Read Central Bicolano Sirach 2 Bible Online

Sirach 2 - Central Bicolano bible

Sirach 2

¹Aki ko, kun malingkod ka sa Kagurangnan, magin andam ka sa mga pagbalo.

²Magin sinsero asin maigot ka. Dai ka mapurisaw sa panahon nin kasakitan.

³Magdanay ka sa Kagurangnan; dai mo nanggad siya pagtalikodan asin magigin mauswag ka sa kataposan kan saimong buhay.

⁴Akoa an anoman na dumatong saimo, asin magin matinios ka maski sa mga pagbabago na magpapakumbaba saimo.

⁵An bulawan binabalo sa kalayo, asin an ugale nin sarong tawo binabalo sa horno nin kapakumbabaan.

⁶Magsarig ka sa Kagurangnan, asin tatabangan ka niya. Sosoga an saiyang mga dalan, asin bugtakan an saimong paglaom sa saiya.

⁷Kamo gabos na may pagkatakot sa Kagurangnan, maghalat kamo saiya na ipahiling saindo an saiyang pagkaherak. Dai nindo siya pagtalikodan, tibaad bumagsak kamo.

⁸Kamo gabos na may pagkatakot sa Kagurangnan, pagsarig kamo saiya, asin babalosan nanggad kamo.

⁹Kamo gabos na may pagkatakot sa Kagurangnan, maglaom kamo sa saiyang mga biyaya nin pagkaherak asin mayong tapos na kaogmahan.

¹⁰Giromdoma an mga suanoy na henerasyon dangan isip-isipa ini: siisay an tawong nagsarig sa Kagurangnan na pinasopog niya? Igwa na daw nin tawong danay na may pagkatakot saiya na saiyang tinalikodan? Igwa daw nin tawong namibi saiya na dai niya sinimbag?

¹¹Maboot asin maheherakon an Kagurangnan; pinapatawad niya an satong mga kasalan asin iliniligtas niya kita sa panahon nin kasakitan.

¹²Alagad mapapahamak an mga maluya an boot—an gabos na parakasala na naglalakaw sa duwang dalan!

¹³Herak man sa mga nawawaraan nin kosog nin boot; mayo sinda nin pagtubod, kaya dai sinda iingatan.

¹⁴Herak man sa mga nawawaraan nin paglaom. Ano an saindang gigibohon pagdatong nin Kagurangnan tanganing hukoman sinda?

¹⁵An mga may pagkatakot sa Kagurangnan dai naglalapas kan saiyang mga kabotan; an mga namomoot saiya mabubuhay sosog sa pamumuhay na boot niya.

¹⁶An mga tawong may pagkatakot saka namomoot sa Kagurangnan maghihingowang paogmahon siya asin idudusay ninda an saindang sadiri sa pagkuyog kan Katogonan.

¹⁷An mga tawong may pagkatakot sa Kagurangnan danay na andam sa paglingkod saiya. Nagpapakumbaba sinda sa atubang niya, asin nagsasabi,

¹⁸“Ibinubugtak mi an samong palad sa kamot nin Kagurangnan, bakong sa mga kamot nin tawo, huli ta an saiyang pagkaherak arog kadakula kan saiyang kamahalan.”