Read Central Bicolano Sirach 13 Bible Online

Sirach 13 - Central Bicolano bible

Sirach 13

¹Kun magdotdot ka nin alkitran, madidigtaan ka kaiyan, asin kun makiiba ka sa mga mapalangkaw na tawo, makakaarog ka man sa sainda.

²Dai ka mag-alsa nin anoman na sobra sa makakaya mo, asin dai ka makiiba sa mga tawong mas mayaman saka mapangyari ki sa saimo. An sarong koron dai mo pwedeng sarayon kaiba kan kaldero; mapapasa an koron kun makatingko iyan sa kaldero.

³Kun an sarong mayaman nagkakasala sa kiisay man, dinadagdagan pa niya iyan nin insulto; alagad kun sarong dukha an inaapi, an dukha pa an napipiritan na maghagad nin tawad.

⁴Gagamiton ka nin sarong tawong mayaman sagkod na kaipuhan ka pa niya, alagad kun kaipuhan mo na siya, babayaan ka niya.

⁵Makikiiba siya saimo sagkod na may sadiri ka pa; pupugaon niya an saimong ikabubuhay dangan babayaan ka na niya.

⁶Kun kaipuhan ka niya, dadayaon ka niya sa paagi nin mga huyom asin maogma saka magayon na mga tataramon. “May kaipuhan ka?” mahapot siya.

⁷Pakakakanon ka niya sagkod na mapasopog ka. Dangan, kun makaduwa o makatolong beses ka na niyang nakuahan kan saimong ikabubuhay, ngingisihan ka niya. Dangan kun magkahilingan kamo, magsasagin-sagin siyang dai ka midbid, asin lilihisan ka niya.

⁸Maglikay ka na dai malagalag tanganing sa saimong kaogmahan dai ka masopgan ngapit.

⁹Kun inalok ka sa harong nin sarong mapangyaring tawo, mag-ingat ka sa saimong gawe-gawe. Dangan orog ka pa niyang aalokon sa saiyang harong.

¹⁰Dai ka magdukot saiya nin marahay, ta tibaad iiswag ka; dai ka man magharayo nin marahay, ta tibaad malingawan ka niya.

¹¹Dai ka magsagin-sagin na kapareho mo siya o na magsarig ka sa gabos niyang sinasabi; babaloon ka niya sa paagi nin halawig na mga tataramon asin mantang nag-oolok siya, sinisiyasat ka niya.

¹²Maringis an sarong tawo na dai nagtatago nin mga sekreto; dai siya magduduwa-duwa na kulogan ka o ipabilanggo.

¹³Hilomon mo sana an sadiri mong sekreto asin magin maingat ka, huli ta danay kang naglalakaw sa dalan nin kapahamakan.

¹⁴Mantang nabubuhay ka, kamotan mo an Kagurangnan asin apodan mo siya nganing iligtas ka.

¹⁵An lambang linalang nawiwili sa kapareho niya, asin siring man an mga tawo.

¹⁶Siring na an parehong klase nin mga hayop nagtitiripon, siring man an mga tawo nakikiiba sa kapareho ninda.

¹⁷An sarong parakasala dai pwedeng makiiba sa tawong diosnon, siring na an lalaw na ayam dai pwedeng makiiba sa kordero.

¹⁸An sarong mayaman dai pwedeng makiiba sa dukha, siring na an sarong lobo dai pwedeng makiiba sa ayam.

¹⁹An mga lalaw na asno sa kalangtadan iyo an pagkakan nin mga leon; siring man, an mga dukha iyo an ginagatasan kan mga mayaman.

²⁰Ikinakauyam kan mga mapalangkaw an mga mapakumbaba, siring na ikinakauyam kan mga mayaman an mga dukha.

²¹Kun nasusubasob an sarong mayaman, binubuhat siya kan saiyang mga katood, alagad kun sarong dukha an natutumba, pinapabayaan siya kan saiyang mga katood.

²²Kun sarong mayaman an nasasala, kadakul na tawo an minatahob kan pagkakasala niya asin mapaliwanag kan mga bagay na dai man ngani niya dapat sabihon. Kun sarong dukha an nasasala, tinutuyaw pa siya. Maski kun an ipinagtataram niya igwa nin kadonongan, mayong nagdadangog saiya.

²³Kun sarong mayaman an nagtataram, an gabos nagkakaalo, dangan inoomaw ninda siya sagkod sa kalangitan. Alagad patarama an sarong dukha, asin masarabi an gabos, “Siisay man iyan?” Dangan kun mapasubasob siya, idudodo pa ninda siya.

²⁴Bakong sala an magin mayaman kun dai mo iyan nakamtan sa maraot na paagi. Bako man kasalan an magin dukha. An bakong diosnon man sana an naghohona nin siring.

²⁵An puso nin sarong tawo iyo an nakakapalaen kan saiyang lalawogon, maogma man o mamondo.

²⁶An tanda nin sarong maogmang puso iyo an sarong magayagayang lalawogon, alagad an pagbilog nin mga kasabihan nangangaipo nin halawig na pag-iisip.