Read Central Bicolano Sirach 25 Bible Online

Sirach 25 - Central Bicolano bible

Sirach 25

¹Igwa nin tolong bagay na sakong nawiwilihan—mga bagay na magayon para sa Kagurangnan asin sa tawo man: an pagkakaoroyon nin magturugang, an pagkakatood nin magkanaratad, asin an mag-agom na maogma sa saindang pamumuhay.

²Igwang tolong klase nin tawo na sakong nauuyaman, na an gawe dai ko nagugustohan: an dukhang mapalangkaw, an mayaman na nagpuputik, asin an lolong na gurang na lalaki na nakikidorog sa bako niyang agom.

³Kun mayo kang nanodan mantang aki ka pa, dai ka nanggad magigin madonong paggurang mo.

⁴An matanos na hatol, an marahay na hulit, saka an maputing buhok magayon kun nagkakasarabay.

⁵An kadonongan, an pakasabot, saka an matanos na hatol maninigo sa tawong may edad na saka ginagalangan.

⁶An mga gurang nagsusulot kan korona nin dakul na eksperyensya, asin ipinag-oorgulyo ninda an saindang pagkaigwa nin takot sa Kagurangnan.

⁷Sasabihan ko kamo dapit sa sampolong klase nin tawo na nagkapalad akong mamidbidan, orog na an ikasampolo: an tawong naoogma sa saiyang kaakian an tawong bago nagadan nakahiling ngona kan pagbagsak kan saiyang mga kaiwal,

⁸an paladan na tawo na nagkaigwa nin agom na nakakasabot, an mag-agom na magkabagay nanggad, an tawong dai nagkakasala huli sa pagtaram, an tawong dai naglilingkod sa sarong lalaki na menos ki sa saiya,

⁹an tawong mapalad sa pagkakaigwa nin tunay na katood, an tawong ikinakaogmang pagdangogon kan mga tawo,

¹⁰asin an dakula sa gabos: an tawong madonong. Alagad an pinakadakula sa gabos na ini iyo an tawong may pagkatakot sa Kagurangnan.

¹¹An siring na tawo mayo nin kabaing, huli ta an pagkatakot sa Kagurangnan iyo an pinakamahalagang bagay sa kinaban.

¹³Mayo nin lugad na maorog pa sa lugad nin pagkamoot. Mayo nin kasakitan na maorog pa sa kasakitan na mga babae an dahelan.

¹⁴Mayong pagtios na maorog pa sa pagtios na hatod kan mga tawong naoongis saimo. Mayong balos na maorog pa sa balos na gibo nin sarong kaiwal.

¹⁵Mayo nin hudong na nakakagadan na maorog pa sa hudong kan halas, asin mayo nang kaanggotan na maorog pa sa kaanggotan nin sarong babae.

¹⁶Mas boot ko pang mag-erok sa kaibahan nin sarong leon o sarong dragon ki sa sarong maraot na agom.

¹⁷An karatan nin sarong agom na babae an minaliwat kan saiyang lalawogon sagkod na makaarog siya sa sarong anggot na oso.

¹⁸An saiyang agom kaipuhan na magduman saka magkakan sa kaibahan kan mga kanatad, saen ilinuluwas niya an saiyang mga hinanakit.

¹⁹An arin man na kasakitan mayo nin halaga kun ibabaing sa kasakitan na dara nin sarong babae. Mamatean logod kan siring na babae an palad kan mga parakasala!

²⁰An sarong bakong matinaram na lalaki na nag-eerok sa kaibahan kan maribok niyang agom nakakaagid sa sarong gurang na lalaki na nagsasakat sa mabaybay na bulod.

²¹Dai ka magpadagka sa kagayonan nin sarong babae, asin dai ka magmawot nin sarong babae huli ta mayaman siya.

²²Kun an agom na babae an nagbubuhay sa agom niyang lalaki, yaon diyan an kaanggotan, an kapalangkawan, asin an kasosopgan.

²³An maraot na agom na babae iyo an mapamondo, mapadiklom kan lalawogon asin maronot kan puso nin saiyang agom. Pahilingan sako an sarong masosopgon na agom na lalaki, na danay na nagduduwa-duwa, asin papahilingan taka nin agom na babae na dai nakakapaogma sa saiyang agom.

²⁴An kasalan nagpoon sa babae, asin kaipuhan na magadan kita huli sa saiya.

²⁵Hare pagtugot na maotob kan maraot na agom na babae an lambang mawoton niya, siring na dai mo itutugot na magtagdo an tubig hale sa dulay.

²⁶Kun dai siya magsunod sa sinasabi mo, suhayan mo siya.