Read Central Bicolano Sirach 43 Bible Online

Sirach 43 - Central Bicolano bible

Sirach 43

¹Gurano kagayon kan maliwanag asin malinaw na langit sa kaitaasan! Sarong mamuraway na tanawon iyan!

²An aldaw, kun minatunga, nagpapahayag sa saiyang pag-itaas na iyan sarong makangalas na gibo kan Kahorohalangkawe.

³Kun odto, pinapamara kaiyan an daga; mayong makakatagal sa nagkakalayong init kaiyan.

⁴Nakakasulo an init kan horno na pinagtatrabahoan nin sarong tawo, alagad makatolong beses an init kan aldaw na minasulo kan kabukidan. Pinapaluwas kaiyan an nagkakalayong saldang, na nakakasula huli sa kaliwanagan.

⁵Dakula an Kagurangnan na naggibo kaiyan; sa saiyang pagboot marikas na minalakaw iyan.

⁶Yaon man an bulan, na nagtatala kan pag-agi nin panahon, sarong mayong tapos na tanda kan nagliliwat na mga panahon.

⁷An bulan iyo an minatalaan kan mga banal na aldaw, sarong ilaw na nagdidiklom pakatapos kan saiyang kabilogan.

⁸An “bulan” nginaranan sunod sa bulan, makangangalas na paghilingon mantang nagdadakula barubanggi, sarong maliwanag na tanda para sa langitnon na hukbo, na nagliliwanag sa kahiwasan nin kalangitan.

⁹An nagliliwanag na mga bitoon iyo an nagpapagayon kan kalangitan, mga nagkikinang na samno sa halangkaw na kalangitan nin Kagurangnan.

¹⁰Minaontok sinda sa lugar na itinalaan sainda kan An Banal asin dai sinda nag-oontok sa saindang pagbabantay.

¹¹Hilinga an bulalangaw dangan omawa an kaggibo kaiyan! Gurano kamuraway, kakinang an saiyang kagayonan.

¹²Siring sa pana na tiniko kan mga kamot kan Kahorohalangkawe, naaabot kaiyan an mga pagdolonan sa sarong arko nin kamurawayan.

¹³Sa pagboot niya, minahulog an nyebe; minaabot an kikilat sa pagsunod kan saiyang paghukom.

¹⁴Binubukasan an mga kwartong sarayan sa kalangitan, asin minariligid paluwas an mga dampog siring sa naglalayog na mga gamgam.

¹⁵Huli sa saiyang kapangyarihan minatambak siya nin mga panganoron asin pinaparasa an nyebe nganing magin uran nin yelo.

¹⁶Minataram siya, asin pinapatakig kan daguldol an daga; hinahampak man an daga kan bagyong hale sa amihan asin kan aripuros. An nyebe iwinawarak niya arog sa naglalayog na mga gamgam, arog sa mga doron na nagtutugdon sa daga.

¹⁸Minangalas kita sa magayon na kaputian kan nyebe, asin sa pagngalas minamasdan ta an paghulog kaiyan.

¹⁹An yelo iwinawarak niya sa daga arog sa asin, na kun minatagas, nagigin mapapanas na mga tonok.

²⁰Minahuyop an malipot na doros kan amihan asin nagigin yelo an katubigan; an lambang danaw saka sapa nagigin yelo, na garo nagsulot nin pantahob sa daghan.

²¹Hinahalon niya an kabukidan asin sinusulo an kalangtadan, dangan siring sa kalayo na inaalang niya an doot.

²²Alagad nakakabalik an buhay sa gabos na ini pag-abot kan ambon, mantang naglilipot an panahon asin minatunga an alopoop.

²³Huli sa saiyang kadonongan, pinapakalma niya an dakulang kadagatan dangan binubugtakan niya iyan nin mga isla.

²⁴An mga marino nag-oosip dapit sa mga pag-alaman sa dagat, asin minadangog kita kan saindang mga istorya mantang nagngangalas.

²⁵Huli ta yaon sa dagat an makangangalas saka magayon na mga linalang: darakulang impakto asin gabos na linalang na may buhay.

²⁶Huli sa Kagurangnan, dai nalalagalag an saiyang mga sugo, asin huli sa saiyang tataramon an gabos na bagay nagkakasararo.

²⁷Magtaram man kita nin dakul dai kita makakahaman, alagad iyo ini an kahulogan kaiyan: an Kagurangnan iyo an gabos.

²⁸Saen ta makukua an kosog tanganing omawon siya? Huli ta mas dakula siya ki sa bilog na linalang.

²⁹Dakula asin makangirhat an Kagurangnan; makangangalas an saiyang kapangyarihan.

³⁰Maski gibohon mo an pinakaorog mong pag-omaw saiya, dakula pa giraray siya sa pwede mong ikapahayag. Maski mayong ontok asin sa bilog na kosog galangan mo siya, bako pa giraray maninigo an magigin pag-omaw mo saiya.

³¹Mayo pang nakahiling saiya, mayo nin makakaladawan saiya; mayo nin pwedeng mag-omaw saiya sosog sa maninigo saiya.

³²Dakul na bagay na orog pang dakula ki sa mga ini an dai pa aram, huli ta kadikit pa sana an nahiling ta sa saiyang ginibohan.

³³An Kagurangnan an naggibo kan kinaban dangan an mga diosnon na tawo tinawan niya nin kadonongan.