Read Central Bicolano Sirach 20 Bible Online

Sirach 20 - Central Bicolano bible

Sirach 20

¹Igwa nin pagtuyaw na bakong tama sa panahon; igwa man nin tawong dai nagtataram alagad madonong.

²Alagad mas marahay na tuyawon mo an sarong tawo ki sa tagoon mo sana an saimong kaanggotan.

³Akoon mo kun ika nasasala, asin malilikayan mo an mapasopog.

⁴An pagpasabot nin sarong bagay sa paagi nin kosog nakakaagid sa sarong kapon na lalaki na naghihingowang lupigan an sarong daraga.

⁵Igwa nin mga tawo na pinaghonang madonong huli ta bako sindang matinaram; an iba dai nagugustohan huli ta sobra kun minataram.

⁶Igwa nin mga tawong dai naggigirong huli ta dai ninda aram an itataram; an iba nagkakaalo huli ta aram ninda an tamang panahon kun nuarin mataram.

⁷An sarong madonong na tawo dai minataram sagkod na dai minadatong an tamang panahon, alagad an sarong mahambog na lolong dai nakakaaram kun arin an panahon na iyan.

⁸Mayo nin makakatagal sa sarong tawo na halawig nin marahay kun minataram asin dai minatao sa iba nin panahon tanganing magtaram.

⁹An maraot na swerte pwede man na magin dalan pasiring sa kauswagan, asin an marahay na swerte pwede man na magin pasiring sa pagkawarae.

¹⁰Kun minsan an pagigin matinao nugad dai minabunga nin marahay, alagad sa ibang panahon minabunga iyan nin doble.

¹¹An onra pwedeng ribayan nin pagkapasopog, alagad igwang mga tawo na nakaitaas sa mga lugar nin onra hale sa mapakumbabang kamugtakan.

¹²Kun minsan an sarong tawo naghohona na nakatawad siya, alagad pitong doble palan an ibinayad niya.

¹³Kun minataram an sarong madonong na tawo, nagkakaigwa siya nin mga katood. An sarong mangmang, maski magpauran pa nin pag-omaw sa gabos na tawo, iyan dai makakatabang saiya minsan kadikit.

¹⁴An regalo nin sarong lolong dai mo mapapakinabangan; an halaga kaiyan bakong arog kan nasa isip niya.

¹⁵Dikit siya kun magtao, alagad dakul kun maghanap nin sala, na saiyang ikukurahaw tanganing madangog kan bilog na daga. Kun pinasubli ka niya ngunyan, boot niyang ipuli mo iyan sa aga. (Bakong maoongis ka sa tawong arog kaiyan?)

¹⁶Dangan masabi an lolong na tawo, “Mayong namomoot sako. Mayong nagpapahalaga kan ginigibo ko para sainda. Kinukua ninda an itinatao ko sainda, alagad linilibak ninda ako.”

¹⁷Tama siya—siya an danay na ngingisihan kan gabos.

¹⁸An pagkadalinas kan dila mas maraot ki sa pagkadalinas sa semento; mahihidali an pagbagsak kan tampalasan arog kan pagkadalinas saka pagbagsak nin sarong tawo.

¹⁹An sarong daing galang na tawo nakakaagid sa sarong istorya na inosip sa salang panahon, na danay na nasa ngoso kan mangmang.

²⁰An kasabihan na naghahale sa ngoso nin sarong lolong dai aakoon, huli ta itinataram niya iyan sa bakong tamang panahon.

²¹An sarong tawo pwedeng maolang sa pagkakasala kan saiyang kadukhaan, kaya kun nagpapahingalo siya, dai siya nagbabasol.

²²An buhay nin sarong tawo pwedeng mawara huli sa sopog, o mawara huli kan sa lolong niyang itsura.

²³An sarong tawong nangangako sa sarong katood huli ta dai siya tataong magsayuma, naggigibo nin kaiwal na mayo nin tunay na dahelan.

²⁴An pagputik sarong makanos na digta sa ugale nin sarong tawo, alagad danay ining ginigibo kan mga mangmang.

²⁵An sarong mahabon mas marahay pa ki sa sarong tood nang magputik, alagad kapahamakan an aabotan kan duwa.

²⁶An sarong putikon mayo nin onra. Danay siyang namumuhay sa kasosopgan.

²⁷Magtaram ka nin may kadonongan, asin mangengenot ka sa daga. An sarong may isip na tawo mawiwilihan nin mga darakulang tawo.

²⁸Dai ninda tatawan nin halaga an saimong mga sala, kaya omahon mo an daga asin anihon mo an bunga!

²⁹Mga regalo saka mga suhol an nakakabuta maski kan mga madonong na tawo; nakakaagid iyan sa busal na minaolang kan dapat na gibohon na pagtuyaw.

³⁰An kadonongan na dai ikinakapahayag nakakaagid sa yaman na ilinubong—pareho iyan mayo nin pakinabang.

³¹Alagad mas marahay an sarong tawo na nagtatahob kan saiyang kalolongan ki sa saro na nagtatago kan saiyang kadonongan.