Read Central Bicolano Sirach 48 Bible Online

Sirach 48 - Central Bicolano bible

Sirach 48

¹Dangan nagtunga an maisog na propetang si Elias. An saiyang mga tataramon naglalaad siring sa sarong karaba.

²Dinarahan niya nin makuring gutom an mga tawo, asin an laad kan saiyang kaanggotan iyo an nagin dahelan kan pagkagadan kan dakul sa sainda.

³Nagtaram siya sa ngaran nin Kagurangnan, asin dai niya pinauran dangan tolong beses niyang pinahilig an kalayo.

⁴Elias, makangangalas an saimong mga milagro! Mayo nin siisay man na makakapag-orgulyo kan siring na gibo!

⁵Sa ngaran kan Kahorohalangkawe, binuhay mo an sarong gadan.

⁶An sarong bantog na hade dinarahan mo nin helang asin kagadanan.

⁷Sa Sinai, nadangog mo an pagtuyaw saimo nin Kagurangnan, asin an pagpahayag niya kan pagpadusa sa mga kaiwal niya.

⁸Ika an nagtalaga sa hade na magibo kan padusang idto. Ika man an nagtalaga sa propeta na masalihid saimo.

⁹Isinakat ka sa langit sa paagi kan nagkakalayong aripuros, sarong karwahe na pinagguguyod nin mga nagkakalayong mga kabayo.

¹⁰Nagtataram an kasuratan na andam kang magtunga sa itinalaan na panahon, tanganing palipoton an kaanggotan nin Dios bago magkalayo iyan. Sinasabi man sa kasuratan na pagsasaroon mo giraray an mga ama saka mga aki, asin titiponon mo giraray an mga tribu nin Israel.

¹¹Mapalad an mga makakahiling kan saimong pag-abot, siring man an mga nagadan sa pagkamoot, huli ta kita man mabubuhay.

¹²Kan itinago si Elias kan aripuros, an saiyang espiritu nakapano ki Eliseo. Kaya mantang nabubuhay si Eliseo, dai siya natakot sa mga pamayo, asin mayo nin nakapasuko saiya.

¹³Mayo nin dipisil para ki Eliseo. Kaya maski kan gadan na siya, nagmilagro pa an saiyang bangkay.

¹⁴Magin kan buhay pa siya asin kan gadan na, naggibo siya nin makangangalas na mga milagro.

¹⁵Alagad minsan siring, dai nagsolsol an mga tawo asin dai ninda tinalikodan an saindang mga kasalan, sagkod na binihag sinda saka iwinarak sa bilog na kinaban. Kadikit sanang tawo an natada, alagad an mga ini pinamayohan kan mga kapagarakian ni David.

¹⁶An nagkapira sa mga tawo naggibo kan nawiwilihan nin Kagurangnan, alagad an iba nagpadagos sa pagkasala.

¹⁷Inandam ni Ezekias an saiyang syudad tanganing dai masakop kan kaiwal. Tinagamahan niya iyan nin tubig sa paagi nin paggibo nin labot sa gapo; naggamit siya nin mga lansang na kagamitan sa paggibo kaiyan asin nagpatindog siya nin mga tangke nin tubig.

¹⁸Kan panahon nin saiyang paghahade, sinalakay ni Senacherib an syudad asin sinugo kaini an pangenot niyang opisyal hale sa Lakis. Inangat kan opisyal na ini an Jerusalem asin nagparahambog.

¹⁹An mga tawo nawaraan nin kosog nin boot asin nagtarakig sa takot; sobra an saindang namatean na kulog, arog sa sarong babaeng nangangaki.

²⁰Alagad namibi sinda sa maheherakon na Kagurangnan, An Banal na nasa langit, na tolos na nagsimbag kan saindang mga pamibi; sinugo nin Kagurangnan si Isaias tanganing iligtas sinda.

²¹Hinampak nin Kagurangnan an kampo kan mga taga Asiria; pinuho an mga ini kan anghel nin Kagurangnan.

²²Ginibo ni Ezekias an nawiwilihan nin Kagurangnan asin sinunod niya nanggad an paarog kan saiyang ginikanan na si David. Iyo ini an ipinagboot kan propetang si Isaias, na an mga bisyon saiyang tinubod.

²³Pinabalik ni Isaias an dalagan kan aldaw asin pinahalawig an buhay kan hade.

²⁴Rinanga niya an mga nagmomondo sa Jerusalem sa paagi kan espiritu nin kapangyarihan na ginamit niya tanganing mahiling an maabot na panahon.

²⁵Naghula siya kun ano an mangyayari bago umabot an kataposan kan panahon, an mga natatagong mga bagay na dai pa nangyayari.