Read Central Bicolano Sirach 30 Bible Online

Sirach 30 - Central Bicolano bible

Sirach 30

¹Hinahampak nin sarong ama an saiyang namomotan na aking lalaki tanganing saiyang ikapag-orgulyo ngapit.

²Kun an sarong aking lalaki disiplinado, igwa siya nin pakinabang, asin pwede siyang ipag-orgulyo kan saiyang ama sa mga katood kaini.

³An ama na nagtutukdo nin karahayan sa saiyang aking lalaki bako sanang mag-oorgulyo sa saiyang mga katood huli saiya kundi pwede pang maara an saiyang mga kaiwal huli sa aki niya.

⁴Mantang buhay pa an ama, an presensya kan saiyang aking lalaki an nagpapaogma saiya, asin kun gadan na siya, mayo siya nin dahelan tanganing magbasol. Bako man talaga siyang gadan, huli ta pareho sa saiya an aki niya.

⁶Igwa siya nin iwinalat na aking lalaki na mabalos sa saiyang mga kaiwal asin mabayad kan saiyang utang na boot sa mga katood niya.

⁷Alagad an ama na sobrang nagpadangat kan saiyang aking lalaki, magkakaigwa nin mga lugad na bubugkoson asin maghahadit siya sa lambang oras na makadangog siya nin kinurahaw.

⁸An kabayong dai minanso dipisil na pagbotan, asin an aking lalaki na mayo nin disiplina magigin siring man.

⁹Kun sobra an pagpadangat mo sa saimong aki asin makikawat ka sa saiya, siya an magigin dahelan kan saimong kamondoan asin gigikanan kan saimong pagluha.

¹⁰Makipagngisihan ka sa saiya ngunyan, asin maghihibi ka sa maabot na panahon, na nagraragot an saimong mga ngipon sa pagbasol.

¹¹Dai mo siya pagtawan nin katalingkasan mantang hoben pa siya, asin dai mo pagpalampason an saiyang mga salang gibo.

¹²Hampakon mo siya mantang hoben pa siya, asin gibohang galangan ka niya. Kun dai mo iyan gibohon, magigin matagas an saiyang payo asin dai siya magsusunod saimo dangan magigin dahelan iyan kan saimong kamondoan.

¹³Kaya disiplinahon mo an saimong aking lalaki asin tukdoe siya na magtrabaho, ta tibaad siya an magin dahelan kan pagkapasopog mo.

¹⁴Mas marahay pa an magin dukha, alagad makosog saka marahay an hawak, ki sa magin mayaman, alagad mahehelangon.

¹⁵An marahay na hawak saka isip mas marahay pa ki sa gabos na bulawan, asin an sarong makosog na lawas ki sa dai mabilang na kayamanan.

¹⁶Mayo na nin makakapayaman o makakatao saimo nin orog na kaogmahan pwera sa duwang bagay na ini.

¹⁷Mas marahay pa an magadan, torog sagkod lamang, ki sa danay kang naghehelang.

¹⁸Mayo nin halaga an pinakamanagom na pagkakan kun mayo ka nin gana huli ta ika may helang; garo man sana iyan mga dolot na pagkakan na ibinugtak sa ibabaw kan lulubngan.

¹⁹Ano an halaga kan pagkakan na dolot sa sarong dios-dios na dai man nakakakan o nakakaparong? Siring kaiyan an sarong tawo na pinapahelang nin Kagurangnan.

²⁰Hinihiling niya an pagkakan dangan minahangos siya nin hararom, arog sa sarong kapon na lalaki na nagkukugos nin sarong daraga.

²¹Dai mo pagtuyohon na pasakitan an saimong sadiri huli sa pagmondo.

²²An kaogmahan iyo an nagpapahalawig nin buhay asin an dahelan kun tadaw ta may kahulogan an buhay.

²³Paogmahon mo an saimong kalag asin rangahon mo an saimong puso; dai ka maghadit sa gabos na panahon. An paghadit mayo nin dinadarang karahayan sa kiisay man, asin dakul nang tawo an rinaot kaiyan.

²⁴Iyan an mapagurang sa saimo. An pag-imon saka an kaanggotan iyo an mapahalipot kan saimong buhay.

²⁵An tawong magayagaya asin igwang marahay na puso gaganahan sa pagkakan saka mananamitan niya an saiyang kinakakan.