Read Central Bicolano Sirach 29 Bible Online

Sirach 29 - Central Bicolano bible

Sirach 29

¹Magin maboot ka sa saimong kanatad asin pasublion mo siya kun kaipuhan niya an saimong tabang. Sa pagtabang mo saiya, nag-ootob ka kan pagboot nin Kagurangnan.

²Kun kaipuhan niya an anoman, ipasubli mo iyan saiya. Kun magkautang ka, bayadan mo tolos iyan kun igwa ka na.

³Kun nababayadan mo an saimong mga utang, danay kang makakasubli sa panahon nin pangangaipo.

⁴An utang ibinibilang nin dakul na tawo na garo sarong bagay na napurot sana asin pwedeng sarayon, kaya napapasopog an tawong nagtabang sainda.

⁵May mga tawong nagigin magalang, minaduko kan saindang payo, minahapros kan saimong likod sagkod na makua an inuutang, alagad kun panahon na kan pagbayad, pinapaagahan pa ninda iyan, minasabing dai sinda nalugaran, asin minagibo nin dakul na dahelan na gabos mayong halaga.

⁶Kun piriton kan nagpautang na bayadan siya kan nagkautang, maswerte siya kun matawan siya kan kabanga kaiyan. Kun dai niya piriton, hahabonan siya kan nagkautang asin nagkaigwa pa siya nin kaiwal. An makukua kan nagpautang iyo an mga muda, insulto, saka an dai saiya paggalang, alagad bako nanggad an pasasalamat.

⁷Dakul na tawo an habong magpasubli, bakong huli ta kuripot sinda, kundi huli ta habo nindang madaya kun malilikayan ninda.

⁸Minsan siring, saboton nindo an mga dukha. Dai nindo sinda pagparapahalaton bago kamo magtao.

⁹Pinagbotan kita nin Kagurangnan na tabangan an mga dukha; tabangan nindo sinda kun sinda nangangaipo.

¹⁰Mas marahay pa na mawara an saimong kwarta huli sa pagtabang nin sarong tugang o katood, ki sa mawara iyan huli sa pagtago kaiyan sa irarom nin sarong gapo.

¹¹Gamita nindo an saindong kayamanan sosog sa pagboot kan Kahorohalangkawe; dakul na karahayan an mapapasaindo sa paaging ini ki sa pagsaray kan saindong kwarta para sa saindo sana.

¹²Kaibang ibilang nindo sa saindong yaman an katotoohan na nagtao kamo sa mga dukha. Iyan an maligtas saindo sa gabos na kasakitan

¹³asin magigin mas marahay na depensa laban sa saindong mga kaiwal ki sa pinakamakosog na kalasag o pinakamagabat na garod.

¹⁴An sarong marahay na tawo magarantiya kan utang nin saiyang kanatad; an tawo sanang mayo nin sopog an masayumang gumibo kaiyan.

¹⁵Kun igwang tawo na naggagarantiya para sa saimo, dai mo siya paglingawan; ibinugtak niya sa pag-alaman an saiyang marahay na ngaran para sa saimo.

¹⁶Igwang mga parakasala na mayo nin utang na boot, na minalingaw kan mga tawong naggarantiya para sa sainda asin sinda an nagigin dahelan kan pagkawara kan rogaring kan naggarantiya sainda.

¹⁷An paggagarantiya nin utang iyo an nagin dahelan kan pagbagsak nin dakul na mayaman na tawo asin nagdara sainda nin dakul na kasakitan.

¹⁸Huli man kaiyan, nagkawararaan nin harong an mga ginagalangan na tawo asin napiritan na maglagalag sa ibang nasyon.

¹⁹An parakasala na naglalaom na makakakua nin ganansya huli sa paggagarantiya nin utang madadamay sa mga kaso.

²⁰Kaya tabangan nindo an saindong kanatad sagkod kaya pa nindo, alagad mag-ingat kamo sa mga pag-alaman na dara kaiyan.

²¹An mga kaipuhan tanganing mabuhay an sarong tawo iyo an tubig, pagkakan, gubing, asin sarong harong na nakakalipod saiya sa mata kan ibang tawo.

²²Mas marahay an buhay nin sarong dukha na nag-eerok sa sadiri niyang harong ki sa mag-ogma sa mga bangkete sa harong nin ibang tawo.

²³Ipag-ogma nindo an dikit na yaon saindo, asin dai nindo pagpahalagahan an mga insulto nin siisay man dapit sa saindong harong saka pamilya.

²⁴Makaheherak an tawong mayo nin sadiring harong. Kadaklan na panahon dai siya nakakapagtaram huli ta nakikisakat sana siya.

²⁵Kamo an maatubang sa mga bisita saka matao nin inomon, alagad mayo nin mapasalamat saindo. Laen pa kaiyan, makakadangog pa kamo nin mga tataramon na arog kaini:

²⁶“Dayuhan, madya asin andama na an lamesa! Anoman an pagkakan mo diyan daraha na sako!

²⁷Maghale ka na, dayuhan! Igwa akong mahalagang bisita! Madalaw an sakong tugang, kaya kaipuhan ko an kwartong ginagamit mo!”

²⁸Dipisil na matios nin sarong sensitibong tawo an paglibak nin sarong kagharong o an pagmuda nin sarong pinagkautangan.