Read Central Bicolano Sirach 27 Bible Online

Sirach 27 - Central Bicolano bible

Sirach 27

¹Nagkasala an dakul na tawo sa paghanap nin ganansya; kun boot mong yumaman, ipirong mo an saimong mga mata.

²Masakit an paghale sa sarong taldok na nakatusok sa pagultanan nin duwang gapo, siring na masakit man an paghale kan kadayaan sa pagbakal saka pagpabakal.

³Kun ika bakong dayupot asin pusog sa pagkatakot sa Kagurangnan, marurumpagan ka kan sadiri mong harong.

⁴An itinataram nin sarong tawo nagpapahayag kan saiyang mga sala; nakakaarog iyan sa sarong saraan na minasara kan ati.

⁵An pag-isip nin sarong tawo nagpapahiling kan saiyang ugale siring na an horno nagpapahiling kan anoman na barana sa koron na ilinalaog diyan.

⁶Mamimidbid mo kun paano inataman an sarong kahoy huli sa mga bunga kaiyan, asin maaaraman mo an namamatean nin sarong tawo huli sa saiyang itinataram.

⁷Dai mo pag-omawon an siisay man bago mo siya madangog na magtaram; iyan an tunay na pagbalo.

⁸Kun maghingowa kang magin onesto, magigin onesto ka, asin mapapakarahay kaiyan an saimong ugale siring na napapagayon kan gubing an saimong tindog.

⁹An mga gamgam nakikitipon sa pareho nindang klase, asin an gawe nin pagigin onesto nakakamtan kan mga tawong naghihingowang magin onesto.

¹⁰An kasalan naghahalat sa mga tawong naggigibo nin karatan, siring na an leon naghahalat sa magigin biktima kaini.

¹¹An tataramon nin sarong diosnon na tawo danay na igwang kadonongan, alagad an sarong lolong nagliliwat arog sa bulan.

¹²Kun makua mo an saimong sadiri sa kaibahan nin mga mangmang, maghanap ka nin dahelan tanganing makahale, alagad kun sa mga tawong madonong, mag-ontok ka sa kaibahan ninda.

¹³An tataramon kan mga lolong nakakakulog, asin an pinakamaraot na kasalan sainda pang pinagngingisihan.

¹⁴An mga tataramon nin mga tawong tood sa pagmuda makakapatindog kan saimong barahibo, asin kun sinda magdiskutiran, mayo kang magiginibo kundi takopan an saimong mga talinga.

¹⁵Makulog pagdangogon an pagmumudahan ninda, asin an siring na mga pag-iiwal nagdadara nin kadahasan.

¹⁶An tawong nag-oosip kan sekreto nin iba nagraraot kan pagsarig saiya kan mga ini, asin dai siya nanggad makakakua nin tunay na katood.

¹⁷Kamotan mo an saimong katood asin magsarig ka sa saiya; alagad kun ipangosip mo an saiyang sekreto, mas marahay pang lingawan mong may katood ka.

¹⁸Huli ta ginadan mo an saindong pagigin magkatood, na garo baga paggadan sa sarong kaiwal.

¹⁹Mayo na an saimong katood. Dai mo na siya mapapabalik siring na dai mo na man mapapabalik an sarong gamgam na saimong binutasan.

²⁰Dai mo na siya paghanapon. Harayo na siya nin marahay sa pagdulag saimo, arog siya sa sarong usa na nakaligtas sa litag.

²¹An lugad pwedeng bolongon asin an insulto pwedeng patawadon, alagad an pagbuyagyag kan mga sekreto nin ibang tawo mayo nin bolong.

²²An tawong pakorokimlat kan saiyang mata igwa nin planong maraot, asin mayo nin siisay man na makakapaontok saiya sa paggibo kan pinaplano niya.

²³Mahamis na tataramon an itinataram niya sa atubang mo asin oomawon ka niya sa lambang sabihon mo. Alagad kun talikod ka, an saimong itinaram gagamiton niya laban saimo.

²⁴Dakul an sakong naoongisan, alagad mayo nin makakaorog sa pagkaongis ko sa siring na tawo—asin naoongisan man siya nin Kagurangnan.

²⁵Magpatoron ka nin gapo asin mahugpa iyan sa saimong payo; manigbas ka asin sagkod ika malulugadan.

²⁶Maggibo ka nin kalot asin ika an mahuhulog; magbugtak ka nin siod, asin ika an madadakop.

²⁷An maraot na gibo minabalik sa sarong tawo, asin dai kaini naaaraman kun saen iyan naghale.

²⁸An pag-olog-olog saka an pang-abuso minagikan sa mapalangkaw na tawo, alagad an parabalos naghihipa saiya arog sa sarong leon.

²⁹An mga tawong naoogma sa pagbagsak kan tawong diosnon madadakop sa sarong litag asin mapapano nin kasakitan bago magadan.

³⁰An kaanggotan saka an init nin payo mga makatakot na bagay, asin an mga parakasala igwa kan duwang iyan.