Read Central Bicolano Sirach 7 Bible Online

Sirach 7 - Central Bicolano bible

Sirach 7

¹Kun dai ka maggibo nin sala, mayong maraot na maabot saimo.

³Dai mo pag-aradohon an daga tanganing tanoman kan banhi nin inhustisya ta tibaad mag-ani ka nin labi pa sa linalaom mo.

⁴Dai mo paghagadon sa Kagurangnan an pinakahalangkaw na katongdan ni an tukawan nin kaomawan sa hade.

⁵Dai mo ipagpirit sa Kagurangnan an saimong katanosan o ipagpahiling an saimong kadonongan sa atubang kan hade.

⁶Dai ka mag-ambisyon na magin sarong hukom, ta tibaad dai mo mahale an karatan, o tibaad palaenon mo an sarong dakulang tawo; mararaot kaiyan an saimong dangog.

⁷Dai ka maggibo nin krimen laban sa mga tawo, asin hare paghalea an saimong onra sa tahaw kan saimong mga kahimanwa.

⁸Dai mo na pag-uliton an parehong kasalan. Tama na an padusa na napasaimo sa enot mong pagkasala.

⁹Dai ka maghona na bibilangon kan Kahorohalangkaweng Dios an dakul na regalong itinao mo, kun kaya aakoon man niya an anoman na dolot na itao mo.

¹⁰Dai ka mag-ontok sa pagpamibi, asin dai ka magpabaya sa pagtao nin limos sa mga dukha.

¹¹Dai mo pagngisihan an sarong tawong napasopog. An Kagurangnan iyo an minapaibaba sa sarong tawo, alagad siya man giraray an minapalangkaw sa tawong iyan.

¹²Dai ka mag-isip nin kaputikan na ioosip mo dapit sa saimong mga katood.

¹³Dai ka nanggad magputik. Mayong karahayan na makukua diyan.

¹⁴Sa katiriponan kan mga gurang, dai ka magparataram kan mayo nin halaga. Dai ka man magparaulit-ulit kun namimibi ka.

¹⁵Dai ka maongis sa magabat na trabaho o sa pag-oma; an Kahorohalangkawe an nagtao sato kan mga iyan.

¹⁶Dai ka mag-apil sa katiriponan nin mga parakasala; giromdoma na madatong nanggad an padusa nin Kagurangnan.

¹⁷Magin mapakumbaba ka, huli ta an pagkalapa sa kagadanan iyo an naghahalat sa sato gabos.

¹⁸Dai mo ipagpasaluib an saimong katood huli sana sa kwarta. Dai mo ipagpasaluib an sarong tunay na katood maski pa an gabos na bulawan sa kinaban an karibay kaiyan.

¹⁹Hare pagpalihisa an oportunidad na makaagom ka nin sarong madonong saka marahay na babae. An maugayon na agom mahalaga pa ki sa bulawan.

²⁰Dai mo pag-abusohon an sarong sorogoon na naggigibo sa kaimbodan kan saiyang trabaho, o an sarong nagpapatandan na marahay an pagtrabaho para saimo.

²¹Kamotan mo an sarong madonong na sorogoon siring kan pagkamoot mo sa saimo man sana, asin dai mo ipagsayuma saiya an saiyang katalingkasan.

²²Atamana nin marahay an anoman na hayop na sadiri mo. Kun pinagkakwartahan mo sinda, dai mo ipagpabakal.

²³Kun igwa ka nin mga aking lalaki, tukdoan mo sinda. Tukdoan mo sinda kan pagpupugol sa sadiri mantang mga aki pa sinda.

²⁴Kun igwa ka nin mga aking babae, padanaya sindang mabini; dai ka magpahiling nin sobrang pagpadaba.

²⁵Kun ipaagom mo na an saimong aking babae, natapos mo na an sarong dakulang trabaho, alagad itao mo siya sa sarong lalaking may pakasabot.

²⁶Kun igwa ka nin marahay na agom, dai mo siya pagsuhayan, alagad dai mo ipagdusay an saimong sadiri sa sarong dai mo namomotan.

²⁷Galangan mo an saimong ama sa bilog mong puso, asin dai mo nanggad paglingawan an pagtios kan saimong ina kan ika ipinangaki niya.

²⁸Giromdoma na utang mo an saimong buhay sa sainda. Paano mo mababayadan an gabos na ginibo ninda para saimo?

²⁹Matakot ka sa Kagurangnan sa bilog mong puso, asin galangan mo an saiyang mga padi.

³⁰Kamotan mo an saimong Kaglalang sa bilog mong kosog, asin dai mo ipagsikwal an saiyang mga ministro.

³¹Matakot ka sa Kagurangnan asin galangan mo an mga padi. Itao mo sa sainda an ipinagboot saimong dapat mong itao: an enot na inani, an dolot para sa kasalan, an abaga kan hayop na isinakripisyo—an gabos na hinahagad na sakripisyo saka dolot.

³²Tabangan mo an mga dukha, asin itatao nin Kagurangnan saimo an kapanoan nin bendisyon.

³³Magin matinao ka sa lambang nabubuhay, asin magin maugay ka sa paggiromdom sa mga gadan na.

³⁴Makidamay ka sa mga nawaraan kan mahal ninda sa buhay, asin makiiba ka sa pagmondo ninda.

³⁵Dai ka magduwa-duwa sa pagsongko sa naghehelang, huli ta sa siring na mga gibo mamomotan ka.

³⁶Sa gabos mong gibo, giromdoma na madatong an aldaw na ika magagadan. Mantang nagigiromdoman mo ini, dai ka nanggad magkakasala.