Read Central Bicolano Sirach 3 Bible Online

Sirach 3 - Central Bicolano bible

Sirach 3

¹Mga kaakian, pagdangog kamo sa sako, na saindong ama. Sunoda nindo an sinasabi ko saindo asin magigin ligtas kamo,

²huli ta an mga ama tinawan nin awtoridad kan Kagurangnan, asin an mga ina tinawan nin deretso sa saindang kaakian.

³An siisay man na minagalang sa saiyang ama nagsosolsol na kan saiyang kasalan,

⁴asin an siisay man na nagpapamuraway kan saiyang ina nakakaarog sa sarong tawo na nagtitipon nin kayamanan.

⁵An siisay man na minagalang sa saiyang ama papaogmahon kan sadiri niyang kaakian; sisimbagon nin Kagurangnan an saiyang mga pamibi.

⁶An siisay man na magkuyog sa Kagurangnan huli sa paggalang sa saiyang ama asin sa pagpaogma sa saiyang ina, magkakaigwa nin halawig na buhay.

⁷Kuyoga nindo an saindong mga magurang na garo kamo mga oripon ninda.

⁸Galangan nindo an saindong ama sa gabos nindong ginigibo asin sinasabi, tanganing mag-ako kamo kan saiyang bendisyon.

⁹Kun minatao kan saindang bendisyon an mga magurang, pinapakosog ninda an mga pamilya kan saindang kaakian, alagad kun minamaldisyon ninda an saindang kaakian, rinaraot ninda an pinakapundasyon kan mga iyan.

¹⁰Dai nindo paghanapon an sadiri nindong kamurawayan huli sa paghale kan dangog kan saindong ama; an pagkawara kan dangog nin saindong ama bakong kamurawayan para sa saindo.

¹¹An sadiri nindong dangog makukua sa paggalang nindo sa saindong ama. An mga aking dai minagalang sa saindang ina mayo man nin onra.

¹²Aki kong lalaki, atamana an saimong ama paggurang niya; dai mo siya pagpamondoon mantang nabubuhay siya.

¹³Magin matinios ka sa panahon na magluya na an saiyang isip; dai mo siya pagbasang-basangon huli ta makosog ka asin marahay an hawak mo.

¹⁴Dai malilingawan nin Kagurangnan an marahay na boot na ipinapahiling nindo sa saindong ama; makakatabang iyan sa pagbayad nindo kan saindong mga kasalan.

¹⁵Kun kamo nasa kasakitan, magigiromdoman nin Kagurangnan an saindong marahay na boot asin tatabangan niya kamo; an saindong mga kasalan matutunaw siring sa ambon sa mainit na saldang nin aldaw.

¹⁶An siisay man na magpabaya sa saiyang mga magurang o magtao sa sainda nin dahelan tanganing maanggot, garo man sana nagmamaldisyon sa Kagurangnan; nasa irarom na siya kan maldisyon nin Kagurangnan.

¹⁷Aki ko, magpakumbaba ka sa gabos mong gibo, asin orog pang maoogma an mga tawo huli kaiyan ki sa mga regalo.

¹⁸Mantang nag-oorog an saimong kadakulaan, dapat mag-orog man an saimong kapakumbabaan; dangan mawiwilihan ka nin Kagurangnan.

²⁰Dakula an kapangyarihan nin Kagurangnan, asin ginagalangan siya kan mga mapakumbaba.

²¹Dai ka maghingowang masabotan an mga bagay na labi kadipisil para saimo, ni magsiyasat kaidtong dai nasasakopan kan saimong pakasabot.

²²Horophoropa an Katogonan na itinao saimo. Dai mo na kaipuhan na maaraman pa an dapit sa mga bagay na dai ipinahayag nin Kagurangnan,

²³kaya dai mo na pakiaraman an mga bagay na iyan. Huli ta an mga bagay na ipinahiling saimo dai kayang saboton kan isip nin tawo.

²⁴Dakul nang tawo an nalagalag kan sadiri man sana nindang kaisipan; an sala nindang kaisipan iyo an nagpangurol kan saindang paghukom.

²⁶Sa kataposan an katagasan nin payo iyo an madara saimo sa kasakitan. An namomoot sa pag-alaman magagadan sa parehong dahelan.

²⁷An tawong matagas an payo magpapasan nin dakul na kasakitan. An parakasala danay na nagdadagdag nin kasalan sa tambak na niyang kasalan.

²⁸Mayo nin bolong an kasakitan kan mga mapaabaw-abaw, huli ta nakagamot na nin hararom sa sainda an karatan.

²⁹An mga madonong na tawo makakanood sa mga kasabihan saka mga parabola. Minahinanyog sinda nin marahay huli ta boot nindang makanood.

³⁰An pagtao sa mga dukha nakakabayad nin kasalan, siring na sinisigbo kan tubig an nagkakarabang kalayo.

³¹An siisay man na minagibo nin karahayan sa iba nag-iisip kan maabot na panahon, huli ta makakakua siya nin tabang sa panahon nin saiyang pagbagsak.