Read Central Bicolano Sirach 39 Bible Online

Sirach 39 - Central Bicolano bible

Sirach 39

¹Alagad laen man an tawong idinusay an saiyang sadiri sa pag-adal kan Katogonan kan Kahorohalangkawe. Sinisiyasat niya an kadonongan kan gabos na suanoy na parasurat asin pinag-aadalan niya an mga propesiya.

²Tinotoom niya an mga kasabihan kan mga bantog na tawo asin eksperto siya sa pag-interpretar kan mga parabola.

³Inaadalan niya an mga nakatagong kahulogan kan mga talinhaga asin kaya niyang ipahayag an mga bakong malinaw na kahulogan kan parabola.

⁴Inaapod siya nin darakulang mga tawo tanganing maglingkod sainda, asin mahihiling mo siya sa kaibahan nin mga pamayo. Nagbabyahe siya sa mga dayuhan na daga sa paghinguang manodan an dapit sa karahayan asin karatan nin tawo.

⁵Ugale niya an magbangon nin amay asin mamibi sa Kagurangnan na saiyang Kaglalang, naghahagad na patawadon siya kan saiyang mga kasalan.

⁶Dangan kun boot an dakulang Kagurangnan, mapapano siya nin pakasabot. Mataram siya nin mga tataramon na may kadonongan, asin magpapasalamat siya sa Kagurangnan sa saiyang pagpamibi.

⁷Magkakaigwa siya nin pakasabot na saiyang ikakahiras asin marahay na hatol na ikakatao, siring man nin mga bisyon kan mga sekreto nin Kagurangnan.

⁸Ipapahayag niya an saiyang nanodan sa saiyang katukdoan, asin mag-oorgulyo siya sa Katogonan saka sa tipan nin Kagurangnan.

⁹Dakul an maomaw kan saiyang kadonongan, asin dai iyan mawawara, huli ta magigiromdoman siya kan mga tawo sa gabos na henerasyon.

¹⁰Ipapahayag kan mga nasyon an saiyang kadonongan, asin oomawon siya sa katiriponan.

¹¹Kun maggurang siya, magagadan siya na sarong bantog na tawo, asin kun magadan siya bago nagin bantog, makokontento na siya.

¹²Siring sa bulan kun kabilogan, pano ako nin dakul pang kaisipan na dapat ipahayag.

¹³Dangoga nindo ako, kamo na relihiyosong kaakian ko, asin magbururak kamo arog sa rosas sa pangpang nin salog.

¹⁴Magbururak kamo siring sa liryo, asin iwarak nindo an saindong hamot arog sa insenso. Mag-awit kamo kan mga kaomawan nin Kagurangnan, dangan pasalamatan nindo siya huli kan gabos niyang gibo.

¹⁵Pamurawaya nindo an saiyang ngaran asin magpasalamat kamo na may pag-omaw! Awita nindo an awit na ini kaiba an tanog nin mga lira:

¹⁶An gabos na ginibo nin Kagurangnan marahay nanggad; anoman an saiyang pagboot naootob sa saiyang panahon.

¹⁷Mayo nin siisay man na maghapot kun tadaw ta arog kaiyan an mga bagay; sisimbagon an mga hapot na iyan sa tamang panahon. Nagboot siya, asin natipon an katubigan, dakulang mga lanob nin tubig an nagtindog kan siya magtaram.

¹⁸Anoman an saiyang ipinagboboot tolos na nagigibo; mayo nin kasagkoran an saiyang kapangyarihan sa pagligtas.

¹⁹Nahihiling niya an gabos na ginigibo nin tawo; sa saiyang panhiling, mayo nin pwedeng itago.

²⁰Nahihiling niya an kabilogan kan panahon, poon sa kapinonan sagkod sa kataposan, asin mayo nin makangangalas para sa saiya.

²¹Mayo nin siisay man na maghapot kun tadaw ta arog kaiyan an mga bagay; huli ta linalang an gabos na bagay na may sadiring katuyohan.

²²Arog sa Salog nin Nilo, nagsusupay an saiyang bendisyon na nagpapayaman sa kinaban sa paagi nin sarong matubang na baha.

²³Aakoon kan mga nasyon an saiyang kaanggotan, siring na an preskong tubig ginigibo niyang maasgad.

²⁴Para sa mga banal, tanos an saiyang mga dalan; para sa mga maraot, iyan pano nin mga olang.

²⁵Poon sa kapinonan naggibo siya nin mga marahay na bagay para sa mga matanos, asin mga makangirhat na bagay para sa mga parakasala.

²⁶An mga nangongorog na kaipuhan nin tawo tanganing mabuhay iyo ini: tubig, kalayo, lansang, saka asin, arina, dugos, saka gatas, arak, gubing, asin lana.

²⁷An gabos na ini marahay para sa mga banal, alagad nagigin maraot ini para sa mga parakasala.

²⁸Igwang mga doros na linalang tanganing magdara nin padusa, makosog nin marahay kaya nahihiro an kabukidan. Sa mga panahon nin paghukom, binubutasan ninda an saindang kapangyarihan asin pinapakulpa an kaanggotan kan saindang kaglalang.

²⁹An mga maisog na hayop, an mga uyang, asin an mga halas; an espada na nanggagadan sa maraot; an kalayo, uran nin yelo, gutom, asin helang; an mga ini gabos linalang bilang mga padusa.

³¹Maogma nindang inootob an kabotan nin Kagurangnan asin andam sinda sa paglingkod saiya digdi sa daga. Kun minaabot na an panahon nin saindang paglingkod, dai nanggad sinda minalapas. (

³²Haloy nang panahon na aram ko ini, kaya pakatapos na makapag-isip ako, isinurat ko ini.)

³³Marahay an gabos na ginibo nin Kagurangnan; itinatao niya an lambang kaipuhan sa tamang panahon.

³⁴Mayo nin makasabi na mas maraot an ibang bagay ki sa iba, huli ta marahay an gabos sa tamang panahon.

³⁵Kaya ngunyan, mag-awit kamo nin mga pag-omaw sa bilog nindong puso, asin omawon nindo an ngaran nin Kagurangnan!