Read Central Bicolano Sirach 18 Bible Online

Sirach 18 - Central Bicolano bible

Sirach 18

¹An Kagurangnan, na nabubuhay sagkod lamang, an naglalang kan bilog na kinaban,

²asin siya sana an matanos.

⁴Dai niya tinawan an siisay man nin tama sanang kapangyarihan tanganing ipahayag an saiyang ginibohan, asin mayong makakasiyasat kan mapangyari niyang gibo.

⁵Siisay an makakasukol kan mahal niyang kapangyarihan? Siisay an makakaosip kan bilog na kasaysayan kan saiyang gibong pagkaherak?

⁶Dai ta pwedeng dagdagan o inaan an mga iyan. Mayo nin paagi tanganing masabotan ta an makangangalas na bagay na ginibo nin Kagurangnan.

⁷Pag-abot ta sa kataposan kan kasaysayan, dai pa ngani kita nakakapoon; dai ta iyan ikakapaliwanag.

⁸Ano an tawo? Ano an halaga niya? An karahayan na saiyang ginigibo—an karatan na saiyang ginigibo—ano an kahulogan kan gabos na iyan?

⁹Kun mabuhay an sarong tawo sa laog nin sanggatos na taon, halawig nang marahay an saiyang buhay,

¹⁰alagad kun ibabaing sa panahon na mayong kapinonan saka kataposan, an mga taon na iyan arog sana sa sarong tagdo nin tubig sa dagat, arog sa sarong batiris.

¹¹Iyan an dahelan kun tadaw ta tinitios kita nin Kagurangnan, kun tano ta daing sukol an saiyang pagkaherak.

¹²Hinihiling niya kita asin aram niya na magagadan kita; iyan an dahelan kun tadaw ta andam siyang patawadon kita.

¹³Pwedeng maherak an sarong tawo sa midbid niya, alagad naheherakan nin Kagurangnan an gabos na tawo. Sinasagwe niya kita; dinidisiplina asin tinutukdoan niya. Arog sa sarong pastor na nag-aataman nin mga karnero, ibinabalik niya kita sa saiya.

¹⁴Maheherakan niya kita kun aakoon ta an saiyang disiplina asin kun andam kitang ipahiling niya sato kun saen kita nasasala.

¹⁵Aki ko, kun tinatabangan mo an sarong tawo, dai mo siya pagtuyawon. Kun nagtatao ka nin regalo, dai ka magtaram nin anoman na makakakulog.

¹⁶Mas mahalaga an saimong mga tataramon ki sa saimong itinatao. Maski an ambon nagtatao nin kaginhawahan sa panahon nin tig-init.

¹⁷Totoo, an mahuyong mga tataramon orog na makosog ki sa pinakamarahay na regalo, asin kun totoong nagmamakulog ka, itatao mo bako sana an mahuyong mga tataramon kundi an pinakamarahay na regalo.

¹⁸Kamangmangan an magin makuri asin abusado. An mga mata nin siisay man na tinatawan nin regalo dai naoogma sa regalo nin tawong napipiritan sanang magtao.

¹⁹Aramon mo ngona kun ano an saimong itataram bago ka magtaram, asin mangnoha ngona an saimong hawak bago ka maghelang.

²⁰Siyasata an saimong konsyensya bago ka hukoman nin Kagurangnan; dangan pag-abot kan panahon na iyan, papatawadon ka niya.

²¹Bago ka padusahan sa paagi nin helang, magpakumbaba ka. Kun nagkasala ka, magpahiling ka nin pagsolsol.

²²Kun nanuga ka sa Kagurangnan, otobon mo iyan sa lalong madaling panahon. Dai ka maghalat sagkod na madali ka nang magadan bago mo gibohon an dapat na gibohon.

²³Alagad bago ka maggibo nin siring na panuga, magin amdam ka ngona sa pag-otob kaiyan. Hare pagbaloa an pagkamatinios nin Kagurangnan.

²⁴Isipa an saiyang kaanggotan sa aldaw nin saimong pagkagadan. Kun mag-atubang ka na sa saiyang paghukom, boot mong talikodan ka niya?

²⁵Kun yaon na saimo an gabos na mawot mo, isipa kun paano an pagigin gutom, kun paano an pagigin dukha.

²⁶Pwedeng magliwat an gabos sa laog sana nin sarong aldaw; pwedeng maghiro tolos an Kagurangnan.

²⁷Kun madonong ka, magigin maingat ka sa gabos mong gibo. Kun nasa palibot mo an kasalan, orog kang magin maingat nganing dai ka magkasala.

²⁸An lambang tawong may pakasabot nakakaaram kun ano an kadonongan asin gagalangan an siisay man na igwa kaiyan.

²⁹Kun pinapahalagahan mo an kadonongan sa panahon na madangog mo iyan, magigin madonong ka man ngapit, asin an saimong mga tataramon paggigikanan nin kadonongan para sa iba.

³⁰Dai mo pagsunodon an kinabanon mong mga kamawotan, kundi pugolon mo an mga iyan.

³¹Kun tutugotan mo an saimong sadiri na makamtan an lambang kamawotan, iyan an maghahatod saimo na magin ngingisihan kan saimong mga kaiwal.

³²Dai ka mamuhay sa luho; an gasto sa siring na pamumuhay iyo an madara saimo sa kadukhaan.

³³Hare pagigin sarong makilimos huli sa panunubli para sa magastong mga bangkete kun mayo ka kan tamang halaga.