Read Central Bicolano Sirach 37 Bible Online

Sirach 37 - Central Bicolano bible

Sirach 37

¹An siisay man pwedeng magsabing katood mo siya, alagad an nagkapira mga katood sa ngaran sana.

²An kamondoan na bunga kan pagkaraot nin marahay na pagkakatood orog pang makuri ki sa kagadanan.

³O maraot na imahinasyon, tano ta hinaman ka tanganing tahoban nin kadayaan an daga?

⁴An nagkapirang tawo magigin katood mo sagkod na marahay an dalagan kan gabos na bagay, alagad magigin kalaban mo sinda sa panahon nin kasakitan.

⁵An totoong katood matabang saimo laban sa saimong mga kaiwal asin magigin kalasag mo siya sa atubang nin ralaban.

⁶Dai mo nanggad paglingawan an siring na katood sa saimong puso; hirasan mo siya kan bunga nin saimong kapangganahan.

⁷An siisay man pwedeng magtao nin hatol, alagad an nagkapira naggigibo kaiyan sa sadiri nindang karahayan.

⁸Magin maingat ka kun igwang magtao saimo nin hatol. Aramon mo ngona kun ano an saiyang makukua sa bagay na iyan, huli ta masisiguro mo na an sadiri niyang karahayan an nasa isip niya sana. Tibaad gamiton niya an saiyang kapangyarihan laban saimo.

⁹Tataraman ka niyang marahay an saimong gibo, dangan maharayo siya tanganing hilingon kun ano an mangyayari saimo.

¹⁰Dai ka magpahatol sa kiisay man na mayo nin pagsarig saimo, asin dai mo paghatolan an siisay man na nag-iimon saimo.

¹¹Dai mo paghagadan nin hatol an sarong babae dapit sa saiyang karibal, an sarong matalaw dapit sa gera, an sarong negosyante dapit sa tarawadan, an sarong parapabakal dapit sa pagpabakal, an sarong maimot dapit sa pagpasalamat, an sarong makuring tawo dapit sa pagkaherak, an sarong hugakon dapit sa trabaho, an sarong aldawan na trabahador dapit sa paghaman kan saiyang trabaho, an sarong hugakon na oripon dapit sa masakit na trabaho. Dai mo pagpahalagahan an ano man na hatol na pwede nindang itao.

¹²Alagad magsarig ka sa tawong relihiyoso saka midbid sa pag-otob kan mga kabotan nin Kagurangnan, an tawong may pagmakulog saimo, na namomondo kun ika naparaot.

¹³Magsarig ka man sa saimong paghukom; mayo na nin makakaorog pa sa sadiring hatol.

¹⁴Huli ta an kalag nin sarong tawo nugad iyo an nagtatao saiya nin mas marahay na impormasyon ki sa pitong bantay sa itaas nin halangkaw na tore.

¹⁵Alagad, orog sa gabos, mamibi ka sa Kahorohalangkawe tanganing ipahiling saimo an tama mong gibohon.

¹⁶An pagpaplano saka pag-iisip nasa likod kan gabos na gibo.

¹⁷May apat na bagay na tinatawan nin panahon kan isip: marahay asin maraot, an buhay asin an kagadanan. An apat na ini nagpopoon sa isip, alagad danay sindang nasa kapangyarihan kan dila.

¹⁹An sarong tawo pwedeng igwa kan abilidad sa pagtukdo, alagad mayo ini nin halaga sa saiya man sana.

²⁰Pwedeng tuso siya sa pagtaram, alagad gutom an saiyang aabotan huli ta kaoongisan siya kan mga tawo.

²¹Pwedeng mangyari an siring huli ta kulang siya nin kadonongan asin dai siya tinawan nin Kagurangnan kan pakamidbid kan tamang sasabihon sa tamang panahon.

²²Pwedeng sabihon nin sarong tawo na madonong siya asin sabihon saimo na tinutubod niya an naaaraman niya.

²³An siisay man na totoong madonong iyo an magigin paratukdo kan saiyang banwaan, asin pwede nindang sarigan an itinutukdo niya bilang katotoohan.

²⁴Oomawon nin gabos an siring na tawo asin aapodon siyang mapalad.

²⁵An buhay nin sarong tawo nabibilang huli sa mga aldaw, alagad an buhay nin Israel dai nanggad mabibilang huli sa mga aldaw.

²⁶Makukua kan madonong na tawo an pagsarig kan saiyang banwaan, asin magigiromdoman ninda siya sagkod lamang.

²⁷Aki ko, mantang nabubuhay ka, pugolon mo an saimong gana sa pagkakan, asin dai mo pagkakanon an anoman na makakaraot saimo.

²⁸Huli ta an gabos na pagkakan bakong marahay para sa gabos, asin an gabos na tawo dai nagugusto sa parehong klase nin pagkakan.

²⁹Dai ka mag-isip na kaipuhan manamitan mo an gabos na klase nin pagkakan, asin dai ka magpakapaslo sa anoman na pagkakan.

³⁰Huli ta an sobrang pagkakan nagdadara nin kahelangan; kun gibohon mo iyan sa gabos na panahon, danay kang magkakaigwa nin problema sa tulak.

³¹Dakul nang tawo an nagadan huli sa kapasloan. Likayan mo iyan asin mabubuhay ka nin halawig.