Read Central Bicolano Sirach 32 Bible Online

Sirach 32 - Central Bicolano bible

Sirach 32

¹Kun ika an napili na mamahala sa sarong bangkete, dai ka magpalangkaw; magin arog ka sana sa saimong mga kaibahan. Hilingon mo an pangangaipo kan mga bisita bago ka magtukaw.

²Kun matapos mo na an saimong katongdan, dangan ka magtukaw saka mag-ogma sa kaibahan kan mga bisita. Gagalangan ka ninda huli sa marahay mong gibo.

³Kun ika an pinakagurang sa gabos na bisita, pwede kang magtaram; deretso mo iyan. Alagad dapat aram mo an saimong itinataram asin dai mo naoolang an tugtog.

⁴Kun panahon na nin kaogmahan, ontokon mo na an pakipag-olay; bako iyan an tamang panahon na magpahiling ka kan saimong naaaraman.

⁵An tugtog sa sarong bangkete na may arak na ipinapainom nakakaagid sa sarong rubi na itinampok sa bulawan.

⁶Marahay na tugtog asin managom na arak—saro iyan na esmeralda na itinampok sa bulawan.

⁷Kun hoben ka pa, dai ka magtaram sagkod na kaipuhan, alagad dai magsobra sa duwang beses, asin kun hinapot ka sana.

⁸Ipahayag mo an boot mong sabihon sa dikit sanang mga tataramon. Ipahiling mong dakul kang naaaraman, alagad dai ka magin matinaram.

⁹Dai ka magpahiling na garo saro kang dakulang tawo sa kaibahan ninda asin dai ka magtaram kun igwa nin nagtataram.

¹⁰An dangog kan sarong tawong mapakumbaba naeenot sa saiya, siring na naeenot an kikilat sa daguldol.

¹¹Maghale ka sa bangkete sa tamang panahon asin dai ka magpahuri. Dai ka na mag-abala sa may pintoan; magpuli ka na.

¹²Sa sadiri mong harong pwede kang mag-ogma siring sa saimong kamawotan, alagad dai ka magkasala nin paghahambog.

¹³Dai mo man paglingawan na magpasalamat sa saimong Kaglalang huli sa pagtugot niyang mag-ogma ka huli sa dakul na marahay na bagay.

¹⁴Kun may pagkatakot ka sa Kagurangnan, aakoon mo an saiyang pagdisiplina. Bebendisyonan niya an mga tawong amay na nagbabangon tanganing mamibi.

¹⁵Adalan mo an saiyang Katogonan, asin manonodan mo iyan; alagad kun bakong tudok sa puso an pag-adal mo kaiyan, dai mo iyan manonodan.

¹⁶Kun may pagkatakot ka sa Kagurangnan, maaaraman mo kun arin an tama, asin mababantog ka huli sa mga tamang hatol.

¹⁷Hahaboan nin mga parakasala an pagsagwe, asin an Katogonan ipapaliwanag ninda sosog sa ikakarahay ninda.

¹⁸An mga tawong igwa nin pag-isip magpapahalaga sa lambang kaisipan, alagad hahaleon kan mga mapalangkaw an anoman na makakaolang sainda.

¹⁹Dai ka maggibo nin anoman sagkod na dai mo pa iyan inisip; kun may nagibo ka na, dai ka na magbasol.

²⁰Dai ka maglakaw sa dalan na pano nin pag-alaman, asin dai mo paggibohon an parehong sala nin makaduwang beses.

²¹Dai ka masyadong magsarig sa saimong sadiri, maski na garo pasil an saimong aagihan.

²²Danay mong pagmaanan an saimong pinaglalakawan.

²³Magin maingat ka sa anoman na saimong ginigibo; pag-otob iyan sa mga pagboot nin Kagurangnan.

²⁴An pagtubod sa Katogonan nangangahulogan nin pagsunod sa mga kabotan nin Kagurangnan. Kun may pagsarig ka sa Kagurangnan, dai ka madadaog.