Read Central Bicolano Isaiah 14 Bible Online

Isaiah 14 - Central Bicolano bible

Isaiah 14

¹Maheherakan giraray nin Kagurangnan an saiyang banwaan nin Israel asin pipilion niya sinda bilang saiyang sadiri. Tutugotan niya sindang mag-erok giraray sa saindang daga, asin maabot an mga dayuhan dangan maerok sa kaibahan ninda.

²Magtatarabang an dakul na nasyon sa pagbalik nin Israel sa saiyang sadiring daga, asin paglilingkodan ninda an Israel bilang mga oripon. An mga nagsakop kaidto sa Israel iyo an sasakopon nin Israel, asin an Israel iyo an mahade sa mga tawong nag-api sainda kaidto.

³An banwaan nin Israel tatawan nin Kagurangnan nin kapahingaloan sa saindang mga tinios na kulog saka kasakitan, asin sa magabat na trabaho na pirit na ipinagibo sainda.

⁴Kun gibohon na niya ini, pag-oolog-ologon kan mga Israelita an hade nin Babilonia asin magsasarabi: “Buminagsak na an makuring hade! Dai na nanggad siya makakaapi sa kiisay man!

⁵Tinapos na nin Kagurangnan an kapangyarihan kan maraot na mga pamayo,

⁶na sa kaanggotan nang-api nin mga banwaan asin dai nag-ontok sa pagpasakit sa mga nasyon na sinakop ninda.

⁷Ngunyan an bilog na daga nagkakaigwa nin kapahingaloan saka katoninongan; an gabos nag-aarawit sa kaogmahan.

⁸An mga kahoy na sipres saka sedro nin Lebanon nag-oogma sa pagbagsak kan hade, huli ta mayo na nin mapalod sainda, ngunyan na mayo na siya!

⁹“An kinaban kan mga gadan nag-aandam sa pagsabat kan hade nin Babilonia. Pinupukaw kaiyan an mga kalag kan mga dating mapangyari sa kinaban. Pinapatindog kaiyan an mga kalag kan mga hade na nagtutukaw sa saindang mga trono.

¹⁰Masabi an mga ini sa hade nin Babilonia, ‘Ngunyan, maluya ka na arog samo! Pareho ka na sa samo!

¹¹Kaidto, inoomaw ka kaiba kan musika nin mga arpa, alagad ngunyan uya ka na sa kinaban kan mga gadan. An mga ulod an saimong magigin higdaan asin mga ulod an saimong magigin tamong.’”

¹²O Hade nin Babilonia, maliwanag na bitoon na makaaga, nahulog ka na hale sa langit! Sinakop mo kaidto an mga nasyon, alagad itinapok ka ngunyan sa daga.

¹³Boot mo kaidtong maabot an langit asin ikabugtak an saimong trono sa itaas kan pinakahalangkaw na mga bitoon. Naghohona kang magtutukaw ka siring sa sarong hade sa ibabaw kan bukid sa amihan saen nagtitiripon an mga dios.

¹⁴Nagsaboot kang sasakaton mo an kaitaasan kan mga panganoron asin magin siring sa Makakamhan.

¹⁵Alagad ibinaba ka sa pinakahararom na kabtang kan kinaban kan mga gadan.

¹⁶Hihilingon ka kan mga gadan asin mamaanan. Mahapot sinda, “Bakong iyo ini an nagyugyog kan kinaban asin nagpatakig sa mga kahadean?

¹⁷Bakong rinaot niya an mga syudad, asin ginibong kalangtadan an kinaban? Bakong iyo ini an dai nanggad nagpatalingkas nin mga bilanggo o nagpapuli sa sainda?”

¹⁸An gabos na hade kan kinaban nahuhutad sa saindang magagayon na lulubngan,

¹⁹alagad mayo ka nin lulubngan, asin itinapok sana an saimong bangkay tanganing maglapa. Natahoban iyan kan mga bangkay kan mga soldados na nagkagaradan sa gera, na itinapok kaiba kan mga iyan sa sarong kalot, dangan pinagtimaktimakan.

²⁰Dai ka ilulubong siring sa ibang hade huli ta rinaot mo an sadiri mong daga asin ginadan mo an saimong mga nasasakopan. Mayong matatada sa saimong maraot na pamilya.

²¹Poonan na an panggadan! Magagadan an mga aking lalaki kan hadeng ini huli sa kasalan kan saindang mga ginikanan. Mayong saro man sainda na maghahade sa daga o mapatindog nin mga syudad sa ibabaw kaiyan.

²²“Sasalakayon ko an Babilon,” an sabi nin Kagurangnan nin mga hukbo, “asin rurumpagon ko iyan. Dai ako matada nin anoman—maski kaakian, mayo nanggad nin matatada. Ako, an Kagurangnan, an nagtaram.

²³Gigibohon kong sarong katiboan an Babilon, lugar na eerokan kan mga kuwaw. Sisighidon ko an Babilon nin sarong sighid na mahale kan gabos na yaon diyan. Ako, an Kagurangnan nin mga hukbo, an nagtaram.”

²⁴An Kagurangnan nin mga hukbo nagsumpa: “Kun ano an sakong plinano, mangyayari. Kun ano an sakong boot na gibohon, magigibo.

²⁵Tutunawon ko an mga taga Asiria na nasa sakong daga nin Israel, asin titimaktimakan ko sinda sa sakong kabukidan. Tatalingkasan ko an sakong banwaan sa sakal kan mga taga Asiria asin sa saindang mga magabat na pasan.

²⁶Iyo ini an sakong plano sa kinaban, asin inunat ko na an sakong takyag sa pagpadusa sa mga nasyon.”

²⁷Totoong gigibohon ini nin Kagurangnan nin mga hukbo; inunat na niya an saiyang takyag sa pagpadusa, asin mayo nin siisay man na makakapaontok saiya.

²⁸Iyo ini an mensahe na ipinahayag kan taon na magadan si Hadeng Ahaz.

²⁹Mga Filisteo, dai kamo mag-ogma huli ta nabari an sugkod na panhampak saindo. Huli ta kun nagagadan an sarong halas, may sarong rimoranon na minasalihid kaiyan. An sugok nin sarong halas nahihimsa na sarong dragon.

³⁰An Kagurangnan iyo an mapastor sa mga dukha sa saiyang banwaan asin tutugotan niya sindang mamuhay na matoninong. Alagad mapadara siya nin makangirhat na gutom sa saindo, mga Filisteo, asin mayo sa saindo nin matatadang buhay.

³¹Pagkurahaw asin paghagad nin tabang, kamo gabos na syudad nin Filistia! Magkatarakot kamo gabos! Huli ta may sarong panganoron nin alpog na nagdadangadang hale sa amihan—sarong hukbo iyan na mayo nin matalaw.

³²Paano ta sisimbagon an mga sugo na minaabot sato hale sa Filistia? Sasabihan ta sinda na an Kagurangnan an nagpamugtak sa Sion asin nakakakua nin kaligtasan diyan an saiyang nagtitios na banwaan.