Read Central Bicolano Sirach 11 Bible Online

Sirach 11 - Central Bicolano bible

Sirach 11

¹Kun madonong an sarong dukha, igwa siya nin dahelan na mag-orgulyo, asin ibibilang siyang sarong dakulang tawo.

²Dai nindo pag-omawon an sarong tawo huli kan saiyang magayon na lalawogon, ni kaongisan an sarong tawo huli kan saiyang kakanosan.

³Kun ibabaing sa kadaklan kan mga naglalayog na linalang, an sugod sadit sana, alagad an dugos na ginigibo kaiyan iyo an pinakamahamis sa mga kakanon.

⁴Dai nindo pag-olog-ologon an sarong tawo na nadidipisilan sa pamumuhay asin nagsusulot na nin girising gubing. An Kagurangnan naggigibo nin makangangalas na mga bagay na dai naaaraman nin mga tawo.

⁵Kadakul nang mga hade an nahale sa saindang trono dangan nagtapos kan saindang pagigin hade na nakatukaw sa daga, mantang an saindang mga korona isinulot nin mga tawong dai pa lamang namidbidan kaidto.

⁶Kadakul nang mga pamayo an nawaraan nin onra, asin kadakul nang mga bantog na tawo an nahulog sa kapangyarihan nin iba.

⁷Magsiyasat ka ngona bago ka magtaram na sala an saimong kapwa; isipon mo ngona, dangan ka magsagwe.

⁸Dai ka magtaram mantang igwang nagtataram; dangogon mo ngona an sinasabi niya bago ka magsugpon.

⁹Dai ka makipasuhay dapit sa sarong bagay na mayo ka nin pakilabot, ni magtukaw sa kaibahan nin mga parakasala kun hinuhukoman ninda an sarong kaso.

¹⁰Aki ko, dai ka makilabot sa kadakul na bagay. Kun maghingowa kang makagibo nin dakul, ika man sana an magtitios. Dai mo mahahaman an saimong trabaho, asin dai mo man iyan madudulagan.

¹¹Halimbawa, uya an sarong tawo na dai nag-oontok sa pagtrabaho arog sa sarong oripon, alagad danay siyang nahuhudyan sa saiyang mga gigibohon.

¹²Uya man an sarong tawo na dukhang marahay, maluway magtrabaho asin nangangaipong tabangan; alagad nawiwilihan siya nin Kagurangnan asin iliniligtas siya sa saiyang kasakitan.

¹³Kun marahay na an saiyang kamugtakan, napapangalas an gabos na tawo.

¹⁴An gabos na bagay naghahale sa Kagurangnan: marahay asin maraot, buhay asin kagadanan, kadukhaan asin kayamanan.

¹⁵An kadonongan, an pakasabot, an pakaaram kan Katogonan, an pagkamoot, asin an paggibo nin mga marahay na bagay—an gabos na ini naghahale sa Kagurangnan.

¹⁶An pagkasala asin an kadikloman danay na nasa kaibahan kan mga parakasala poon sa kapinonan, asin an mga naoogma sa karatan magkakaigwa kaiyan sagkod na sinda maggurang.

¹⁷An mga regalo nin Kagurangnan sa mga diosnon gabos mga regalong nagdadanay. Kun mawilihan ka niya, danay kang magigin mauswag.

¹⁸An sarong tawo pwedeng magyaman huli sa maigot na pagtrabaho asin sa pagsayuma sa saiyang sadiri kan mga bagay na nagtataong kaogmahan, alagad ano an makukua niyang pakinabang diyan?

¹⁹Nagsasaboot siya, “Pwede na akong magtukaw-tukaw ngunyan asin mag-ogma huli sa sakong pinagalan.” Alagad dai niya aram kun magigin halawig pa an saiyang buhay asin mawawalat niya sa iba an saiyang kayamanan.

²⁰Pahalagahan nindo an saindong katongdan asin ipaglaban nindo iyan; maggurang kamo sa saindong trabaho.

²¹Dai kamo maara sa mga naginibohan kan mga parakasala, kundi magsarig kamo sa Kagurangnan asin magpadagos sa saindong trabaho; huli ta pasil para sa Kagurangnan na sa madaling panahon magyaman an sarong dukha.

²²Aakoon kan mga diosnon an bendisyon nin Kagurangnan bilang balos sainda, asin pwedeng itao tolos sainda an siring na bendisyon sa madali sanang panahon.

²³Dai kamo mahandal dapit sa saindong kaipuhan, o sa kauswagan na mapapasaindo sa maabot na panahon.

²⁴Siring man, dai kamo mag-isip na yaon na saindo an gabos nindong kaipuhan, o na mayong maraot na maabot sa saindo sa maabot na panahon.

²⁵Sa aldaw nin kauswagan, nalilingawan an kasakitan, asin sa aldaw nin kasakitan dai nagigiromdoman an kauswagan.

²⁶Pasil sana para sa Kagurangnan an maghalat sagkod sa aldaw nin kagadanan nin sarong tawo tanganing baloson o padusahan siya.

²⁷Sa aldaw na iyan mahahayag sa gabos an saiyang mga ginibo; an gabos niyang kaogmahan pwedeng mawara sa oras na iyan nin kasakitan.

²⁸Kaya, dai kamo maghona na maogma an buhay nin siisay man sagkod na matapos iyan, huli ta dai pa nahahayag an gabos na patotoo sagkod na dai pa nagagadan an tawong iyan.

²⁹Magin maingat kamo dapit sa klase nin tawo na aalokon nindo sa saindong harong, huli ta kadakul an paagi na pwedeng madaya kamo kan mga tusong tawo.

³⁰An mapaabaw-abaw na tawo arog sa pangkati na agbaan sa sarong hawla, na nakakadagka nin iba asin arog siya sa sarong espiya na naghahanap kan saimong mga kaluyahan.

³¹Ipapahiling niyang marahay an karatan asin hahanapan niya nin sala an mahahalagang mga gibo.

³²Hale sa sarong sadit na silyab minagikan an dakulang kalayo, asin an sarong parakasala naghahalat sana kan tamang panahon tanganing maggibo nin kadahasan.

³³Mag-ingat kamo sa mga tawong arog kaiyan asin sa saindang mga maraot na plano; sinda an madara saindo sa danay na pagkaraot.

³⁴Kun magpasakat kamo nin tawong bako nindo midbid, madara iyan nin problema na tibaad iyo an masiblag saindo sa saindong sadiring pamilya.