Read Central Bicolano Sirach 50 Bible Online

Sirach 50 - Central Bicolano bible

Sirach 50

¹An lider kan saiyang mga tugang saka orgulyo kan saiyang banwaan iyo si Simon, an Halangkaw na Padi, na aking lalaki ni Onias, na naghirahay kan Templo

²asin nagbugtak kan pundasyon para sa halangkaw saka dobleng kudal dangan kan mga bantayan kan Templo.

³Kan panahon niya, kinalot an sarayan nin tubig, na arog kadakula sa bronseng tangke.

⁴Nagplano siya na iligtas sa kapahamakan an saiyang banwaan, asin pinapusog niya an syudad tanganing makatagal iyan sa pagsalakay nin mga kaiwal.

⁵Mamuraway siyang marahay kan magluwas siya sa Kabanal-banaleng Lugar!

⁶Arog siya sa makaagang bitoon na nagliliwanag sa tahaw kan mga panganoron, arog sa bulan kun kabilogan kaiyan,

⁷arog sa aldaw na nagliliwanag sa Templo kan Kahorohalangkawe, arog sa bulalangaw na nagkikinang sa mamuraway na mga panganoron,

⁸arog sa mga burak na rosas pakatapos kan tig-init, arog sa mga liryo sa pangpang nin sarong sapa, arog sa mga sedro nin Lebanon kun tig-init,

⁹arog sa natututong na insenso, arog sa sarong kalis na gibo sa pinulpog na bulawan asin nasasamnohan nin manlaen-laen na mamahalon na bato,

¹⁰arog sa poon nin oliba na pano nin bunga, arog sa sarong kahoy na sipres na an langkaw nakakaabot sa mga panganoron.

¹¹Kan isulot ni Simon an mamuraway niyang gubing dangan magsakat siya sa banal na altar na nakagubing nin mayong kaninan na kagayonan, an patyo kan Templo nagin sarong magayon na tanawon.

¹²Dangan kan itao saiya kan mga padi an mga kabtang kan sakripisyo mantang nakatindog siya sa kataed kan altar kaiba kan saiyang mga katabang, nakaarog siya sa sadit na poon nin sedro nin Lebanon na napapalibotan kan mga poon nin palma.

¹³Iyo idto an mga kamaganakan ni Aaron na nagugubingan nin mamahalon na gubing, na nagtitindog sa atubang kan bilog na katiriponan nin Israel, kapot an mga dolot para sa Kagurangnan.

¹⁴Pakatapos na maglingkod sa altar asin mapakarahay an sakripisyo para sa Kahorohalangkawe, an Makakamhan,

¹⁵inabot niya an kalis dangan nag-ula siya nin mahamot na arak sa pamitisan kan altar bilang dolot para sa Kahorohalangkawe, an Hade kan bilog na kinaban.

¹⁶Dangan nagkurahaw an mga padi asin pinatanog an saindang mga trompeta na gibo sa pinulpog na plata. Sarong makosog na ribok an ginibo ninda tanganing madangog kan Kahorohalangkawe.

¹⁷Nagduruko tolos kan saindang mga payo an mga tawo sa pagsamba sa saindang Kagurangnan, an Makakamhan, an Kahorohalangkawe.

¹⁸Dangan an koro nagpoon sa pag-awit nin mga pag-omaw asin nadangog an magayon na awit.

¹⁹Padagos sa pagpamibi an mga tawo sa maheherakon na Kagurangnan, an Kahorohalangkawe, sagkod na natapos an pagsamba sa Kagurangnan.

²⁰Dangan naglusad si Simon hale sa altar, itinaas an saiyang mga kamot sa bilog na katiriponan nin Israel tanganing itao an bendisyon hale sa Kagurangnan,

²¹mantang sa ikaduwang beses, nagduko kan saindang mga payo an mga tawo sa pag-ako kan bendisyon hale sa Kahorohalangkawe.

²²Asin ngunyan, omawa nindo an Dios kan kinaban, an kaggibo nin darakulang bagay saen man na lugar, an naglalangkaw sato poon pa kan mamundag kita, asin naheherak sato.

²³Itao logod sato an kaogmahan asin tugotan kitang magkaigwa nin katoninongan sa Israel sagkod pa man.

²⁴Padagos logod na maherakan niya kita asin iligtas sa panahon nin pangangaipo.

²⁵Igwang duwang nasyon na kinauuyaman ko, asin ikatolo na dai ngani maninigong apodon na sarong nasyon.

²⁶An mga ini iyo an mga Edomita, an mga Filisteo, asin an mga mangmang na mga Samaritano.

²⁷Ako, si Jesus na aking lalaki ni Sirac Eleazar na taga Jerusalem, an nagsurat sa librong ini kan gabos kong kadonongan tanganing magtukdo saka magpasabot para sa iba.

²⁸Bendisyonan logod nin Dios an siisay man na magtao nin panahon sa mga katukdoan na ini. An siisay man na magtoom kaini magigin madonong.

²⁹An siisay man na magkuyog kaini magigin makosog sa gabos na bagay, huli ta maglalakaw siya sa liwanag nin Kagurangnan.