Read Central Bicolano Sirach 49 Bible Online

Sirach 49 - Central Bicolano bible

Sirach 49

¹An giromdom ni Josias nakakaarog kan hamot nin insenso na hinalo kan sarong ekspertong paragibo nin pahamot, arog kan mahamis na dugos, arog kan tugtog sa sarong bangkete nin arak.

²Sinunod niya an tamang palakaw sa pagbago kan nasyon asin hinale niya an makakauyam na mga dios-dios.

³Nagin maimbod siya sa Kagurangnan asin pinakosog niya an totoong relihiyon sa panahon na idto nin karatan.

⁴Pwera ki David, ki Ezekias, asin ki Josias, an gabos na hade nagin mga parakasala, huli ta tinalikodan ninda an Katogonan kan Kahorohalangkawe sagkod sa kataposan kan saindang paghahade.

⁵Itinao ninda an saindang kapangyarihan saka onra sa mga dayuhan,

⁶na nagsulo kan banal na syudad asin nagpamondo kan mga tinampo, siring sa propesiya ni Jeremias.

⁷Pinasakitan ninda si Jeremias, maski siya an napiling propeta bago siya namundag, “tanganing maggabot asin magrumpag, magraot asin magbagsak,” dangan “tanganing magpatindog saka magtanom.”

⁸Si Ezekiel an nakahiling kan bisyon kan langitnon na kamurawayan sa ibabaw kan karwahe saka kan buhay na mga linalang.

⁹Nasambit man niya an propetang si Job, an lalaking danay na naggibo kan matanos.

¹⁰Magbangon logod an mga tolang kan doseng propeta asin magkaigwa nin bagong buhay, huli ta pinakosog ninda an boot kan mga Israelita dangan ilinigtas sinda na may masarig na paglaom.

¹¹Anong pag-omaw an gigibohon ta para ki Zerubabel? Nakakaagid siya sa sarong singsing na panselyo sa toong kamot nin Kagurangnan,

¹²arog ki Josue na aking lalaki ni Jehozadak. Sinda an nagpatindog giraray kan banal na Templo nin Kagurangnan, na inandam para sa mayong tapos na kamurawayan.

¹³Dakula man an giromdom ni Nehemias. Pinatindog niya giraray an gabang mga kudal nin Jerusalem dangan binugtakan nin mga trangkahan saka mga barat. Pinatindog niya giraray an samong mga harong.

¹⁴Mayo nin tawong nabuhay sa ibabaw nin daga na makakaarog ki Enoc, huli ta isinakat siya sa langit hale sa daga.

¹⁵Mayo nin tawong namundag na makakaarog ki Jose; ginalangan maski an saiyang mga tolang.

¹⁶Ginalangan man si Sem asin si Set sa tahaw nin katawohan, alagad nangongorog an kamurawayan ni Adan sa ibang may buhay.