Read Central Bicolano Sirach 31 Bible Online

Sirach 31 - Central Bicolano bible

Sirach 31

¹An paghadit dapit sa kwarta iyo an mapaniwang saimo asin mapurisaw sa pagkatorog mo.

²An paghadit dapit sa negosyo iyo an dai makakapatorog saimo, siring sa sarong grabeng helang.

³An mga tawong mayaman nagtatrabaho nin maigot tanganing orog na magdakul an saindang kwarta; dangan pwede na sindang magtukaw-tukaw asin mamuhay sa luho.

⁴An mga dukha nagtatrabaho man nin maigot alagad mayo nin nahihiling sa saindang pinagpagalan, asin kun magpahingalo sinda, orog sindang magkukulang.

⁵An siisay man na namomoot sa kwarta dai pwedeng pawaraan nin sala; an saiyang pagpapagal tanganing yumanan iyo an magdadara saiya sa kasalan.

⁶Kadakul nang tawo an naraot huli sa kwarta, asin nag-atubang sa kapahamakan.

⁷An kwarta sarong siod para sa mga tawong namomoot kaiyan, sarong litag na nahuhulogan kan gabos na lolong.

⁸Paladan an tawong nagyaman alagad dai nagkasala huli sa paglamag sa kwarta.

⁹May midbid kamong tawo na arog kaiyan? Kun igwa, aapodon ta siyang paladan huli ta nakagibo siya nin ngangalasan na mayo pa nin ibang nakakagibo.

¹⁰Kun igwa nang nakapasar sa pagbalong ini, pwede na siyang mag-orgulyo. Siisay an nagkaigwa nin kapangyarihan na magkasala alagad dai nagkasala, asin kapangyarihan sa paggibo nin maraot alagad dai naggibo kaiyan?

¹¹Kun igwa, magdadanay an saiyang kauswagan, asin oomawon siya kan gabos huli kan saiyang pagkamatinao.

¹²Kun ika magtukaw sa sarong dakulang bangkete, dai mo pagbukahon an saimong ngimot, asin dai ka magsabing, “Hilinga an gabos na pagkakan na iyan!”

¹³Sala sa marahay na pag-uugale an pagkaigwa nin paslong mga mata; giromdoma iyan. Sa bilog na linalang, mayo na nin madaog sa mata sa kapasloan; iyan an dahelan kun tadaw ta kadikit-dikit naghihibi an mata.

¹⁴Dai mo pag-ukdawon an lambang kakanon na mahiling mo, asin dai ka manuklang sa pagkua kaiyan.

¹⁵Isipa an kamatean kan ibang tawo sa lamesa; kun ano an boot mong gibohon ninda saimo, iyan man an gibohon mo sainda.

¹⁶Kun makua mo na an saimong pagkakan, kakanon mo iyan siring sa sarong matanos na tawo, asin dai ka magparangutanguta na garo sarong paslo, ta tibaad maongisan ka.

¹⁷Marahay na gawe an maenot na mag-ontok sa pagkakan; an magpakabasog nin sobra nakakaraot kan boot nin ibang tawo.

¹⁸Kun kaiba ka sa kadakul na nakatukaw sa pagkakan, dai ka maghingowang ika an enot na matawan nin pagkakan.

¹⁹An dikit na kakanon dakul na para sa tawong igwa nin marahay na ugale. Laen pa kaiyan, dai ka madidipisilan sa paghangos sa saimong pagkatorog.

²⁰An mga tawong sobra kun minakakan kinukulogan nin tulak asin dai nangangatorog. Kun tama sana an saimong kinakan, mangangatorog ka nin marahay asin magigin marahay an saimong pagmata pagkaaga.

²¹Alagad kun kuminulog an saimong tulak huli ta nasobrahan ka nin pagkakan, magbuhat ka dangan magsuka asin magigin marahay an saimong pagmate.

²²Aki ko, kun hinanyogon mo an sinasabi ko asin gibohon mo iyan, maabot an panahon na pasasalamatan mo ako. Sa gabos mong gibo magin mahigos ka, asin mayong helang na maabot saimo.

²³Oomawon nin mga tawo an kagharong na matinao, asin maninigong omawon siya.

²⁴Alagad gabos na namamanwaan magrereklamo dapit sa sarong kagharong na maimot sa pagkakan, asin tama sanang magreklamo sinda.

²⁵Dai ka maghingowang patotoohan an saimong pagkanilalaki huli sa kadakul na ininom mo, huli ta dakul nang tawo an naraot huli sa arak.

²⁶An ugale nin sarong mapalangkaw nahahayag sa panahon na burat siya asin nakikidiskutiran, siring na linulukasan an lansang pakatapos na bagahon iyan dangan ibinubuntog sa tubig.

²⁷An arak pwedeng makatao saimo nin buhay kun dikit sana kaiyan an saimong inomon. Ano an kamugtakan kan buhay kun mayo nin arak? Linalang an arak tanganing maogma kita.

²⁸Kun dikit sana kaiyan an saimong inomon asin sa tamang panahon, magigin marahay an saimong pagmate saka magigin magayagaya ka.

²⁹Alagad an sobrang pag-inom kaiyan nagdadara nin kapaitan, pagkaongis nin ibang tawo, asin pagsayasay.

³⁰An pagkaburat nagpapadakula sa kaanggotan nin sarong lolong sa ikakaraot niya. Pinapaluya siya kaiyan asin pinapadakul an saiyang mga lugad.

³¹Dai mo nanggad pagtuyawon an sarong tawo kun tapos pa sana kamong mag-inom. Dai mo pagkulogan an saiyang boot mantang nag-oogma siya. Bako iyan an tamang panahon tanganing tuyawon mo siya, o tanganing magbayad siya kan pagkakautang sa saimo.