Read Central Bicolano Sirach 16 Bible Online

Sirach 16 - Central Bicolano bible

Sirach 16

¹Dai dapat pagmawoton an sarong dakulang pamilya kun mayong pakinabang an kaakian. An bakong diosnon na mga aking lalaki dai dapat na ipag-orgulyo.

²Dakul man an saimong kaakian, dai mo sinda paghilingon na may pag-orgulyo sagkod na dai sinda natatakot sa Kagurangnan.

³Dai ka maglaom nin marahay sa saindang noodma o maglaom na mabubuhay sinda sa halawig na panahon. An sarong aki na naggigibo kan kabotan nin Kagurangnan orog pa ki sa sangribo na dai nagigibo kaiyan. Mas marahay pang magadan na mayong aki ki sa magkaigwa nin kaakian na bakong diosnon.

⁴Huli sa kadonongan nin sarong tawo, madakul an mga nag-eerok sa sarong syudad, alagad huli sa sarong tribu nin mga maraot na tawo, mawawara an mga nag-eerok diyan.

⁵Nahiling ko na an siring na mga bagay asin orog pa sa mga ini an sakong nadangog.

⁶An kaanggotan nin Kagurangnan malaad laban sa sadit na katiriponan nin mga parakasala o bakong makinuyog na nasyon.

⁷Dai niya pinatawad idtong suanoy na mga higante na nagrebelde saiya, mga higanteng nagsarig sa saindang kosog.

⁸Nauyam siya sa kapalangkawan kan mga tawong kataraed ni Lot, asin dai niya sinda pinaligtas.

⁹Dai niya naherakan idtong nasyon na saiyang pinuho huli kan saindang mga kasalan,

¹⁰ni idtong seis syentos mil na mga tawong nagralakaw sa kalangtadan na nagtiripon sa pagrebelde.

¹¹Maski igwa duman nin saro sanang tawo na matagas an payo, nagin sarong ngangalasan kutana kun dai siya napadusahan. Maheherakon an Kagurangnan, alagad pwede man siyang maanggot. Pwedeng maherak siya nin marahay asin pwedeng maanggot siya nin makuri.

¹²An saiyang pagkaherak dakula, siring na an saiyang padusa dakula. Hinuhukoman niya an mga banwaan sosog sa saindang ginibohan.

¹³Dai makakadulag an parakasalang dara an saiyang hinabonan. Babalosan nin Kagurangnan an pagigin matinios kan mga diosnon.

¹⁴Babalosan nin Kagurangnan an lambang matanos na tawo; aakoon kan lambang saro an maninigo saiya.

¹⁷Dai ka nanggad magsabi, “Tatagoan ko an Kagurangnan. Mayo nin siisay man duman sa itaas na makakagiromdom sako. Sa kadaklan kan mga tawo, dai ako mamimidbidan. Ano an halaga kan sakong kalag sa kadakulaan nin linalang?

¹⁸Pag-abot nin Kagurangnan, tatakigan an gabos: an kinaban asin an katubigan sa irarom kaiyan, an kahiwasan asin an kalangitan sa ibabaw kaiyan.

¹⁹Magkukunogkunog an kabukidan, asin tatakigan an mga pundasyon kan kinaban sa panahon na hilingon niya sinda.

²⁰Dai ako nagigiromdoman nin Kagurangnan. Mayo nin nagpapahalaga sa ginigibo ko.

²¹Kun magkasala ako asin hilom na magin maimbod, mayong makakaaram kaiyan.

²²Kun gigibohon ko an tama, mayo man nin maosip sa Kagurangnan dapit kaiyan. Siisay man an boot na maghalat saiya? Maluway siya sa paggibo kan sinabi niyang gigibohon.”

²³An tawong halipot an isip asin an mangmang sana an mag-iisip nin siring kaini.

²⁴Aki ko, paghinanyog asin pagdangog sako; orog na madadagdagan an saimong naaaraman kun gibohon mo iyan.

²⁵Itatao ko saimo an orog karahay saka tunay na katukdoan.

²⁶Sa kapinonan ginibo nin Kagurangnan an saiyang trabaho nin paglalang, asin tinawan niya nin sadiring lugar an gabos.

²⁷Pinakarahay niya an gabos sa mayong tapos na orden asin nagboot siya na magin arog kaidto sagkod pa man. Mayo nin nagugutom o napapagal o minaontok sa pagtrabaho.

²⁸Dai sinda nagsusurosoan asin dai nanggad sinda minalapas kan saiyang itinaram.

²⁹Kan an gabos na ini magibo nin Kagurangnan, hiniling niya an kinaban dangan pinano iyan nin marahay na mga bagay.

³⁰Pinano niya iyan kan gabos na klase nin linalang na kaipuhan magadan dangan magbalik sa alpog na pinaghalean kaiyan.