Read Central Bicolano Isaiah 17 Bible Online

Isaiah 17 - Central Bicolano bible

Isaiah 17

¹Nagtaram an Kagurangnan, “An Damasco dai na magigin sarong syudad, kundi magigin sarong tambak nin mga gaba.

²Mawawaraan nin namamanwaan an mga syudad nin Siria sagkod pa man. Ini magigin mga pasabsaban para sa karnero saka baka, asin mayo nin maalaw sa sainda.

³An Israel mawawaraan nin mga toreng bantayan, asin an kahadean mawawara sa Damasco. An mga taga Siria na matatada magigin sarong kasosopgan siring sa banwaan nin Israel. Ako, an Kagurangnan nin mga hukbo, an nagtaram.”

⁴Nagsabi an Kagurangnan, “Maabot an aldaw na matatapos an kadakulaan nin Israel, asin an kayamanan kaiyan mariribayan nin kadukhaan.

⁵An Israel makakaarog sa sarong oma na bago pa sanang anihon an mga trigo, siring sa sarong oma sa Kapantayan nin Refaim pakatapos na anihan iyan.

⁶Kadikit sanang tawo an matatada, asin an Israel makakaarog sa sarong kahoy nin oliba na ginunoan nin mga bunga: duwa o tolo sanang bunga kaini an matatada sa mga sanga sa itaas o sa ibaba. Ako, an Kagurangnan Dios nin Israel, an nagtaram.”

⁷Pag-abot kan aldaw na iyan, an mga tawo mabalik sa saindang Kaglalang, an banal na Dios nin Israel, sa paghagad nin tabang.

⁸Dai na sinda magsasarig sa mga altar na saindang ginibo, o magsasarig sa gibo nin saindang kamot—mga simbolo kan diosang si Asera saka mga altar nin insenso.

⁹Pag-abot kan aldaw na iyan, an mga pinapusog na syudad magigin siring sa mga mayong nag-eerok na mga syudad kan mga Heveo saka Amoreo—mga lugar na binarayaan kan mga namamanwaan sa pagdulag sa atubang nin Israel.

¹⁰Israel, nalingawan mo na an Dios nin saimong kaligtasan asin an Gapo na saimong pailihan. Embes kaiyan, nagtanom ka nin sagradong mga tatamnan tanganing magsamba sa sarong dayuhan na dios.

¹¹Alagad maski magdahon saka mamurak an mga iyan sa mismong pagkaaga na itinanom mo, dai man giraray iyan magkakaigwa nin ani. Kasakitan saka dai nabobolong na kulog an mapapasaimo.

¹²Nagkakariribok an mga mapangyaring nasyon; an ribok ninda arog sa hagubohob kan dagat, arog sa hampak nin dakulang mga alon.

¹³Nagdadangadang an mga nasyon siring sa nagdadangadang na mga alon, alagad sasagweon sinda nin Dios asin madurulag sinda; ipapadpad sinda siring sa alpog sa may bulod, siring sa dagami sa sarong aripuros.

¹⁴Sinda an dahelan nin takot pagkabanggi, alagad pagkaaga, mayo na sinda. Iyan an nangyayari sa kiisay man na masamsam kan satong daga.