Read Central Bicolano Sirach 24 Bible Online

Sirach 24 - Central Bicolano bible

Sirach 24

¹Paghinanyog kamo sa Kadonongan! Inaawit niya an sadiri niyang kaomawan sa tahaw kan mga Israelita, an sadiri niyang banwaan,

²sa katiriponan kan Kahorohalangkawe, sa atubang kan saiyang kapangyarihan.

³“Ako an tataramon na nagluwas sa ngoso kan Kahorohalangkawe, asin tinahoban ko an daga arog sa pagtahob kan ambon.

⁴An pinakahalangkaw na kalangitan an sakong harong, asin yaon sa sarong hariging panganoron an sakong trono.

⁵Solo-solo ako na naglakaw sa palibot kan kalangitan asin linakaw ko man an katubigan sa irarom kan daga.

⁶Pinamayohan ko an bilog na daga asin an mga alon sa kadagatan, an lambang banwaan asin nasyon.

⁷Sa gabos na ini naghanap ako nin lugar na mapapahingaloan; naghanap ako kun saen na lugar ako pwedeng makakua nin maeerokan.

⁸Dangan an sakong Kaglalang, an naglalang kan kinaban, nagsabi sako kun saen ako maerok. Nagsabi siya, ‘An Israel an gibohon mong harong. An mga kapagarakian ni Jacob iyo an saimong magigin banwaan.’

⁹Linalang niya ako sa daing kataposan, bago magpoon an panahon, asin padagos akong mabubuhay sagkod sa panahon na daing kataposan.

¹⁰Naglingkod ako saiya sa banal na Tabernakulo dangan ginibo kong harong an Bukid nin Sion.

¹¹Pinaerok niya ako sa Namotan na Syudad asin tinawan niya ako nin awtoridad na mamayo sa Jerusalem.

¹²Kaya nagkagamot ako sa ginagalangan na banwaan na pinili nin Kagurangnan bilang sadiri niya.

¹³Naghalangkaw ako arog sa mga sedro nin Lebanon, arog sa mga sipres sa Bukid nin Hermon,

¹⁴arog sa kahoy na palma nin Engedi, arog sa mga tanom na rosas nin Jerico, arog sa magayon na mga kahoy na oliba sa kaomahan, arog sa mga aguho na nagtatalubo harani sa tubig.

¹⁵Siring sa casia an sakong hinangos, siring sa piling mira nagwawarak ako nin mahamot na parong, arog sa estakte, onyka, saka galbano, asin arog sa hamot kan insenso sa laog kan Tabernakulo.

¹⁶Siring sa hamurawon pinapalakop ko an sakong mga sanga, na magayon saka marambong.

¹⁷Arog sa balagon nin ubas minapaluwas ako nin magayon na mga burak; an sakong mga burak nagigin mayaman saka managom na mga bunga.

¹⁹Madya kamo sako, kamo gabos na nagmamawot sako, asin magpakabasog kamo sa sakong mga bunga.

²⁰Magigiromdoman nindo ako na orog na mahamis ki sa dugos, mas marahay ki sa dugos na hale sa mga anira.

²¹Kakana nindo ako, asin madugang pa an saindong kagutoman sa sako; inoma nindo ako, asin madugang pa an saindong pagkapaha sa sako.

²²Kuyoga nindo ako, asin dai nanggad kamo mapapasopog; sunoda nindo an sinasabi ko, asin magigin ligtas kamo sa kasalan.”

²³An Kadonongan iyo an Katogonan, an Katogonan na ipinagboot sato ni Moises na satuyang otobon, an tipan nin Dios na Kahorohalangkawe, an pamana para sa mga katiriponan nin Israel.

²⁵An Katogonan nagsusupay nin Kadonongan arog kan Salog nin Pison, arog kan Salog nin Tigris sa panahon nin pagguno kan enot na bunga.

²⁶An Katogonan nagsusupay nin pakasabot arog sa Salog nin Eufrates, arog sa Salog nin Jordan kun tig-ani.

²⁷Nagkikinang iyan sa mga katukdoan arog sa Salog nin Nilo, arog sa Salog nin Gihon sa panahon kan pagguno nin ubas.

²⁸An kaenot-enoteng tawong linalang dai nanggad nakaaram kan kapanoan nin Kadonongan, asin an pinakahuring tawo sa daga, magigin siring man sa naenot.

²⁹An mga posibilidad kan Kadonongan mas mahiwas ki sa kadagatan; an saiyang pinaghahalean mas hararom ki sa pinakahararom na katubigan sa irarom kan daga.

³⁰Para sa sako, pinaghona kong nakakaagid ako sa sadit na kali na pinag-aagihan nin tubig hale sa sarong salog pasiring sa sarong tatamnan.

³¹Boot ko lang na baribihon an sakong daga na natatanoman nin mga kahoy na nagbubunga saka nin mga tinanom na nagbuburak. Alagad dai nahaloy, an sadit na kali nagin sarong salog, asin an salog nagin sarong dagat.

³²Kaya itinatao ko saindo an sakong naaaraman; iniitaas ko iyan, tanganing mahiling an liwanag kaiyan saen man na lugar, arog sa nagsisirang na aldaw.

³³Arog sa inspiradong propeta, iuula ko an sakong mga katukdoan, tanganing an maabot na mga henerasyon magkinabang kaiyan.

³⁴Tandaan nindo na dai ako nagpagal para sa sako sana, kundi para sa gabos na boot magin madonong.