Read Central Bicolano Sirach 5 Bible Online

Sirach 5 - Central Bicolano bible

Sirach 5

¹Dai kamo magsarig sa kwarta, na garo baga huli kaiyan dai na nindo kaipuhan an ibang tawo.

²Dai kamo mag-isip na kaipuhan igwa kamo kan gabos na bagay na saindong mawoton, dangan uboson nindo an saindong kosog sa pagkua kaiyan.

³Dai kamo mag-isip na mayo nin siisay man na mas halangkaw an awtoridad ki sa saindo, huli ta papadusahan nanggad kamo nin Kagurangnan.

⁴Dai kamo mag-isip na pwede kamong magkasala dangan dai kamo papadusahan, huli ta an Kagurangnan makakahalat bago kamo padusahan.

⁵Dai kamo magsarig na papatawadon kamo nin Kagurangnan, kaya orog nindong dinadagdagan an saindong mga kasalan.

⁶Dai kamo mag-isip na dakula nin marahay an saiyang pagkaherak kun kaya papatawadon niya an saindong mga kasalan gurano man kadakul. Totoong naheherak siya, alagad naanggot siya sa mga parakasala.

⁷Maghidali kamo sa pagbalik sa Kagurangnan. Dai kamo mag-isip na pwede nindong gibohon iyan sa mga masurunod na aldaw; huli ta hidali sanang madatong saindo an kaanggotan nin Kagurangnan, asin magagadan kamo sa saiyang pagpadusa.

⁸Dai kamo magsarig sa kayamanan na hinabonan; mayo iyan nin karahayan na idodolot saindo sa aldaw nin kasakitan.

⁹Magin pusog kamo sa saindong tinutubod asin magin maimbod kamo sa saindong itinataram. Dai kamo maghingowang mapaogma an gabos na tawo, ni mag-oyon sa gabos nindang sinasabi.

¹¹Danay kamong magin andam sa pagdangog, alagad maluway sa pagsimbag.

¹²Magsimbag sana kamo kun aram nindo an saindong sasabihon, alagad mag-alo kamo kun dai nindo aram.

¹³An pagtaram pwedeng magdara nin onra o kasosopgan; pwedeng mapahamak kamo huli kan saindong sinasabi.

¹⁴Hare nindo paghanapa an dangog nin sarong parapakaraot, asin dai kamo maggibo nin mga istorya na ikakakulog nin tawo. An mga parahabon mawawaraan nin onra; an mga putikon kokondenaron nanggad.

¹⁵Dai nanggad kamo maggibo nin anoman na makakaraot, sadit man na bagay iyan o dakula;