Read Central Bicolano Sirach 47 Bible Online

Sirach 47 - Central Bicolano bible

Sirach 47

¹An nagsunod saiya iyo si Natan, na sarong propeta kan panahon ni David.

²Siring na itinalaan para sa Kagurangnan an matabang kabtang kan dolot nin pakisumaro, siring man pinili si David hale sa kadaklan kan mga Israelita.

³Nakikawat siya sa mga leon saka mga oso na garo sanang nakikawat sa mga kordero saka mga kanding.

⁴Kan hoben pa siya, ginadan niya an sarong higante tanganing iligtas an saiyang banwaan. Nagbugtak siya nin sarong gapo sa saiyang lagpitaw, naghimonta dangan pinaontok an kapaabaw-abawan ni Goliat.

⁵Namibi siya sa Kagurangnan, an Kahorohalangkawe, asin tinawan siya nin kosog na magadan an bantog na soldados na idto, tanganing galangan kan mga nasyon an kapangyarihan kan saiyang banwaan.

⁶Ginalangan siya kan mga tawo huli sa paggadan niya nin sampolong ribo, dangan kan koronahan siya bilang hade, inomaw ninda siya huli ta siya an napili nin Kagurangnan.

⁷Pinuho niya an gabos niyang kaiwal asin rinonot niya an mga Filisteo, tanganing dai na nanggad sinda magin sarong homa sa katoninongan kan Israel.

⁸Sa gabos na ginibo ni David, nagpasalamat saka nag-omaw siya sa An Banal, an Kahorohalangkawe. Namotan niya an saiyang Kaglalang asin nag-awit siya nin mga pag-omaw sa saiya sa bilog niyang puso.

⁹Nagbugtak siya nin mga paraawit sa atubangan kan altar na maawit nin magagayon na musika.

¹⁰Itinalaan niya an panahon kan mga pyesta sa bilog na taon asin ginibo niyang magayon an mga selebrasyon na iyan; nag-aniningal an Templo sa bilog na aldaw huli sa mga kaomawan sa Kagurangnan.

¹¹Pinatawad nin Kagurangnan an kasalan ni David asin pinapusog niya an kapangyarihan kaini sagkod lamang. Naggibo an Kagurangnan nin sarong tipan ki David na mamuraway na maghahade si David asin an saiyang kapagarakian sa Israel.

¹²Inandam nin marahay ni David an dalan para sa saiyang aking lalaki, na sarong madonong na lalaki, tanganing mamayo sunod saiya.

¹³Dai nagkaigwa nin gera mantang naghahade si Solomon. An Dios an nagtao saiya nin katoninongan sa gabos niyang pagdolonan, tanganing ikapatindog niya an Templo para sa Kagurangnan, sarong Templo na magdadanay sagkod pa man.

¹⁴Madonong ka nin marahay, Solomon, kan ika hoben pa! Nakakaagid sa nagbabaha na Nilo an saimong pakaaram.

¹⁵An saimong mga kasabihan saka mga paukod nabantog sa gabos na lugar.

¹⁶Bantog ka sa gabos na lugar, asin namotan ka kan mga tawo huli kan dara mong katoninongan.

¹⁷Pinagngalasan ka kan mga nasyon huli kan saimong mga awit, mga talinhaga, mga parabola, asin mga madodonong na kasabihan.

¹⁸Nagtipon ka nin plata saka bulawan na garo ka sana nagtipon nin lata o timga. Ginibo mo gabos iyan sa ngaran nin Kagurangnan Dios nin Israel.

¹⁹Alagad an saimong sobrang pagmawot sa babae iyo an nagin dahelan kan saimong pagbagsak.

²⁰Dinigtaan mo an saimong onra saka an ngaran kan saimong mga kapagarakian. Sinda an nagtios kan padusa na bunga kan saimong kalolongan, na nagin dahelan kan saindang sobrang pagmondo.

²¹Huli kaiyan nabanga an nasyon, asin nagtunga an saro pang kahadean sa amihan na parte kan Israel.

²²Alagad danay na magigin maheherakon an Kagurangnan asin ootobon niya an gabos niyang panuga. Dai nanggad niya tutunawon an mga kapagarakian ni David, na saiyang pinili asin namoot saiya. Kaya huli sa Israel, itinugot niyang may matada sa pamilya ni David.

²³Nagadan si Solomon arog kan saiyang mga ginikanan asin an saro kan mga aki niyang lalaki iyo an nagsalihid saiya bilang hade. An lalaking ini iyo si Rehoboam, sarong lalaking kulang an pakasabot asin dakula an kalolongan, na an palakaw iyo an nagin dahelan kan pagrebelde kan mga tawo. Si Jeroboam na aking lalaki ni Nebat, iyo an nangenot sa amihan na parte kan Israel sa mga gaweng makasalan.

²⁴Nagkasala nin marahay an saiyang banwaan kaya itinapok sinda sa ibang daga.

²⁵Binalo ninda an manlaen-laen na klase nin karatan sagkod na binalos sinda nin Kagurangnan.