Read Central Bicolano Sirach 6 Bible Online

Sirach 6 - Central Bicolano bible

Sirach 6

¹dai kamo magin sarong kaiwal kundi sarong katood. Dinadara saindo kan maraot na dangog an kawaraan nin onra na maninigo sa mga putikon na parakasala.

²Dai kamo magpadaog sa saindong mga kamawotan, ta tibaad peredasohon kaiyan an saindong kalag arog sa sarong torong baka.

³Babayaan kamong arog sa sarong gadan na kahoy na mayong dahon o bunga.

⁴An maraot na kamawotan iyo an mapahamak saindo asin magigin kamong ngingisihan kan saindong mga kaiwal.

⁵Kun ika sarong tawong magalang, magkakaigwa ka nin dakul na katood.

⁶Makipagtoninong ka sa dakul na tawo, alagad kuahon mo sana an saro hale sa sangribo bilang saimong parahatol.

⁷Kun nakikipagkatood ka, dai ka maghidali sa pagtiwala saiya; baloon mo ngona kun pwede siyang pagkatiwalaan.

⁸Huli ta igwa nin katood na katood mo sana kun nagkikinabang siya, alagad dai siya masurog saimo kun ika nasa kasakitan.

⁹Igwa man nin katood na nagigin sarong kaiwal, asin minabuyagyag kan saindong pinagpasuhayan na magigin dahelan kan kasosopgan mo.

¹⁰Igwa pa nin katood na danay mong kaiba sa pagkakan mantang marahay an kamugtakan mo; garo siya anino mo asin nagtatao man nin mga pagboot sa saimong mga sorogoon, alagad dai malalaoman sa panahon nin kasakitan.

¹²Kun orog na magraot an saimong kamugtakan, sasalungaton ka niya, asin dai mo na siya mahihiling pa.

¹³Likayan mo an saimong mga kaiwal asin magmaan ka sa atubang kan saimong mga katood.

¹⁴An sarong maimbod na katood nakakaagid sa sarong ligtas na pailihan: an nakakakua nin sarong arog saiya, nakakakua nin kayamanan.

¹⁵Mayo na nin makakaorog pa sa sarong maimbod na katood; mayo nin paagi tanganing bugtakan nin halaga an siring na tawo.

¹⁶An sarong maimbod na katood nakakaagid sa sarong bolong na nagpapadanay kan marahay mong hawak. An may pagkatakot sana sa Kagurangnan an nakakakua nin siring na katood.

¹⁷An sarong tawo na may pagkatakot sa Kagurangnan makakakua nin tunay na mga katood, huli ta mamomotan niya sinda arog kan pagkamoot niya sa saiyang sadiri.

¹⁸Aki ko, pahalagahan mo an Kadonongan mantang aki ka pa, asin padagos na makukua mo siya paggurang mo.

¹⁹Magmaigot ka sa paghanap sa Kadonongan arog sa sarong paraoma na maigot na nag-aarado saka nagtatanom; dangan makakalaom ka nin marahay na ani. Sa kadikit na panahon, totoong magtatrabaho ka, alagad dai mahahaloy, mag-oogma ka sa saimong makukua.

²⁰Sa mga mayong disiplinang tawo, an mga kahagadan nin Kadonongan masakit nin marahay asin mayo sinda kan kosog nin boot na magpadagos tanganing masunod an mga iyan.

²¹An mga kahagadan nin Kadonongan orog na magabat ki sa boot nindang darahon, kaya hidali nindang itinatapok an mga iyan.

²²Huli ta an Kadonongan nakakaarog sa saiyang ngaran, asin bakong nahahayag sa kadaklan.

²³Aki ko, paghinanyog sako asin giboha an sakong hatol.

²⁴Gakodan an kadena nin Kadonongan sa saimong bitis asin bugtakan sa saimong liog an saiyang sakal.

²⁵Pasana siya sa saimong abaga asin dai ka magreklamo nin huli sa saiyang mga gakod.

²⁶Sunoda an Kadonongan asin magdanay ka sa saiyang mga dalan sa bilog mong puso.

²⁷Hanapa siya, asin ipapahayag niya an saiyang sadiri sa saimo. Mamugol ka saiya asin dai mo siya pagbutasan.

²⁸Dangan maaaraman mo an katoninongan nin isip na dolot niya, saka magigin kaogmahan mo siya.

²⁹Dangan magigin sarong makosog na depensa mo an saiyang mga kadena asin sarong magayon na gubing an saiyang sakal.

³⁰An saiyang sakal magigin sarong bulawan na alahas asin an saiyang mga gakod magigin laso nin kamahalan.

³¹Isusulot mo an Kadonongan siring sa sarong magayon na korona.

³²Aki ko, makakanood ka kun boot mo. Pwede kang magin listo kun maghingowa ka.

³³Kun boot mong maghinanyog, makakanood ka asin magigin madonong.

³⁴Magduman ka sa pinagtitiriponan kan mga gurang; hanapon mo an sarong lalaking madonong, dangan mag-iba ka saiya.

³⁵Magin andam ka sa paghinanyog kun nagtataram an mga diosnon na tawo, asin dai ka magtugot na dai mo makua an mga talinhaga na pano nin kadonongan.

³⁶Kun manumpongan mo na an sarong lalaking may pakasabot, amay kang magbangon tanganing dalawon siya; dai ka mag-ontok sa pagdalaw saiya.

³⁷Gamita an gabos mong panahon sa pag-adal saka sa paghorophorop sa mga kabotan nin Kagurangnan. Siya an matao saimo nin pakasabot asin kadonongan na hinahanap mo.