Read Central Bicolano Sirach 21 Bible Online

Sirach 21 - Central Bicolano bible

Sirach 21

¹Aki ko, nagkasala ka? Dai mo na iyan paggibohon giraray, asin mamibi ka nganing patawadon ka kan naginibo mo na.

²Likayan mo an kasalan na garo paglikay sa sarong halas. Kun makaharani ka nin marahay, kakagaton kaiyan an saimong kalag arog kan pagkagat nin sarong leon, asin mapapahamak ka.

³An lambang maraot na gibo arog sa espadang doble an tarom; an lugad na bunga kaiyan dai nanggad mabobolong.

⁴Kun an sarong tawo mayong ugale asin mapalangkaw, pwedeng mawara an gabos niyang pagsadiri.

⁵Kun namimibi an mga dukha, dinadangog sinda nin Dios asin sinisimbag tolos.

⁶An siisay man na habong pagsawayon naglalakaw sa dalan kan parakasala, alagad an igwang pagkatakot sa Kagurangnan, nagsosolsol nin tudok sa puso.

⁷Pwedeng mabantog an sarong tawo bilang marahay na parataram, alagad kun nasasala siya, mamimidbidan iyan kan tawong may isip.

⁸An tawong nanunubli nin kwarta tanganing magpatindog nin harong nakakaagid sa tawong nagtatambak nin mga gapo para sa saiyang lulubngan.

⁹An sarong grupo nin mga tawo na mayong paggalang sa Katogonan nakakaagid sa tambak nin igatong; an kalayo an saindang magigin kataposan.

¹⁰Pantay saka malinig an tinampo na linalakawan kan mga parakasala, alagad an kasagkoran kaiyan iyo an kinaban kan mga gadan.

¹¹An siisay man na nag-ootob kan Katogonan nakakapugol kan saiyang kaisipan, asin an kadonongan iyo an kapanoan kan pagkatakot sa Kagurangnan.

¹²Kaipuhan intelihente ka tanganing makanood nin anoman; alagad igwang inaapod na nagsasagin-sagin sanang intelihente na iyo an nakakapaanggot sa mga tawo.

¹³An pakaaram nin sarong madonong na tawo nakakaarog sa dai nagmamarang salog, asin an saiyang hatol arog sa buhay na burabod.

¹⁴An kaisipan nin sarong lolong nakakaagid sa sarong pasa na tapayan; dai iyan nalalaogan nin pakaaram.

¹⁵Kun an sarong tawo na may pakasabot nakakadangog nin mga tataramon na igwang kadonongan, oomawon niya iyan asin dadarahon siya kaiyan sa ibang mga kaisipan. Alagad kun an nakakadangog kaiyan sarong tawo na kontento na kan saiyang kamangmangan, hahaboan niya iyan, asin lilingawan niya iyan tolos.

¹⁶An pagdangog sa itinataram kan sarong lolong nakakaagid sa pagbyaheng igwang magabat na pasan, alagad sarong kaogmahan an pagdangog sa itinataram kan sarong may pakaaram.

¹⁷An katiriponan andam sa pagdangog sa sarong may pakaaram asin iisipon ninda an saiyang mga itinaram.

¹⁸Sa sarong mangmang, an kadonongan nakakaagid sa sarong gaba nang harong, huli ta maski an mga bagay na saiyang tinutubodan dai pa lamang niya iniisip.

¹⁹Sa sarong tawo na mayo nin isip, an edukasyon nakakaagid sa posas,

²⁰alagad sa sarong may isip, nakakaagid iyan sa bulawan na pulseras. An intelihenteng tawo minahuyom sana mantang an sarong lolong minangirit nin makosog.

²²An sarong mangmang minasirip sa pintoan kan harong nin ibang tawo dangan deretsong minalaog, alagad an sarong tawong magalang saka marahay an ugale minahalat sa luwas kan harong.

²⁴Sarong maraot na ugale an maghinirib sa mga pintoan, asin an tawong desente masosopog sa paggibo kaiyan.

²⁵An ngoso nin mga dayuhan nagtataram kan mga bagay na ini, alagad an madonong mag-iisip kan magigin bunga kan saindang sinasabi.

²⁶An mga lolong basta na sanang minataram; an mga madonong nag-iisip ngona bago minataram.

²⁷Kun minamaldisyon nin sarong maraot na tawo an saiyang kaiwal, minamaldisyon man sana niya an saiyang sadiri.

²⁸An sarong tsismosong tawo iyo man sana an nagraraot kan saiyang kalag, asin an gabos niyang kanatad naoongis saiya.