Read Central Bicolano Sirach 8 Bible Online

Sirach 8 - Central Bicolano bible

Sirach 8

¹Dai ka makipasuhay sa sarong mapangyaring tawo, ta tibaad mahulog ka sa saiyang kapangyarihan.

²Dai ka makiiwal sa sarong mayaman na tawo; pwede siyang magsuhol nin mga tawo tanganing pakaraoton ka. Dakul nang tawo an naraot saka mga hade na nabirik an isip huli kan bulawan.

³Dai ka makipasuhay sa tawong sobra kun minataram; dinadagdagan mo sana an gatong kan saiyang kalayo.

⁴Dai ka magkalwag sa sarong maraot an gawe, ta tibaad mawaraan nin onra an saimong mga ginikanan.

⁵Dai mo pagtuyawon an tawong nagbabakle na sa pagkakasala. Giromdoma na gabos kita maninigong padusahan.

⁶Dai mo pagmenoson an sarong gurang na, huli ta naggugurang na man an nagkapira sa sato.

⁷Dai mo ipag-ogma an kagadanan nin sarong tawo; giromdoma na gabos kita kaipuhan na magadan.

⁸Dai mo ipagsikwal an itinaram kan mga madonong, huli ta makakanood ka sa sainda nin katukdoan asin kun paano an paglingkod sa dakulang mga tawo.

⁹Dai mo ipagsikwal an itinaram kan mga gururang na, huli ta sinda mismo nakanood sa mga nagkaerenot sa sainda. Makakanood ka sainda, asin matutukdoan ka ninda kun paano an pagsimbag kun kaipuhan.

¹⁰Dai mo pagtawan nin oportunidad na orog na magkasala an sarong parakasala. Pwedeng ika man sana an makulogan; arog iyan kadali kan pagkapaso mantang ginagatongan an kalayo.

¹¹Dai ka magtindog dangan magbaya sa sarong tawo na sobra an kapaabaw-abawan ta tibaad baliktadon niya an saimong mga tataramon asin gamiton iyan laban saimo.

¹²Dai ka magpasubli nin anoman sa sarong tawo na orog na mapangyari ki sa saimo. Kun gibohon mo iyan, mas marahay pang ibilang mo na sanang nawara iyan.

¹³Dai ka maggarantiya sa pag-utang nin ibang tawo na an halaga orog pa ki sa kaya mong bayadan. Kaipuhan andam ka sa pagbayad kan siring na garantiya.

¹⁴Dai mo pagsangatan nin kaso an sarong hukom, huli ta manggagana siya huli kan saiyang katongdan.

¹⁵Dai ka makiiba sa sarong tawo na dai nag-iingat; mayo kang makukuang karahayan diyan kundi kapahamakan. Magibo siya kan gustohon niyang kalolongan, asin magagadan kang kaiba niya.

¹⁶Dai ka makipagdiskutiran sa kiisay man na mainiton an payo o magduman sa arin man na lugar na kamo sanang duwa. An kadahasan mayong halaga sa saiya, asin sasalakayon ka niya kun mayo nin siisay man na makakatabang saimo.

¹⁷Dai ka maghagad nin hatol sa sarong mangmang huli ta dai niya mahihilom an itinaram mo saiya.

¹⁸Dai ka maggibo nin anoman na dapat hilomon sa atubang nin sarong tawo na bako mo midbid, huli ta dai mo aram kun ano an mangyayari sa panahon na gibohon mo iyan.

¹⁹Dai mo ipagpahayag sa kiisay man an pinakatago mong kaisipan. Kun gibohon mo iyan, marahay pang itapok mo na man an oportunidad na mag-ogma ka sa maabot na panahon.