Read Central Bicolano Sirach 36 Bible Online

Sirach 36 - Central Bicolano bible

Sirach 36

¹O Kagurangnan, Dios kan kinaban, hilinga kami asin kaheraki.

²Gibohang matakot saimo an gabos na nasyon.

³Unata an saimong kamot laban sa mga dayuhan na nasyon asin pahilingan sainda an saimong kosog.

⁴Ginamit mo kami tanganing ipahiling sainda kun gurano ka kabanal; ngunyan gamita sinda tanganing ikapahiling samo kun gurano ka kadakula.

⁵Tugoteng makanood sinda, siring na nakanood kami, na mayo nin ibang Dios, O Kagurangnan, kundi ika sana.

⁶Magtao ka nin mga bagong tanda, maggibo ka nin mga milagro; pahilingan samo an saimong mamuraway na kosog!

⁷Hidalia na an talaan na panahon na an gabos na tawo pwedeng magtaram dapit kan mga darakulang bagay na saimong ginigibo. Pabulosa an saimong maisog, nagkakalayong kaanggotan, asin dai ka magtada maski sarong buhay sa saimong mga kaiwal. Ronota an mga tawong nang-api sa saimong banwaan.

¹⁰Ronota an gabos na pamayo kan mga kaiwal na nag-iisip na sinda sana an mga tawo sa daga na igwang halaga!

¹¹Tipona giraray an mga tribu nin Israel, dangan tawan giraray sainda an daga na itinao mo sainda kaidtong panahon.

¹²O Kagurangnan, maherak ka sa Israel, an banwaan na namidbidan huli kan saimong ngaran, na inapod mong panganay na aking lalaki.

¹³Maherak ka sa Jerusalem, an banal mong syudad, saen pinili mong mag-erok.

¹⁴Panoa an saimong Templo sa Bukid nin Sion kan saimong kamurawayan asin nin mga awit nin pag-omaw.

¹⁵Magsaksi ka para sa saimong banwaan, na saimong linalang sa kapinonan; otoba an mga hula kan mga propeta na saindang itinaram sa saimong ngaran.

¹⁶Balosan mo an mga tawong nagtubod saimo, asin gibohang masasarigan an saimong mga propeta.

¹⁷Danay kang nagin maugayon sa saimong banwaan; dangoga an saimong mga sorogoon mantang namimibi kami. Dangan mamimidbidan kan gabos na yaon sa daga na ika an Kagurangnan, an Dios kan mga panahon.

¹⁸An anoman na klase nin pagkakan pwedeng kakanon, alagad may mga pagkakan na mas marahay ki sa iba.

¹⁹Siring na an dila nakakanamit kan mga klase nin pagkakan, an intelihenteng isip nakakaaram kan mga kaputikan.

²⁰An tawong may biribid na isip nagtatao nin kamondoan, alagad an tawong may eksperyensya iyo an mabalik kaiyan saiya.

²¹Aakoon nin sarong babae an siisay man na lalaki bilang agom, alagad kaipuhan pilion nin sarong lalaki an saiyang magigin agom.

²²An kagayonan nin sarong babae nakakapaogma sa sarong lalaki; mayo na nin maorog pa kagayon sa panhiling nin tawo.

²³Kun an babae maboot saka mahuyo sa saiyang pagtaram, an saiyang agom iyo na an pinakamapalad sa mga lalaki.

²⁴Kun minaagom an sarong lalaki, napapasaiya an pinakamarahay na rogaring na pwedeng makamtan—sarong agom na makakatabang asin makakapakosog saiya.

²⁵An rogaring na dai nakukudalan, linalaog nin mga mahabon. An lalaki na mayo nin agom, naglalagalag asin danay na minahangos nin hararom.

²⁶Dai sinasarigan an tawong mayo nin sadiring harong asin barubanggi iba an tinotorogan, siring na dai sinasarigan an sarong mahabon na naglalagalag sa iba-ibang banwa.