Read Central Bicolano Sirach 41 Bible Online

Sirach 41 - Central Bicolano bible

Sirach 41

¹Kagadanan! An paghorop-horop kaini mapait para sa tawong mayaman, na matoninong na namumuhay sa tahaw kan saiyang mga rogaring, ligtas sa mga kahandalan, asin maganang magkakan.

²Kagadanan! An saimong pag-abot sarong kaogmahan para sa sarong namumuhay sa kadukhaan, naghehelang, gurang na, nagagabatan nin mga kahandalan, buta, asin mayo nin paglaom.

³Dai kamo matakot sa dekreto nin kagadanan. Giromdoma na nag-abot iyan sa mga naenot saindo asin maabot iyan sa mga tawong mamumundag pakatapos nindo.

⁴An Kagurangnan an nagboot kaiyan para sa lambang buhay na linalang. Siisay ka na maolang sa kamawotan kan Kahorohalangkawe? Sa kinaban kan mga gadan mayo nin magmamakulog kun nabuhay ka sa laog nin sampolo, sanggatos, o sangribong taon.

⁵An kaakian kan mga parakasala, na pinadakula sa bakong diosnon na kapalibotan, nagigin makaoongis na mga tawo.

⁶Mawawara sa sainda an anoman na manahon ninda, asin mamumuhay na mayong onra an saindang kapagarakian.

⁷Babasolon kan kaakian an saindang bakong diosnon na magurang huli ta mayo sinda nin onra.

⁸Herak man saindo, kamong mga bakong diosnon na tawo, na nagtalikod sa Katogonan kan Kahorohalangkaweng Dios.

⁹Kun kamo mangaki, magkakagaradan sinda asin mayo nin mawawalat saindo kundi kamondoan. Magkakaigwa nin dakulang kaogmahan sa panahon na kamo masingkog, asin maski gadan na kamo, mamaldisyonon pa kamo.

¹⁰An ano man na hale sa alpog mabalik sa alpog; kaya an bakong diosnon na tawo naglalakaw sa maldisyon pasiring sa kapahamakan.

¹¹Mayong halaga an hawak nin sarong tawo, alagad an marahay na dangog nagdadanay sagkod lamang.

¹²Ingati nindo an saindong dangog, huli ta magdadanay iyan ki sa sangribong dakulang sarayan nin bulawan.

¹³An sarong marahay na buhay igwang kasagkoran, alagad an marahay na dangog nagdadanay sagkod lamang.

¹⁴Mga aki ko, sunoda nindo an itinutukdo ko saindo asin mamuhay kamo sa katoninongan. An kadonongan na dai nahahayag nakakaagid sa kayamanan na itinago—an duwang ini mayo nin pakinabang.

¹⁵An sarong tawo na nagtatahob kan saiyang kalolongan mas marahay pa ki sa tawong nagtatago kan saiyang kadonongan.

¹⁶Mga aki ko, pagdangog kamo asin tutukdoan ko kamo kan mga sitwasyon na dapat masopog kamo. Huli ta bakong tama na masopog kamo sa gabos na panahon.

¹⁷Sa atubang kan saindong mga magurang masopog kamo kan gibong karigsokan. Sa atubang nin sarong pamayo o sarong dakulang tawo masopog kamo sa pagputik.

¹⁸Sa atubang nin sarong hukom masopog kamo sa paggibo nin krimen. Sa atubang nin sarong katiriponan o banwaan masopog kamo sa paglapas kan katogonan. Sa atubang nin sarong katood o kasosyo masopog kamo sa pandadaya.

¹⁹Sa atubang nin saindong mga kanatad masopog kamo sa panghahabon. Masopog kamo sa paglapas nin sarong panuga, sa pagbugtak kan saindong siko sa lamesa kun nagkakakan, sa pagigin maimot kun hinahagadan nin anoman,

²⁰sa dai pagsimbag kun kinokomusta, sa paghiling sa sarong maraot na babae,

²¹sa pagsayuma sa pakiolay nin sarong kadugo, sa pag-olang kan deretso nin sarong tawo, sa paghiling sa agom nin ibang lalaki,

²²sa pagkakaigwa nin relasyon sa saiyang oripon na babae (likayan nindo an saiyang higdaan!) sa pag-insulto kan saindong mga katood, sa pagtuyaw pakatapos na magtao kamo nin mga regalo,

²³asin sa pagpahayag nin mga sekreto. Iyo ini an mga sitwasyon na dapat masopog kamo, asin gagalangan pa kamo kan mga tawo huli kaiyan.