Read Central Bicolano Isaiah 12 Bible Online

Isaiah 12 - Central Bicolano bible

Isaiah 12

¹Maabot an aldaw na maawit an mga tawo, “Magpapasalamat ako saimo, Kagurangnan! Anggot ka sako kaidto, alagad rinanga mo ako ngunyan asin bako ka nang anggot sako.

²An Dios an sakong kaligtasan; magsasarig ako saiya asin dai matatakot, huli ta an Kagurangnan Dios iyo an sakong kosog asin awit; siya an sakong nagin kaligtasan.”

³Sa kaogmahan, an mga tawo maharok nin tubig sa mga bubon nin kaligtasan.

⁴Dangan maawit sinda sa aldaw na iyan: “Magpasalamat kamo sa Kagurangnan! Mag-apod kamo sa saiyang ngaran; ibalangibog nindo sa mga nasyon an saiyang mga gibo, ipahayag nindo an saiyang kadakulaan!

⁵Mag-awit kamo nin mga pag-omaw sa Kagurangnan, huli kan dakulang mga bagay na saiyang ginibo; ini saindong ibareta sa bilog na kinaban.

⁶Magkurahaw asin mag-awit kamo sa kaogmahan mga nag-eerok sa Sion, huli ta dakula an banal na Dios nin Israel, asin nag-eerok siya sa kaibahan kan saiyang banwaan.”