Read Central Bicolano Sirach 44 Bible Online

Sirach 44 - Central Bicolano bible

Sirach 44

¹Kaya ngunyan, omawon ta an mga bantog na kalalakihan, an satong mga ginikanan kan mga nakaaging henerasyon,

²mga lalaking tinawan nin Kagurangnan nin dakulang kamurawayan, na sa sainda nahiling an saiyang kadakulaan magpoon sa kapinonan nin panahon.

³Igwa nin nagkapirang namayo nin mga kahadean, asin nagkapirang nabantog huli kan saindang kapangyarihan. An nagkapira sainda mga madonong na parahatol, asin an nagkapira, nagpropesiya.

⁴Igwang mga pamayo nin mga nasyon na an saindang mga dekreto iyo an nagpalakaw kan saindang namamanwaan, mga pamayo na nagpaluwas nin mga dekreto, mga madonong sa pagtaram nin mga katukdoan, asin idtong naggagamit nin hararom na mga talinhaga,

⁵mga paratula, asin mga paragibo nin mga awit,

⁶mga mayaman saka mapangyaring mga tawo na namumuhay sa katoninongan sa saindang harong.

⁷Gabos sinda inomaw sa sadiri nindang henerasyon, asin bantog sa sadiri nindang panahon.

⁸An nagkapira nagwalat nin dangog asin sagkod ngunyan inoomaw sinda nin mga banwaan.

⁹Igwa man nin iba na dai na ginigiromdom, na garo baga dai sinda nabuhay, na nagadan dangan nalingawan, sinda, asin an saindang kaakian pakatapos ninda.

¹⁰Alagad oomawon ta an mga diosnon na tawong ini, na an mga gibong katanosan dai nanggad nalingawan.

¹¹An saindang marahay na dangog mapapaduman sa saindang mga kapagarakian, asin iyo iyan an saindang magigin pamana.

¹²An saindang mga kapagarakian padagos na nag-ootob kan tipan asin danay na mag-ootob huli kan ginibo kan saindang mga ginikanan.

¹³Magpapadagos sagkod lamang an saindang pamilya, asin an saindang kabantogan dai nanggad malilingawan.

¹⁴An saindang mga bangkay ilinubong sa katoninongan, alagad buhay sagkod pa man an saindang ngaran.

¹⁵Ipapahayag nin mga banwaan an saindang kadonongan, asin oomawon sinda sa katiriponan.

¹⁶Si Enoc nawilihan nin Kagurangnan asin dinara siya sa langit. Siya an nagin aarogan nin pagsolsol para sa gabos na panahon.

¹⁷Si Noe sarong matanos asin maimbod na tawo. Pakatapos na umabot an paggaba, tinawan niya nin bagong kapinonan an katawohan. Huli saiya, igwang mga tawo na natada sa daga pakatapos kan baha.

¹⁸An Kagurangnan guminibo saiya nin mayong tapos na tipan, nanunuga na dai na nanggad niya paparaon an tawo huli sa baha.

¹⁹Si Abraham iyo an dakulang ginikanan kan dakul na nasyon, asin mayo nin siisay man na makakaarog sa saiya sa kabantogan.

²⁰Inotob niya an Katogonan kan Kahorohalangkawe, asin nakipagtipan siya saiya, sarong tipan na makukua sa saiyang hawak. Kan baloon siya, nahiling siyang maimbod.

²¹Kaya naggibo nin banal na panuga an Kagurangnan na an saiyang mga kapagarakian magigin sarong bendisyon sa kinaban; na an saindang bilang magigin siring sa alpog kan kinaban; na gagalangan sinda orog pa ki sa arin man na banwaan sa daga; na an saindang daga magigin mahiwas, magpoon sa Eufrates sagkod sa mga poro kan daga.

²²Itinao man nin Kagurangnan ki Isaac an parehong panuga huli na sana ki Abraham na saiyang ama, dangan ki Jacob. Itinaram niya giraray an saiyang panuga na an mga kapagarakian ni Abraham magigin sarong bendisyon sa gabos na tawo. Tinaraman nin Kagurangnan si Jacob na bebendisyonan niya ini; itinao niya saiya an daga na mapapasaiya, saka binaranga idto sa doseng kabtang, saro para sa lambang tribu.