Read Central Bicolano Sirach 35 Bible Online

Sirach 35 - Central Bicolano bible

Sirach 35

¹Orog na mahalaga an pag-otob kan Katogonan ki sa dakul na dolot; saro man sana iyan na dolot nin pakisumaro.

²An pagbalos sa gibong herak nakakaagid sa dolot na pagkakan; an pagtao sa dukha nakakaagid sa dolot nin pasasalamat.

³An paglikay sa kasalan nakakawili sa Kagurangnan asin nakakabayad sa kasalan.

⁴Alagad dai ka magduman sa Templo na mayo nin dolot;

⁵an Katogonan naghahagad na magdara ka nin dolot.

⁶Kun nagdodolot an sarong matanos na tawo nin sakripisyo dangan minatagdo an taba sa altar, minaitaas pasiring sa Kahorohalangkawe an sarong mahamot na parong.

⁷Aakoon nin Kagurangnan an mga dolot na itinatao nin sarong matanos na tawo asin dai niya iyan malilingawan.

⁸Omawon mo an Kagurangnan huli sa pagtao nin dakul na dolot saiya; dai mo ipagmaimot an enot na mga bunga nin saimong mga tinanom.

⁹Magin maogma ka sa pagtao kan lambang regalo, asin kun magtatao ka kan saimong himoloan, gibohon mo iyan sa kaogmahan.

¹⁰Magtao ka sa Kahorohalangkawe sosog sa itinao niya saimo; magin matinao ka sosog sa kaya mo.

¹¹Huli ta danay na nagbabalos an Kagurangnan, asin makapitong beses pa an ibabalos niya saimo.

¹²Alagad dai ka maghingowang suholan siya o magsarig sa mga dolot na napasaimo sa maraot na paagi, huli ta dai niya iyan aakoon. An Kagurangnan matanos asin dai siya nin pinapalaen.

¹³Dai niya papalaenon an dukha; kun namimibi an sarong nagibohan nin sala, dadangogon siya nin Kagurangnan.

¹⁴Kun an mga ilo asin mga babaeng balo namimibi, dai niya iyan pinapawaraan nin halaga.

¹⁵An mga luha na nagtatagdo sa pisngi kan babaeng balo nagkukurahaw sa tawong nagin dahelan kan saiyang kasakitan.

¹⁶Paglingkodan mo an Kagurangnan sa bilog mong puso, asin aakoon ka niya; makakaabot sa panganoron an saimong mga pamibi.

¹⁷An pamibi kan mapakumbabang tawo nakakalampas sa panganoron asin nagpapadagos paitaas sagkod na makaabot sa Kahorohalangkawe, saen minaontok iyan sagkod na magsimbag siya huli sa paggibo nin hustisya saka pagpadusa kan mga kasalan.

¹⁸Minahiro tolos an Kagurangnan. Dai siya mapahiling nin pakatios sa mga maraot na tawo. Mabalos siya huli sa pagronot kan mga dai nagtutubod sa Dios. Pupuhoon niya an mga mayong herak saka an mga mapalangkaw, asin ibabagsak niya an kapangyarihan kan mga maraot.

¹⁹Itatao niya sa lambang saro an maninigo sa saindang kaisipan saka ginibohan. Huli sa pagkaherak nin Kagurangnan, maoogma an banwaan niya sa panahon na hukoman na niya an saindang kaso.

²⁰Sa panahon nin kasakitan, an pagkaherak niya nakakaagid sa uran na hinahalat pakatapos kan halawig na tig-init.