Read Central Bicolano Isaiah 21 Bible Online

Isaiah 21 - Central Bicolano bible

Isaiah 21

¹Iyo ini an mensahe dapit sa Babilon. Siring sa sarong aripuros na minaagi sa Negeb hale sa kalangtadan, an kasakitan maabot hale sa sarong makatatakot na daga.

²Nakahiling ako nin sarong bisyon nin mangirhat na mga pangyayari, sarong bisyon nin pagpasaluib asin pagkagaba. Magsalakay ka, hukbo nin Elam! Palibotan mo an mga syudad, hukbo nin Media! Oontokon na nin Dios an pagtios na dara kan Babilon.

³An nahiling saka nadangog ko sa bisyon nagdara sako nin kamondoan asin kulog, kulog na arog kan namamatean nin sarong babaeng nangangaki.

⁴Nagtatalibong an sakong panhiling asin nagtatakig ako sa takot. An kabanggihon na sakong minawot nagdara sako nin katakotan.

⁵Sa bisyon, nahiling ko an inandam na bangkete; an mga ibiniklad na alpombra na tutukawan kan mga bisita. Nagkakakan saka nag-iinom sinda. Dangan nadangog an pagboot: “Mga opisyal! Andama nindo an saindong mga kalasag!”

⁶Dangan sinabihan ako nin Kagurangnan, “Lakaw asin magbugtak ka nin bantay; sabihan mo siyang ipahayag an saiyang nahihiling.

⁷Kun makahiling siya nin mga lalaking nakakabayo na manduwa-duwa, asin nin mga lalaking nakalunad sa mga asno saka mga kamelyo, kaipuhan bantayan niya sinda nin marahay.”

⁸Dangan nag-apod an bantay, “Kagurangnan, aldaw-banggi akong nagbabantay sa sakong namumugtakan.”

⁹Dangan duminatong tolos an mga nakakabayo; manduwa-duwa sinda. Ipinahayag kan bantay an saiyang nahiling, “Nagbagsak na an Babilon! Parasa na an gabos na ladawan na saindang sinamba.”

¹⁰Banwaan kong Israel, gininik kang arog sa trigo, alagad ipinapahayag ko saimo ngunyan an marahay na bareta na nadangog ko sa Kagurangnan nin mga hukbo, an Dios nin Israel!

¹¹Iyo ini an mensahe dapit sa Edom. Igwang nag-aapod sako hale sa Edom, “Parabantay, pirang oras pa bago mag-aga? Sagkod nuarin matatapos an banggi?”

¹²Nagsimbag ako, “Madali na an aga, alagad maabot giraray an banggi. Kun boot mong maghapot giraray, magbalik ka asin maghapot.”

¹³Iyo ini an mensahe dapit sa Arabia. Kamong mga taga Dedan, na an mga parabaklay nagkakampo sa kaawagan nin Arabia,

¹⁴tawan nindo nin tubig an mga napapaha na minadolok saindo. Kamong mga taga Tema, tawan nindo nin pagkakan an mga nagpapaili saindo.

¹⁵Huli ta nagdudulag sinda sa mga espadang andam sa paggadan sainda, sa mga bosog na madali nang butasan, sa gabos na pag-alaman nin gera.

¹⁶Dangan sinabihan ako nin Kagurangnan, “Sa laog sana nin sarong taon, mapapara an kamurawayan kan mga tribu nin Kedar.

¹⁷An mga parapana nin Kedar iyo an pinakamaisog sa gabos, alagad dikit sana sa sainda an matatada. Ako, an Kagurangnan Dios nin Israel, an nagtaram.”