Read Central Bicolano Sirach 46 Bible Online

Sirach 46 - Central Bicolano bible

Sirach 46

¹Si Josue na aking lalaki ni Nun sarong dakulang soldados. Siya an nagsunod ki Moises bilang propeta. Sosog sa kahulogan kan saiyang ngaran, siya nagin sarong dakulang paraligtas kan piniling banwaan nin Kagurangnan. Dinaog niya an mga kaiwal na nagsalakay sainda, tanganing ikatao niya sa Israel an saindang daga.

²Mamuraway siya nin marahay kan iitaas niya an saiyang mga kamot dangan pangenotan niya an mga pagsalakay sa mga syudad!

³Mayo nin siisay man na nakatindog laban saiya; sarong banal na gera an saiyang ipinaglaban para sa Kagurangnan.

⁴Giromdoma kun paano niya pinugol an paghiro kan aldaw asin pinahalawig an sarong aldaw na magin siring sa duwang aldaw.

⁵Nag-apod siya sa Kahorohalangkawe, an Makakamhan, kan palibotan siya kan mga kaiwal.

⁶Nagsimbag saiya an dakulang Kagurangnan sa paagi nin mga gapong yelo. An mga gapong yelong ini itinapok niya sa mga kaiwal asin ginadan niya sinda sa paglugsot sa Bet-Horon, tanganing mamidbidan kan mga nasyon kun gurano kakosog si Josue, huli ta nakikilaban ini bilang sarong banal na parasunod nin Kagurangnan.

⁷Nagin maimbod si Josue kan panahon ni Moises. Maimbod siya asin si Caleb na aking lalaki ni Jefunne. Nagtindog sinda laban sa bilog na katiriponan, pinugol an mga tawo sa pagkakasala asin pinaontok an maraot nindang paggurumod-gumod.

⁸An duwang ini iyo sana an natadang buhay hale sa seis syentos mil na mga Israelita na nagralakaw sa kalangtadan asin nakalaog sa mayaman saka matubang na daga na magigin pamana ninda.

⁹Pinakosog nin Kagurangnan si Caleb, asin kan gurang na siya, nakaduman pa siya sa mabulod na daga dangan sinakop idto para sa saiya asin para sa saiyang mga kapagarakian.

¹⁰Kaya nahiling kan bilog na Israel na marahay an magsunod sa Kagurangnan.

¹¹Dangan yaon man an mga hukom, na an lambang saro nagin bantog, na dai nanggad nagsamba sa mga dios-dios asin dai nanggad nagtalikod sa Kagurangnan.

¹²Galangan logod an saindang giromdom! An mga tawong ini na satong ginagalangan magkaigwa logod nin bagong buhay sa paagi kan saindang mga kapagarakian!

¹³Namotan nin Kagurangnan si Samuel. Bilang propeta nin Kagurangnan, pinakosog niya an kahadean asin nagbugtak siya nin mga pamayo para sa banwaan.

¹⁴Hinukoman niya an nasyon sosog sa Katogonan nin Kagurangnan, asin iningatan nin Kagurangnan an Israel.

¹⁵Huli kan kaimbodan ni Samuel, inako siya bilang sarong tunay na propeta. Nagsarig saiya an mga tawo bilang sarong parahula huli kan saiyang mga tataramon.

¹⁶Kan pinaghomaan siya kan saiyang mga kaiwal sa palibot niya, nag-apod siya sa Kagurangnan, an Makakamhan, asin nagdolot siya nin sarong pasusong kordero.

¹⁷Dangan nagdaguldol an Kagurangnan sa kalangitan, asin ipinadangog an saiyang makosog na tingog.

¹⁸Pinuho niya an mga pamayo kan mga taga Tiro saka Filistea.

¹⁹Kan naghihingagdan na si Samuel, nagtaram siya sa atubang nin Kagurangnan saka kan napiling hade na dai nanggad siya nagkua kan pagsadiri nin siisay man, maski sarong pades na sandalyas. Mayo nin nagsalungat saiya.

²⁰Kan gadan na siya, nagpropesiya pa siya ki Hadeng Saul kun paano ini magagadan. Nagtaram siya bilang sarong propeta hale sa lulubngan, tanganing paraon an karatan kan saiyang banwaan.