Read Central Bicolano Sirach 38 Bible Online

Sirach 38 - Central Bicolano bible

Sirach 38

¹Itao mo sa mga doktor an onra na maninigo sainda, huli ta an Kagurangnan an nagtao sainda kan saindang trabaho.

²An saindang kakayahan sa pagbolong hale sa Kahorohalangkawe, asin binalosan sinda kan mga hade huli kaiyan.

³An saindang naaaraman iyo an nagbubugtak sainda sa saindang mahalagang katongdan, asin ilinalangkaw sinda kan mga darakulang tawo.

⁴An Kagurangnan naglalang nin mga bolong hale sa daga, asin an tawong matanos an isip dai magduduwa-duwa sa paggamit kaiyan.

⁵Bakong an tubig na mapait kaidto nagin tubig na inomon huli sa sarong kahoy tanganing mamidbidan an kapangyarihan nin Kagurangnan?

⁶Siya an nagtao sa tawo kan kakayahan sa pagbolong, tanganing omawon ta siya huli kan mga milagro na saiyang ginigibo.

⁷An parmasyotiko iyo an minahalo kan mga bolong, asin ginagamit iyan kan mga doktor tanganing bolongon an mga helang saka paraon an kulog. Mayo nin kataposan an gibo nin Kagurangnan, an nagtatao nin marahay na hawak sa mga tawo sa kinaban.

⁹Aki ko, kun maghelang ka, dai mo iyan ipagpaliman-liman. Mamibi ka sa Kagurangnan, asin papaomayan ka niya.

¹⁰Ikumpisal mo an gabos mong kasalan dangan mangako kang mamumuhay na nin matanos.

¹¹Magdolot ka nin insenso saka pinong arina, sosog sa kaya mo.

¹²Dangan apodon mo an doktor—huli ta linalang siya nin Kagurangnan—asin dai mo siya pagpahaleon ta kaipuhan mo siya.

¹³May mga panahon na kaipuhan manarig ka sa saiyang kakayahan;

¹⁴huli ta mamimibi man siya sa Kagurangnan na tawan siya kan kakayahan na mapara an kulog na namamatean kan saiyang pasyente asin paomayan siya.

¹⁵Alagad an tawong nagkakasala tumang sa saiyang Kaglalang maninigong maghelang.

¹⁶Aki ko, magtangis ka kun igwa nin gadan. Maghibi ka asin maghaya sa pagpahiling kun gurano kahalaga saimo an nagadan. Hutada an bangkay sa tamang paagi asin dapat na yaon ka sa panahon kan paglubong.

¹⁷Sa kapaitan asin sa kaigotan nin boot, maghibi ka; otoba an tamang panahon nin pagmondo para sa sarong tawo. Magmondo ka sa laog nin saro o duwang aldaw, tanganing malikayan mo an mga tataramon laban saimo, dangan rangahon mo an saimong sadiri.

¹⁸Huli ta an kamondoan minabunga nin kagadanan asin an kamondoan nin puso minapaluya sa sarong tawo.

¹⁹Halawig na panahon an minaagi bago mawara an kamondoan pakatapos na magadan an sarong namomotan, alagad bakong tama na darahon ka kaiyan sa kadukhaan.

²⁰Dai ka magpadaog sa kamondoan; pahalea iyan. Giromdoma na magagadan man kita sa maabot na panahon.

²¹Hare paglingawe na dai na mabalik an sarong gadan. Mayo nin itataong karahayan an saimong pagmondo sa saiya, asin nakukulogan ka pa.

²²Magagadan ka, siring na nagadan siya. Ngunyan na aldaw, siya an nagadan; sa masunod na aldaw, ika na man.

²³Kun ilinubong na an gadan, ontokon mo na an pagromdom saiya. Kun mayo na siya, magmaisog ka.

²⁴An sarong estudyante dapat igwa nin panahon sa pag-adal kun boot niyang magin madonong; dapat haleon saiya an ibang katongdan.

²⁵Paanong magigin madonong an sarong paraoma, na an nasa isip sana iyo an pag-alaw saka pagpatrabaho kan mga baka, na an aram sanang pag-olayan iyo an dapit sa mga torong baka?

²⁶Napapagal siyang marahay sa pag-arado, asin sa banggi pinapakakan niya an mga hayop.

²⁷Siring man kaiyan an mga panday saka ekspertong paraukit, na nagtatrabaho aldaw-banggi sa pag-ukit sa mamahalon na bato, maingat sa paggibo nin mga bagong disenyo. Napapagal sinda nin marahay sa pagpinta nin sarong dakulang ladawan, asin nagtatrabaho sinda sagkod banggi tanganing mahaman an saindang ginigibo.

²⁸Siring man kaiyan an sarong panday sa lansang sa atubang kan saiyang pulpogan, na nagpaplano kun ano an gigibohon sa sarong pedasong lansang. Nasusulo kan init kan kalayo an saiyang kublit mantang ginaganot siyang nagtatrabaho sa atubang kan horno. Nabobongog siya kan tanog kan maso mantang minamasdan niya na nagkakaporma an saiyang ginigibo. Napapagal siya nin marahay, asin nagtatrabaho siya sagkod sa banggi tanganing mahaman an samno kaiyan.

²⁹Siring man kaiyan an paragibo nin koron, na nagtutukaw sa atubang kan saiyang pinagtatrabahoan, saen an rweda pinapatalibong kan saiyang mga bitis; an isip niya nasa saiyang ginigibo, asin pinaghohorophorop niya kun pira an saiyang mahahaman.

³⁰Tinitimaktimakan ngona niya an laboy sagkod na pwede na niyang matawan nin porma kan saiyang mga kamot; napapagal siyang marahay sa pagpakinang kaiyan, asin nagtatrabaho siya sagkod banggi sa paglinig kan horno.

³¹An mga trabahador na ini nagsasarig sa saindang mga kamot, asin an lambang saro eksperto sa sadiri niyang trabaho.

³²Kun mayo nin mga tawong arog sainda, dai magkakaigwa nin mga syudad; mayo nin siisay man na maerok o madalaw sa mga lugar na dai makukuahan kan siring na mga tawo.

³³An mga tawong ini dai pinaghahanap tanganing maglingkod sa konseho kan banwaan, asin dai sinda pinapakapot kan mahahalagang mga katongdan. Dai sinda naglilingkod bilang mga hukom, asin dai ninda nasasabotan an dapit sa mga katogonan. Mayo sinda nin inadalan asin dai sinda namimidbidan huli kan saindang kadonongan. Dai mo sinda makukuang nagtataram nin mga talinhaga.

³⁴Alagad an saindang trabaho iyo an minapapusog kan kinaban. Kun nagtatrabaho sinda, nakakaarog iyan sa pagpamibi.