⁸Mayo sa plano kan Kaglalang na magin mapaabaw-abaw saka madahas an mga tawo.

¹⁹Siisay an maninigong mag-ako nin onra? An mga tawo, huli ta may pagkatakot sinda sa Kagurangnan. Siisay an dai maninigong mag-ako nin onra? An mga tawo, huli ta linalapas ninda an mga pagboot nin Kagurangnan.

²⁰Dapat na galangan kan mga parasunod an namamayo sainda, asin ilinalangkaw nin Kagurangnan an mga tawong may pagkatakot saiya.

²²An mga mayaman, an mga may dangog, asin an mga dukha—gabos nag-oorgulyo sa saindang pagkakaigwa nin pagkatakot sa Kagurangnan.

²³Bakong tama na dai paggalangan an sarong tawong madonong huli sa saiyang kadukhaan, asin bakong tama na galangan an sarong parakasala.

²⁴An mga tawong igwa nin dangog, an mga pamayo, saka an mga hukom gagalangan, alagad mayo sa saindo nin maorog pa sa tawong may pagkatakot sa Kagurangnan.

²⁵An sarong oripon na madonong paglilingkodan nin mga talingkas na namamanwaan, asin kun may pagkasabot sinda, dai ninda iyan ipagkukulog nin boot.

²⁶Kun nagtatrabaho ka, dai mo ipaghambog an saimong kakayahan, asin dai mo pag-omawon an saimong sadiri sa panahon na nangangaipo ka.

²⁷Orog na marahay an magtrabaho asin magkaigwa nin sobra kan saimong kaipuhan ki sa magparahambog alagad nagugutom.

²⁸Aki ko, magmuraway ka sa kapakumbabaan asin itao mo sa saimong sadiri an tamang halaga kan saimong pagkatawo.

²⁹Mayo nin matanos na dahelan para sa sarong tawo na nagkakasala sa saiya man sana. Dai iginagalang an sarong tawo na dai minagalang sa sadiri niya.

³⁰Iginagalang an sarong dukha huli kan saiyang naaaraman, mantang iginagalang an sarong mayaman huli kan saiyang yaman.

³¹Kun iginagalang an sarong dukha, gurano pa daw kun siya magin mayaman! Kun ikinakaongis an sarong tawo mantang mayaman siya, gurano pa daw kun siya magin dukha!