Read Central Bicolano Sirach 45 Bible Online

Sirach 45 - Central Bicolano bible

Sirach 45

¹Hale sa kapagarakian ni Jacob, nagkua an Kagurangnan nin sarong diosnon na lalaki na nagustohan kan gabos, namotan nin Dios asin kan mga tawo. An lalaking ini iyo si Moises, na an lambang giromdom sarong bendisyon.

²Ginibo siya nin Kagurangnan na kapantay kan mga anghel sa kamurawayan, asin tinawan nin kapangyarihan na matakotan kan saiyang mga kaiwal.

³Duman sa Egipto, sa saiyang pagboot, umabot an kapahamakan. Ginibo nin Kagurangnan na galangan siya kan mga hade. Itinao nin Kagurangnan ki Moises an saiyang mga pagboot para sa saiyang banwaan asin ipinahiling niya saiya an nakasusulang liwanag kan saiyang presensya.

⁴Pinili nin Kagurangnan si Moises hale sa gabos na katawohan asin kinonsagra niya ini huli kan saiyang kaimbodan saka kapakumbabaan.

⁵Itinugot nin Kagurangnan na madangog siya ni Moises asin giniyahan niya ini sa mahibog na kadikloman. Hampangan na itinao niya saiya an mga pagboot, an Katogonan na nagtataong buhay asin pakaaram, tanganing itukdo ni Moises an tipan sa mga Israelita.

⁶Pinili nin Kagurangnan si Aaron, sarong banal na lalaki arog kan saiyang tugang na si Moises, hale sa tribu ni Levi.

⁷Naggibo siya ki Aaron nin mayong kataposan na tipan, asin itinao saiya an katongdan na maglingkod bilang padi sa banwaan nin Kagurangnan. Ilinangkaw niya si Aaron sa paagi nin paggubing saiya nin magagayon na gubing saka mga samno,

⁸na mayo nin kaninan sa saindang kagayonan. Itinao niya saiya an tanda nin awtoridad: an linong kalsonsilyo, an tunika, asin an abito na may mga granada sa palibot kan gayad.

⁹Pinalibotan man nin mga bulawan na kampanilya an gayad kan abito, tanganing kun naglalakaw siya, madangog an tanog sa Templo, asin magiromdoman nin Kagurangnan an saiyang banwaan.

¹⁰Itinao nin Kagurangnan ki Aaron an banal na abito na binurdahan nin bulawan, asul, saka purpura; itinao man saiya an pantahob sa daghan kaiba kan Urim asin Tummim;

¹¹an pulang torsido, na gibo nin eksperto; an mahahalagang mga bato na nauukitan nin mga ngaran, na kinalopkopan nin bulawan kan alahero, dangan ibinugtak sa pantahob sa daghan tanganing magiromdoman nin Kagurangnan an doseng tribu nin Israel.

¹²Itinao man niya saiya an sarong turban na may samnong bulawan na inukitan kan mga tataramon “Kinonsagra sa Kagurangnan.” Magayon an pakagibo kaiyan, trabaho nin sarong eksperto, asin sarong dakulang onra an pagsulot kaiyan.

¹³Bago kan panahon ni Aaron, mayo pa nin nahiling na siring kagayon na mga bagay. Mayo nin siisay man kundi si Aaron asin an saiyang mga kapagarakian sana an nagsulot o magsusulot kaiyan.

¹⁴An dolot na pagkakan kaipuhan na gibohon duwang beses sarong aldaw asin tutongon nanggad.

¹⁵Si Moises an nagtalaga ki Aaron bilang padi, asin linahidan niya ini nin banal na lana; iyan sarong mayong tapos na tipan para saiya asin para sa saiyang mga kapagarakian tanganing maglingkod sinda sa Kagurangnan bilang saiyang mga padi asin tanganing bendisyonan an saiyang banwaan sa ngaran nin Kagurangnan.

¹⁶Pinili nin Kagurangnan si Aaron hale sa gabos na katawohan tanganing magdolot nin mga sakripisyo, magtutong nin mahamot na insenso na mapagiromdom sa Kagurangnan kan saiyang banwaan, asin mahale kan saindang mga kasalan.

¹⁷Ipinaniwala niya an mga katogonan sa pag-iingat ni Aaron; tinawan niya siya nin awtoridad tanganing maghukom asin tanganing tukdoan an Israel kan Katogonan.

¹⁸Kan an mga tawo yaon duman sa kalangtadan, igwa nin sarong grupo na kaayon sa ibang pamilya na anggot na naglaban ki Moises. An mga ini iyo si Datan, Abiram, asin Kora saka an saindang pag-iriba.

¹⁹Nahiling nin Kagurangnan an saindang ginigibo asin naanggot siya. Labi-labi an kaanggotan niya kaya naggibo siya nin milagro asin ginadan niya sinda sa naglalaad na kalayo.

²⁰Dangan dinagdagan niya an kamurawayan ni Aaron asin tinawan niya ini nin pamana: itinalaan niya saiya an enot na mga ani, tanganing magkaigwa nin pagkakan an mga padi.

²¹An mga isinakripisyo sa Kagurangnan iyo an saindang pagkakan; itinao ini nin Kagurangnan ki Aaron asin sa saiyang mga kapagarakian.

²²Alagad dai si Aaron magmamana nin daga arog kan ibang mga tawo, dai siya nin sadiring kabtang. An Kagurangnan mismo iyo an saiyang sadiring kabtang saka kahirasan.

²³Sunod ki Moises saka ki Aaron, si Finehas na aking lalaki ni Eleazar iyo an ikatolo sa kamurawayan, huli ta pusog an saiyang pagkatakot sa Kagurangnan, asin siya sana an nagin maimbod kan magrebelde sa Dios an mga tawo. Siya an nagin dalan kan kapatawadan kan mga kasalan nin Israel.

²⁴Kaya nakipagtipan saiya an Kagurangnan—sarong daing tapos na tipan. Siya an mamamahala kan santwaryo asin kan saiyang banwaan; siya asin an saiyang kapagarakian an maglilingkod bilang Halangkaw na Padi sagkod pa man.

²⁵An tipan na ini bakong arog kan tipan niya ki David na aking lalaki ni Jesse, na kabilang sa tribu ni Juda, na an pagigin hade ipinapamana kan ama sa saiyang aking lalaki. An pagigin padi magdadanay sagkod lamang sa kapagarakian ni Aaron.

²⁶Itugot logod nin Kagurangnan na magkaigwa ka nin kadonongan tanganing matanos mong mahukoman an saiyang banwaan, tanganing dai mawara sa sainda an kauswagan, asin tanganing magdanay sagkod sa maabot na panahon an saindang kamurawayan.