Read Central Bicolano Sirach 26 Bible Online

Sirach 26 - Central Bicolano bible

Sirach 26

¹Paladan an agom na lalaki na igwa nin marahay na agom; madodoble an bilang kan mga taon nin saiyang buhay.

²An maimbod na agom na babae nakakapaogma sa saiyang agom, asin magkakaigwa nin kapanoan an mga aldaw kaini sa katoninongan.

³An marahay na agom na babae ibibilang sa mahalagang mga bendisyon na itinatao sa mga may pagkatakot sa Kagurangnan.

⁴Mayaman man o dukha, magigin maogma sinda asin magayagaya an lalawogon.

⁵Igwa nin tolong bagay akong natatakotan, asin saro pa na orog kong natatakotan: mga pakaraot na pinapalakop sa banwa, pagtiripon nin mga lalaking mayong marahay na katuyohan, salang sumbong—an mga ini orog pa ki sa kagadanan.

⁶Alagad an babaeng nagseselos sa kapwa niya babae iyo an dahelan nin kamondoan nin puso; an sobrang pagtaram niya iyo an nagpapahayag kaiyan sa gabos.

⁷An maraot na agom na babae nakakaagid sa sakal na dai nakakahusto. An pagpupugol sa saiya nakakaagid sa pagkapot sa sarong uyang.

⁸An sarong burat na babae sarong hilingon na nakakapaanggot; dai niya kayang tahoban an makasosopog niyang gawe.

⁹Mamimidbidan mo an sarong babae na bakong maimbod sa agom huli sa nagmamawot asin nandadagka niyang mga mata.

¹⁰Bantayan mo nin marahay an sarong aking babae na matagas an payo, ta tibaad kun makakua siya nin oportunidad, gamiton niya iyan sa ikakapahamak man sana niya.

¹¹Kun sobra an tagas kan saiyang boot, magin maingat ka, asin dai ka na manibago kun magkasala siya saimo.

¹²Bubukahon niya an saiyang mga tabay saen man na lugar para sa kiisay man na lalaki, siring na an sarong napapahang parabyahe mainom kan anoman na tubig na manumpongan niya.

¹³An maboot na agom na babae iyo an kaogmahan nin saiyang agom; an saiyang mga kakayahan iyo an nagpapakosog kan saiyang agom.

¹⁴An sarong bakong matinaram na agom na babae sarong regalo nin Kagurangnan. An siring na pagdisiplina nin kalag orog pang mahalaga ki sa anoman na yaman.

¹⁵An sarong simpleng agom na babae igwa nin mayong kataposan na kagayonan; iyan sarong kalidad na dai pwedeng sukolon.

¹⁶An gayon nin sarong marahay na agom na babae sa saiyang husay na harong nakakaagid sa aldaw na nagliliwanag kun odto sa kalangitan nin Kagurangnan.

¹⁷An magayon niyang lalawogon saka hawak nakakaagid sa nagliliwanag na ilaw sa banal na kandelero sa Templo,

¹⁸asin arog sa bulawan na lawas kaiyan na napapatugmad sa platang patungtongan an saiyang mga tabay saka makosog na mga bitis.

²⁸Igwang duwang bagay na nakakapamondo sako, asin an ika-tolo nakakapaanggot sako: sarong soldados na nagin dukha, madodonong na mga tawo na dai ginalangan, asin sarong matanos na tawo na nagin maraot. Papadusahan nin Kagurangnan an siring na tawo nin kagadanan!

²⁹Masakit nin marahay para sa sarong negosyante na makalikay sa paggibo nin karatan; an gabos na nagtitinda nagkasala.