Read Central Bicolano Sirach 15 Bible Online

Sirach 15 - Central Bicolano bible

Sirach 15

¹Kun may pagkatakot ka sa Kagurangnan, gigibohon mo ini. Mamumugol ka sa saiyang Katogonan, asin makukua mo an Kadonongan.

²Madatong siya sa pagsabat saimo, arog sa sarong ina o sa hoben na agom na babae.

³Papakakanon ka niya kan tinapay nin pakasabot, asin tatawan ka niya kan tubig nin kadonongan nganing inomon.

⁴Magsarig ka saiya asin dai ka matutumba, dangan dai ka mapapasopog.

⁵Ilalangkaw ka niya orog pa ki sa saimong mga kanatad; kun magtaram ka sa katiriponan, siya an matao saimo kan tamang mga tataramon.

⁶Makakakua ka nin kagayagayahan asin tunay na kaogmahan; gigiromdomon sagkod pa man an saimong ngaran.

⁷Alagad an mga lolong o mga parakasala dai nanggad makakahiling sa Kadonongan.

⁸An Kadonongan mayo nin pakilabot sa mga tawong mapaabaw-abaw; dai nanggad siya minalaog sa isip kan mga putikon.

⁹Bakong tama na an himno nin pag-omaw awiton nin sarong parakasala, huli ta daing katotoohan an saiyang pagsamba.

¹⁰An himno dapat sarong kapahayagan nin kadonongan, na an Kagurangnan mismo an nagpasabong.

¹¹Hare pagbasola an Kagurangnan kun nagkasala ka; dai niya gigibohon an anoman na saiyang naoongisan.

¹²Dai ka magsabing linagalag ka nin Kagurangnan; dai niya kaipuhan an tabang nin mga parakasala tanganing mangyari an saiyang mga katuyohan.

¹³Ikinakaongis nin Kagurangnan an gabos na klase nin karatan asin dai namomotan an mga iyan kan mga may pagkatakot sa Kagurangnan.

¹⁴Kan lalangon nin Kagurangnan an mga tawo sa kapinonan, pinabayaan niya sindang maggibo kan saindang mawoton.

¹⁵Kun boot mo, pwede mong otobon an mga kabotan nin Kagurangnan; pwede kang magin maimbod saiya o dai.

¹⁶Ibinugtak niya sa atubang mo an kalayo asin tubig; unata an saimong kamot asin kuaha an mawoton mo.

¹⁷Igwa ka nin pagpipilian: buhay o kagadanan; mapapasaimo an arin man na pilion mo.

¹⁸Dakula an kadonongan nin Kagurangnan; mapangyari siya asin nahihiling niya an gabos.

¹⁹Aram niya an gabos na ginigibo nin sarong tawo, asin inaataman niya idtong mga may pagkatakot saiya.

²⁰Dai pa nanggad siya nagboot sa kiisay man na magin maraot o nagtugot sa kiisay man na magkasala.