Read Central Bicolano Sirach 19 Bible Online

Sirach 19 - Central Bicolano bible

Sirach 19

¹Kun gibohon mo iyan, dai ka nanggad magigin mayaman; kun dai mo pagpahalagahan an mga sadit na bagay, luway-luway kang mabagsak.

²An arak saka an mga babae iyo an nakakapalagalag sa mga tawong may pakasabot. An sarong lalaki na nagpaparaduman sa mga babaeng maraot, nagigin bakong maingat,

³asin an pagigin bakong maingat iyo an magadan saiya. Kakakanon kan mga ulod an naglalapa niyang hawak.

⁴Mangmang an tawong madaling magtubod sa iba. An tawong nagkakasala, nagkakasala sa saiya man sana.

⁵Kun napapaogma ka kan karatan, kokondenaron ka.

⁶Likayan mo an mga tataramon na mayo nin halaga, asin malilikayan mo an dakul na karatan.

⁷Dai mo ipanabi an nadangog mo, asin dai ka magbabasol.

⁸Dai mo iyan ipag-osip sa saimong mga katood o mga kaiwal pwera sana kun magkakasala ka kun hilomon mo sana iyan.

⁹Tatandaan ka kan siisay man na makadangog kaiyan, asin dai mahahaloy, kaoongisan ka niya huli kaiyan.

¹⁰Nakadangog ka nin osipon? Bayaeng magadan iyan kaiba mo. Magmaisog ka! Dai ka mapapaputok kaiyan.

¹¹An sarong mangmang na naghihingowang hilomon an sarong sekreto nagtitios siring sa sarong nangangaking babae.

¹²Anoman na oras na makadangog siya nin sekreto, iyan nakakaarog sa sarong bosog na tuminadom sa saiyang bitis.

¹³Kun nadangog mong nakagibo nin sala an sarong katood, hapoton mo siya dapit kaiyan. Tibaad bako man totoo. Alagad kun totoo, dai na niya iyan gigibohon giraray.

¹⁴Kun nabaretaan mong an kanatad mo nagtaram kan dai niya dapat itaram, hapoton mo siya dapit kaiyan. Tibaad dai man niya itinaram. Alagad kun itinaram niya, dai na niya iyan gigibohon giraray.

¹⁵Kun igwa kang nadangog na maraot dapit sa sarong katood, hapoton mo siya dapit kaiyan. Tibaad pakaraot sana iyan. Dai mo pagtubodan an gabos na madangog mo.

¹⁶An sarong tawo pwedeng dai man tinutuyong masala sa pagtaram. An gabos nagkasala sa paaging ini.

¹⁷Kun igwa kang nadangog na ikinaanggot mo sa saimong kanatad, hapoton mo siya dapit kaiyan bago mo siya homaan. Idusay mo an bagay na iyan sa Katogonan kan Kahorohalangkawe.

²⁰Matakot ka sa Kagurangnan asin otobon mo an saiyang Katogonan; iyo iyan an bilog na kadonongan.

²²Pwedeng aram mo an gabos na dapat aramon dapit sa karatan, alagad bako iyan makakapadonong saimo. Bakong tama an pagsunod sa hatol nin mga parakasala.

²³Pwedeng gamiton an katusohan nganing mangyari an maraot na katuyohan, alagad nagin arog sa mga lolong an nagkapirang tawo huli sa dai ninda pakaaram kan mas marahay na bagay.

²⁴An sarong diosnon na tawo, maski bakong madonong, mas marahay pa ki sa pinakatusong parakasala.

²⁵Posibleng magin sobra an katusohan dangan magin putikon pa an sarong tawo, o posibleng makua niya an anoman na mawoton niya huli sa ngana-nganang paggalang.

²⁶Dangan igwa nin mga maraot na tawo na namumuhay na garo seryoso asin mamondo, alagad mga tawong naghihingowang dayaon ka.

²⁷Minatalikod sinda na garo dai ka nadangog, alagad kun mayo na nin nakakahiling, dadayaon ka ninda.

²⁸Kun sa anoman na dahelan dai sinda nagkakasala ngunyan, magibo sinda nin karatan sa enot na oportunidad.

²⁹Mamimidbidan mo an sarong tawo huli kan saiyang lalawogon. Sa enot mong pakahiling saiya, maaaraman mo kun igwa siya nin marahay na kaisipan.

³⁰An saiyang paggubing, an saiyang pagngisi, asin an saiyang paglakaw magpapamidbid kan saiyang ugale.