Read Central Bicolano Sirach 14 Bible Online

Sirach 14 - Central Bicolano bible

Sirach 14

¹Paladan an sarong tawo na dai nasasala sa saiyang pagtaram; mayo siyang dapat na ipaghandal.

²Paladan an tawong dai kinokondenar kan sadiring puso, asin dai nawawaraan nin paglaom!

³Dai dapat magyaman an sarong maimot. Ano an halaga kan kwarta sa sarong maimot?

⁴Kun paindahan mo an saimong sadiri tanganing makatipon nin kayamanan, tinitipon mo sana iyan para sa ibang tawo. An ibang tawo an magamit kan saimong kayamanan tanganing mamuhay sa luho.

⁵Paano ka magigin matinao sa ibang tawo kun dai mo natatawan an saimong sadiri, kun habo mo nganing gastohon an saimong kayamanan para sa saimong kaogmahan?

⁶Mayo nang mas maraot pang tawo ki sa tawong maimot sa saiya man sana; iyan sarong kasalan na nagdadara nin sadiring padusa.

⁷Sa panahon na an siring na tawo maggibo nin marahay, iyan dai tinutuyo; an saiyang pagkamaimot mahahayag sa madaling panahon.

⁸An sarong maimot sarong maraot na tawo; tinatalikodan niya an pangangaipo nin iba

⁹asin dai siya nakokontento kan yaon na saiya. An pagkamaimot iyo an minapasadit sa kalag nin sarong tawo.

¹⁰An ibang tawo sobra man an pagkamaimot kaya dai sinda minabugtak maski tinapay sa sadiri nindang lamesa.

¹¹Aki ko, atamana nin marahay an saimong sadiri sosog sa saimong makakaya, asin magdara ka nin maninigong mga dolot sa Kagurangnan.

¹²Giromdoma na dadalawon ka kan kagadanan sa maabot na aldaw, asin dai itinaram saimo kun nuarin an aldaw na iyan.

¹³Bago dumatong an aldaw na iyan, magin maboot ka sa saimong mga katood; magin matinao ka sagkod na kaya mo.

¹⁴Dai mo pagpaindahan an saimong sadiri, maski na kan kaogmahan para sa sarong aldaw. Kun igwa kang boot na gibohon asin bako iyan paglapas sa katogonan, ipadagos mo iyan!

¹⁵Maabot an panahon na babarangaon asin itatao sa iba an gabos mong pinagpagalan.

¹⁶Kaya magin matinao ka; alagad magin andam ka man sa pag-ako kan hale sa ibang tawo. Mag-ogma ka, huli ta dai mo makukua an kaogmahan sa kinaban kan mga gadan.

¹⁷An gabos na nabubuhay nagigin daan arog sa gubing. An suanoy na katogonan nagboboot na kaipuhan magadan kita.

¹⁸An mga tawo nakakaagid sa mga dahon nin marambong na kahoy. An mga nahuhulog na dahon nariribayan nin bago; mantang nagagadan an iba sa sato, namumundag man an iba.

¹⁹Malalapa asin mawawara an gabos na gibo kan kamot nin tawo, kaiba kan kaggibo sainda.

²⁰Paladan an tawong may pagmakulog sa Kadonongan asin naggagamit nin tamang kaisipan.

²¹An siisay man na nag-aadal kan mga paagi nin Kadonongan makakanood man kan saiyang mga sekreto.

²²Hanapa an Kadonongan arog sa sarong paraayam, asin hipaan mo siya sa saiyang pinag-aagihan.

²³Magdungaw ka sa saiyang mga bintana asin magdangog sa saiyang mga pintoan.

²⁴Magkampo ka harani sa saiyang harong,

²⁵asin mapapasaimo an pinakamarahay na lugar na pag-eerokan.

²⁶Duman mo ipatugdok an saimong harong, ligtas sa irarom kan saiyang mga sanga, asin nalilindongan.