Read Central Bicolano Sirach 51 Bible Online

Sirach 51 - Central Bicolano bible

Sirach 51

¹Nagpapasalamat ako saimo, O Kagurangnan asin Hade; inoomaw taka bilang Dios ko asin Kagligtas. Nagpapasalamat ako saimo,

²huli ta tinabangan asin iningatan mo ako. Ilinigtas mo ako sa kagadanan, sa mga kaputikan asin sa mga pakaraot.

³Tinabangan mo ako kan mayo nin minatabang sako; sa saimong dakulang pagkaherak ilinigtas mo ako sa kadakul na kasakitan na sakong naaraman: sa naglalaad na kaanggotan kan sakong mga kaiwal, na boot na tumapos kan sakong buhay;

⁴sa nakakapoot na aso nin pang-aapi na nag-iitaas hale sa mga kalayo na bako ako an nagmakot;

⁵sa kagadanan mismo; sa mga pakaraot na ipinaabot sa hade.

⁶Pinaatubang ako kaidto sa kagadanan;

⁷saen man na lugar, pinalibotan ako kan mga kaiwal. Naghanap ako nin makakatabang sako, alagad mayo, maski saro.

⁸Dangan nagiromdoman ko, O Kagurangnan, kun gurano ka kamaheherakon asin kun ano an saimong ginibo kan nakaaging mga panahon. Nagiromdoman ko na ilinigtas mo an mga tawong nagsasarig saimo; ilinigtas mo sinda sa mga kaiwal ninda.

⁹Dangan hale digdi sa daga, namibi ako saimo tanganing iligtas mo ako sa kagadanan.

¹⁰Namibi akong, “O Kagurangnan, ika an sakong ama; hare ako pagpabayae sa sakong mga kasakitan, sa panahon na mayo akong nagigibo laban sa mapalangkaw na mga kaiwal.

¹¹Danay akong mag-oomaw saimo asin mag-aawit nin mga awit nin pasasalamat.” Sinimbag mo an sakong pamibi,

¹²asin ilinigtas mo ako sa naghahalat na kapahamakan. Kaya nagpapasalamat asin nag-oomaw ako saimo. O Kagurangnan, nag-oomaw ako saimo!

¹³Kan ako hoben pa, bago ako nagpoon sa sakong mga pagbyahe, danay akong namibi na magkaigwa nin Kadonongan.

¹⁴Nagduman ako sa Templo asin hinanap ko siya, asin hahanapon ko siya sagkod na ako may buhay.

¹⁵Magpoon na magsoltero ako sagkod na maggurang, an Kadonongan an danay kong nawilihan. Poon kan ako hoben pa, danay akong nagsunod kan saiyang dalan.

¹⁶Nakamtan ko tolos an Kadonongan magpoon kan maghinanyog ako saiya, asin binalosan ako nin dakulang pakaaram.

¹⁷Danay akong nagin sarong paraadal asin nagpapasalamat ako sa gabos na nagin paratukdo ko.

¹⁸Naghingowa akong mamuhay sosog sa kadonongan asin idinusay ko an sakong buhay para sa katanosan. Mayo ako nin anoman na pagbasol.

¹⁹Nakilaban ako para sa Kadonongan asin nagin estrikto sa sakong gawe. Kan namibi ako, mamondong ikinumpisal ko na dai ko pa talaga midbid an Kadonongan.

²⁰Alagad tudok sa boot ko na mapasako an Kadonongan, asin nakua ko siya huli sa paglikay sa kasalan. Nagtalubo ako sa Kadonongan poon pa kan makua ko siya, asin magigin danay ko siyang kaiba.

²¹Nagin dakula an sakong balos, huli ta nagkaigwa ako kan kamawotan na hanapon siya.

²²Tinawan ako nin Kagurangnan kan regalo sa pagtaram, asin ginamit ko iyan sa pag-omaw saiya.

²³Madya kamo sako, kamong nangangaipong tukdoan, asin mag-adal kamo sa sakong eskwelahan.

²⁴Tano ta sinasabi nindong mayo kamo nin naaaraman? Tadaw ta mayo man kamong ginigibo dapit kaiyan?

²⁵Ini an sinasabi ko: Mayong bayad an magin madonong.

²⁶Pasanon nindo an sakal, asin magin andam kamo sa pag-adal. An oportunidad danay na harani.

²⁷Hilinga nindo an nangyari sako! Bakong maigot nanggad an ginibo kong pag-aadal, alagad nakakua ako nin dakulang kapahingaloan.

²⁸Dai nindo pag-isipon an halaga tanganing magin madonong, huli ta sobra pa diyan an mabalik saindo.

²⁹Maogma kamong magpasalamat sa Kagurangnan huli kan saiyang pagkaherak, asin dai nanggad nindo ikasopog an pag-omaw saiya.

³⁰Giboha nindo an saindong katongdan sa tamang panahon, asin tatawan kamo nin Kagurangnan kan saindong balos, sa pinaghohona niyang tamang panahon.