Read Central Bicolano Sirach 22 Bible Online

Sirach 22 - Central Bicolano bible

Sirach 22

¹An hugakon na mga tawo garo man sana odo; ikinakauyam sinda asin mayo nin tawong boot na magrani sa sainda.

³Sarong kasosopgan an magin ama nin sarong aking mayo nin disiplina, orog na kun an aki sarong babae.

⁴An sarong aking babae na igwa nin isip, makakakua nin agom, alagad an sarong mayong sopog na aking babae nagdadara nin kamondoan sa saiyang ama.

⁵An sarong mayong sopog na babae iyo an maghahale kan onra nin saiyang agom saka ama; dai man siya gagalangan kan duwang ini.

⁶An pagtuyaw sa saindong mga aki minsan nakakaagid sa maogmang tugtog sa lugar nin pagmomondo, alagad an paghampak asin an pagdisiplina mga madonong na gawe sa gabos na panahon.

⁷An pagtukdo sa sarong lolong nakakaagid sa pagbilog giraray kan napasang koron, o sa pagpukaw nin sarong tawo na hararom an pagkakatorog.

⁸An pagpaliwanag sa sarong lolong nakakaarog sa pagpaliwanag sa tawong nagtotongka; pakatapos mo, mahapot siya, “Ano na ngani idto?”

¹¹Pinagmomondoan ta an gadan huli ta mayo na siya nin liwanag. Dapat na pagmondoan ta man an lolong huli ta mayo siya nin pakasabot. An tama pa ngani nyatong gibohon iyo na pagmondoan ta nin orog an lolong, huli ta an buhay kan lolong mas maraot pa ki sa kagadanan.

¹²Sa laog nin sarong semana pinagmomondoan ta an gadan, alagad an sarong lolong o an bakong diosnon na tawo dapat na pagmondoan sa bilog niyang pagkabuhay.

¹³Dai kamo makiolay nin halawig na panahon sa sarong lolong, asin dai nindo pagdalawon an sarong tawo na mayo nin pakasabot. Likayan nindo sinda tanganing makalikay kamo sa kapahamakan asin sa pagkapagal huli sa saindang kalolongan, dangan dai kamo ninda mauulakitan.

¹⁴An mga siring na tawo orog pang magabat na pagdarahon ki sa timga; mayong ibang tataramon na maninigo sainda kundi an tataramon na, “lolong.”

¹⁵Mas madali an pagdara nin baybay, asin, o lansang ki sa pakatagal sa kaibahan nin sarong lolong.

¹⁶An sarong kahabaan na marahay an pakakana sa sarong edipisyo dai matatangkas kan linog; siring man an isip na pinapusog nin marahay na mga hatol dai matatakot sa panahon nin krisis.

¹⁷An isip na napapatugmad sa matanos na kaisipan nakakaagid sa masarig na lanob na igwang magagayon na dekorasyon.

¹⁸An saradit na gapo sa ibabaw kan kudal ipapalid paghuyop kan doros, asin an sarong tawo na pinangagin matatakoton kan saiyang mayong halagang mga kaisipan dai makakatagal sa atubang nin makatakot na mga pangyayari.

¹⁹Minabulos an luha kun napupuling an sarong tawo; kun nakulogan mo nin marahay an sarong tawo, mamimidbidan mo an tunay niyang kamatean.

²⁰Kun gapoon mo an mga gamgam, malayog sinda sa harayo; kun tuyatuyaon mo an sarong katood, matatapos an saindong pagkanimagkatood.

²¹Maski nabingatan mo nin punyal an sarong katood dai ka mawaraan nin paglaom huli ta pwede pang makabalik an saindong pagkanimagkatood.

²²Kun nakulogan mo siya huli sa magagabat na tataramon, dai ka mahandal, huli ta pwede pa kamong magkainulian; alagad an pagtuyatuya saiya, an pagigin mapalangkaw mo, an pagbuyagyag kan saiyang mga sekreto, o an pasaluib na gawe laban saiya—sa siring na mga kaso, madulag an arin man sa saimong katood.

²³Hingowahon mong pagsarigan ka kan saimong kanatad sa saiyang kadukhaan, tanganing maogma ka sa kaibahan niya sa saiyang pagyaman; damayan mo siya sa panahon nin saiyang kasakitan, tanganing magin kahiras ka niya sa panahon nin saiyang kauswagan.

²⁴Enot na minaluwas an parong saka an aso bago an kalayo; enot man na minadatong an mga insulto bago an kadahasan.

²⁵Dai nanggad ako masosopog na surogon an sarong katood, asin dai ko nanggad siya isisikwal sa panahon na kaipuhan niya ako.

²⁶Kun magtios ako huli sa saiya, an gabos na makaaram kaiyan maglilikay saiya.

²⁷Nagmamawot ako na sarong bantay an ibugtak logod sa sakong ngoso, tanganing maselyohan nin marahay an sakong ngabil. Iyan an malikay sako sa paggibo nin sala asin an mapugol sako sa pagraot kan sadiring buhay huli kan sakong dila!