Read Central Bicolano Sirach 17 Bible Online

Sirach 17 - Central Bicolano bible

Sirach 17

¹Dangan linalang nin Kagurangnan an mga tawo hale sa alpog asin ibinalik niya giraray sinda sa alpog na saindang pinaghalean.

²Tinawan niya sinda nin halipot na panahon tanganing mabuhay, alagad tinawan niya sinda nin awtoridad sa gabos na bagay sa kinaban.

³Ginibo niya sinda siring sa saiyang ladawan, asin tinawan sinda kan sadiri niyang kosog.

⁴Ginibo niyang katakotan sinda kan iba pang linalang; tinawan niya sinda nin awtoridad sa gabos na hayop saka gamgam.

⁶Itinao niya sainda an saindang mga dila, mga mata, mga talinga, isip, asin konsyensya.

⁷Pinano niya sinda nin pakaaram saka pakasabot asin ipinahiling niya sainda an kalaenan kan marahay sa maraot.

⁸Itinao niya sainda an sadiri niyang pakasabot tanganing mahiling ninda an kamahalan kan saiyang linalang.

¹⁰Oomawon ninda an banal niyang ngaran asin ipapahayag an kadakulaan kan gabos niyang ginibohan.

¹¹Tinawan niya sinda nin pakaaram asin itinao niya an Katogonan bilang sarong burabod nin buhay.

¹²Naggibo siya sa sainda nin mayong tapos na tipan asin ipinahayag niya sainda an saiyang mga kabotan.

¹³Nahiling ninda an mamurawayon niyang kamahalan asin nadangog an kamurawayan kan saiyang tingog.

¹⁴Pinatanidan niya sinda dapit sa pagigin bakong matanos asin tinukdoan an lambang saro kan dapit sa saiyang kapwa.

¹⁵Danay na aram nin Kagurangnan an ginigibo nin mga tawo; an saindang mga gibo dai ninda matatago saiya.

¹⁷Itinao niya sa lambang nasyon an sadiri nindang pamayo, alagad sadiri nin Kagurangnan an Israel.

¹⁹Danay na aram nin Kagurangnan an ginigibo nin mga tawo; an gabos na ginigibo ninda arog kalinaw kan aldaw para saiya.

²⁰Dai natatago sa saiya an saindang mga kasalan; aram niya iyan gabos.

²²Kun minalimos kita sa dukha, pinapahalagahan iyan nin Kagurangnan arog sa sarong mahalagang singsing. An pagkanimaboot nin sarong tawo para sa saiya nakakaarog an halaga sa buhay mismo.

²³Sa maabot na panahon, huhukoman nin Kagurangnan an maraot asin papadusahan niya; aakoon ninda an maninigo sainda.

²⁴Alagad tutugotan nin Kagurangnan na makabalik saiya an mga nagsosolsol. Danay niyang pinapakosog an boot kan mga tawong nawawaraan nin paglaom.

²⁵Dolok kamo sa Kagurangnan, asin bayae nindo an saindong kasalan. Magpamibi kamo nin tudok sa puso na tabangan kamong mamuhay nin mas marahay na pagkabuhay.

²⁶Magbalik kamo sa Kahorohalangkawe asin talikodan nindo an kasalan. Kaongisan nanggad nindo an karatan.

²⁷Pwedeng magpasalamat sa Kagurangnan an mga nabubuhay, alagad makakapag-awit pa daw nin pag-omaw an idtoon na sa kinaban kan mga gadan?

²⁸An sarong tawong buhay saka marahay an hawak pwedeng mag-awit nin mga pag-omaw sa Kagurangnan, alagad an gadan na, an sarong dai na nabubuhay, mayo nin paagi tanganing magpasalamat saiya.

²⁹Gurano kadakula an pagkaherak nin Kagurangnan sa mga tawong minapaampon sa saiya!

³⁰Alagad bako iyan an naturalesa nin mga tawo; mayo nin saro man sa sato an dai magagadan.

³¹Dai nin makakaarog sa liwanag kan aldaw, alagad maski an liwanag na iyan dai nahihiling kun eklipse. Gurano kadali para sa isip nin tawo na matahoban kan karatan!

³²Pwedeng atamanon kan Kagurangnan an gabos na bitoon sa kalangitan, alagad an gabos na tawo alpog asin abo sana.