Read Central Bicolano Sirach 9 Bible Online

Sirach 9 - Central Bicolano bible

Sirach 9

¹Dai mo pag-imonan an saimong agom na babae na saimong namomotan. Tutukdoan mo sana siya kun paano ka niya papasakitan.

²Dai mo ipaghunod an saimong onra sa kiisay man na babae.

³Likayan mo an mga agom nin ibang mga lalaki, ta tibaad mahulog ka sa saindang mga siod.

⁴Dai ka makiiba sa mga babaeng paratugtog; dadayaon ka ninda.

⁵Likayan mo an paghiling nin maigot sa sarong birhen, ta tibaad mapiritan kang magbayad kan dote nin sarong nobya.

⁶Dai ka magpakalolong sa mga maraot na babae, ta tibaad mawara an gabos mong pagsadiri.

⁷Kaya dai ka maglagalag sa mga tinampo o maglibot sa mga kabtang kan banwa na dai na pinagdudumanan kan mga tawo.

⁸Kun makahiling ka nin sarong magayon na babae, maghiling ka sa ibang direksyon. Dai mo pag-isipon an kagayonan nin sarong babae na bako mong agom. Dakul nang lalaki an nalagalag huli sa gayon nin sarong babae. Iyan an minapagkot sa kamawotan na garo kalayo.

⁹Dai ka magkakan sa kaibahan kan agom nin sarong lalaki o makipag-inoman sa saiya, ta tibaad masugotan ka dangan maraot huli kan saimong kamawotan.

¹⁰Dai mo nanggad ipagsikwal an haloy mo nang katood; dai ka na nanggad makakakua nin sarong bagong katood na makakaarog sa saiya. An pakikipagkatood nakakaagid sa arak; orog na nagigin managom iyan mantang naghahaloy.

¹¹Dai ka maara sa kauswagan nin sarong parakasala; dai mo aram kun anong kapahamakan an inandam para saiya.

¹²Dai ka maogma sa mga bagay na nawiwilihan kan mga bakong diosnon; giromdoma na dai sinda pawawaraan nin sala mantang sinda nabubuhay.

¹³Likayan mo an tawong may kapangyarihan sa paggadan, asin dai ka mahahadit huli sa katakotan nin kagadanan. Alagad kun kaipuhan na magharani ka saiya, mag-ingat ka nin marahay, ta tibaad gadanon ka niya. Pakaaramon mo na naglalakaw ka sa tahaw nin mga siod, asin ika sarong masayon na patamaan.

¹⁴Midbidon mo nin marahay an mga tawong nasa palibot mo, asin maghagad ka nin hatol sa mga madonong sana.

¹⁵Makipag-olay ka sa mga tawong may inadalan, asin an Katogonan kan Kahorohalangkawe iyo logod an saindong magin tema nin pag-oolay.

¹⁶An mga matanos na tawo an pilion mong magin kaiba sa pagkakan, asin an pagkatakot sa Kagurangnan iyo an magin pangenot mong orgulyo.

¹⁷Inoomaw an sarong ekspertong trabahador huli kan mga bagay na saiyang ginigibo, asin an Kadonongan nin pamayo napapatunayan huli kan saiyang tataramon.

¹⁸An naghihidali asin mayong ingat sa pagtaram natatakotan asin naoongisan kan gabos na namamanwaan.