Read Central Bicolano Sirach 4 Bible Online

Sirach 4 - Central Bicolano bible

Sirach 4

¹Aki ko, dai mo pag-olangon an dukha sa saindang hanap-buhay o pagpahalaton sinda sa saindang pangangaipo.

²Dai mo nanggad pagtawan nin dahelan na mamondo o maanggot an sarong nagugutom na tawo.

³Dai mo pagdagdagan an kasakitan nin sarong tawo na mainit na an payo, ni pagparahaloyon an pagtao kan saimong regalo sa makilimos.

⁴Dai ka magsayumang tabangan an sarong makilimos na nasasakitan. Dai mo pagtalikodan an sarong dukha o pagtawan siya nin anoman na dahelan tanganing maldisyonon ka.

⁶Huli ta kun sa kapaitan nin kalag maldisyonon ka niya, dadangogon kan Kaglalang an saiyang pamibi.

⁷Gibohang kamotan ka kan mga yaon sa katiriponan. Galangan mo an mga tawong may awtoridad.

⁸Hinanyoga an sinasabi kan mga dukha, dangan may paggalang na simbagon mo sinda.

⁹Ligtasan an tawong boot pakaraoton kan iba, asin magin pusog ka sa saimong paghukom.

¹⁰Magin arog ka sa sarong ama para sa mga ilo, asin tabangan mo an mga babaeng balo. Dangan makakaarog ka sa sarong aking lalaki kan Kahorohalangkawe, asin mamomotan ka niya orog pa ki sa pagkamoot nin saimong ina.

¹¹Inaataman kan Kadonongan an mga tawong naghahanap sa saiya; ilinalangkaw niya sinda.

¹²An namomoot saiya namomoot sa buhay, asin an amay pang naghahanap saiya mapapano nin kaogmahan.

¹³An siisay man na magkaigwa nin Kadonongan magkakaigwa nin dakulang dangog, asin saen man siya magduman, bebendisyonan siya nin Kagurangnan.

¹⁴An mga sorogoon kan Kadonongan mga sorogoon kan An Banal, asin namomotan nin Kagurangnan an gabos na namomoot sa Kadonongan.

¹⁵An mga nagkukuyog saiya maghuhukom sa mga nasyon; an mga naghihinanyog saiya igwa nin tunay na katiwasayan.

¹⁶Magsarig kamo sa Kadonongan, asin mapapasaindo siya dangan ikakapamana nindo siya sa saindong mga kapagarakian.

¹⁷Sa kaenot-enote, gigiyahan kamo nin Kadonongan sa dipisil na mga dalan. Gigibohon niyang matakot kamo nin marahay kaya maghohona kamong dai na kamo makakapadagos. Masasakitan kamo huli kan saiyang disiplina, asin babaloon niya kamo huli sa mga kahagadan niya sagkod na manarig nanggad siya saindo.

¹⁸Dangan hidaling madolok siya saindo, ipapahayag an saiyang mga sekreto saindo, asin papaogmahon kamo.

¹⁹Alagad kun maglagalag kamo, babayaan niya kamo asin tutugotan na mapahamak.

²⁰Kuahon nindo an lambang oportunidad, alagad likayan nindo an maraot; dai nindo pagmenoson an saindong sadiri.

²¹An kapakumbabaan tinatawan nin onra saka paggalang, alagad an hababang paghiling sa sadiri sarong kasalan.

²²Dai kamo magtugot na mangyari an kabotan nin ibang tawo sa ikakapahamak nindo; dai nindo ipaghunod an saindong deretso sa ikakaraot nindo.

²³Dai kamo magduwa-duwa sa pagtaram kun kinakaipuhan. Dai nindo pagtagoon an saindong kadonongan.

²⁴Huli ta an saindong kadonongan saka naaaraman mamimidbidan sana sa paagi kan saindong itinataram.

²⁵Alagad dai nanggad kamo magtaram laban sa katotoohan. Giromdoma nindo na dai nindo aram an gabos na bagay.

²⁶Dai kamo masopog na ikumpisal an saindong mga kasalan; mayong pakinabang an paghingowang ontokon an pagbulos kan salog.

²⁷Dai kamo magpasakop sa sarong mangmang, ni magpahiling nin pagpapalaen sa sarong dakulang tawo.

²⁸Panindogan nindo kun ano an tama, maski buhay nindo an nakataya; an Kagurangnan Dios makikilaban para saindo.

²⁹Dai kamo maghidali sa pagtaram o maghinugak asin magpabaya sa saindong trabaho.

³⁰Dai kamo mag-arog sa sarong leon sa saindong harong, ni magin parahanap nin sala sa saindong mga sorogoon.

³¹Dai nindo pagbukahon an saindong kamot sa pag-ako nin sarong bagay kun saindo man sanang seserahan iyan pag-abot kan panahon nin pagbayad.