Read Central Bicolano Isaiah 19 Bible Online

Isaiah 19 - Central Bicolano bible

Isaiah 19

¹Iyo ini an mensahe dapit sa Egipto. Madatong sa Egipto an Kagurangnan lunad sa sarong marikas na panganoron; tatarakigan an mga ladawan nin Egipto asin mawawaraan nin kosog nin boot an mga Egipcio.

²Nagtataram an Kagurangnan, “Papag-iriwalon ko an mga Egipcio; maglalaban sinda, an lambang lalaki laban sa saiyang tugang na lalaki asin sa saiyang kataed; syudad laban sa syudad, kahadean laban sa kahadean.

³Dai ko papangyarihon an mga plano kan mga Egipcio asin hahaleon ko an saindang kosog nin boot. Makikihumapot sinda sa mga ladawan, sa mga parakulam, sa mga nakikihumapot sa mga gadan asin sa mga salamangkero.

⁴Itatao ko an mga Egipcio sa kamot nin sarong mapang-aping kagurangnan, sa sarong makuring hade na maghahade sainda. Ako, an Kagurangnan nin mga hukbo, an nagtaram.”

⁵Mahubas an tubig sa Salog nin Nilo, asin dikit-dikit na magmamara iyan.

⁶Mabata an mga pinag-aagihan kan tubig mantang dikit-dikit na nagmamara an mga iyan; magkakaaralang an mga bariw saka mga doot,

⁷asin an gabos na tinanom sa pangpang kan Salog nin Nilo maaalang dangan ipapalid kan doros.

⁸Magmomondo saka magtatangis an mga parasira sa Salog nin Nilo; dai na ninda magagamit an saindang mga banwit saka mga hikot.

⁹An mga paragibo nin telang lino mawawaraan nin paglaom;

¹⁰an mga parahabol saka an saindang mga katabang mawawaraan nin hanapbuhay asin magmomondo.

¹¹Mga lolong an mga lider kan syudad nin Zoan! An mga pinakamadonong na mga lalaki sa Egipto nagtatao nin mayong halagang mga hatol! Paano ninda nasasabi sa hade na sinda an kasalihid kan dating mga madonong saka kan mga hade?

¹²Hade nin Egipto, haen na ngunyan an mga tuso mong parahatol? Tibaad masabihan ka ninda kan pinaplanong gibohon nin Kagurangnan nin mga hukbo para sa Egipto.

¹³Lolong an mga lider nin Zoan saka Memfis. Sinda kutana an nangenot sa nasyon alagad sainda ining linagalag.

¹⁴An Kagurangnan an dahelan kan pagtao ninda nin nakakaribong na mga hatol. Kaya sala gabos an ginigibo kan Egipto asin arog siya sa sarong burat na nadadalinas sa sadiring suka.

¹⁵Mayo nin siisay man sa Egipto, mayaman man o dukha, bantog man o dai midbid, na makakatabang saiya.

¹⁶Maabot an panahon na an mga taga Egipto makakaarog sa mga babae. Pagtatakigan sinda sa takot kun mahiling nindang ibinikyaw na nin Kagurangnan nin mga hukbo an saiyang kamot sa pagpadusa sainda.

¹⁷Huli sa Juda tatakigan sinda nin makuri sa gabos na panahon na pagiromdomon sinda kan padusang inandam para sainda kan Kagurangnan nin mga hukbo.

¹⁸Pag-abot kan panahon na iyan, an lengwaheng Hebreyo an magigin tataramon sa limang syudad sa Egipto. An mga tawo duman masumpa sa ngaran nin Kagurangnan nin mga hukbo. An saro sa mga syudad aapodon, “Syudad kan Aldaw.”

¹⁹Pag-abot kan panahon na iyan, magkakaigwa nin sarong altar para sa Kagurangnan sa daga nin Egipto, asin nin sarong hariging gapo na kinonsagra sa saiya sa pagdolonan nin Egipto.

²⁰An mga iyan an magigin tanda asin saksi kan presensya nin Kagurangnan nin mga hukbo sa Egipto.

²¹Ipapahayag nin Kagurangnan an saiyang sadiri sa mga Egipcio; dangan mimidbidon saka sasambahon siya ninda asin madara sinda nin mga sakripisyo saka mga dolot. Manunuga sinda sa Kagurangnan asin ootobon ninda iyan.

²²Papadusahan nin Kagurangnan an mga Egipcio, alagad bobolongon niya sinda. Mabalik sinda saiya, asin dadangogon niya an saindang mga pamibi dangan bobolongon niya sinda.

²³Pag-abot kan panahon na iyan, magkakaigwa nin sarong tinampo hale sa Egipto pasiring sa Asiria. An mga taga Asiria madalaw sa Egipto, asin an mga taga Egipto madalaw sa Asiria; an duwang nasyon na ini sabay na magsasamba.

²⁴Pag-abot kan panahon na iyan, makakapantay an Israel sa Egipto saka sa Asiria, asin an tolong nasyon na ini magigin sarong bendisyon sa bilog na kinaban.

²⁵Bebendisyonan sinda nin Kagurangnan nin mga hukbo asin masabi, “Bebendisyonan taka, Egipto, sakong banwaan; ika Asiria, na sakong linalang; asin ika, Israel, na sakong piniling banwaan.”