Read Central Bicolano Isaiah 22 Bible Online

Isaiah 22 - Central Bicolano bible

Isaiah 22

¹Iyo ini an mensahe dapit sa Kapantayan nin Bisyon. Ano an nangyayari? Tadaw ta nagseselebrar an gabos na tawo sa atop kan saindang mga harong?

²An bilog na syudad pano nin mga pagkukurahaw, karibokan asin kaogmahan. An saimong mga lalaking nagadan sa gerang ini, nagadan bakong sa pakikilaban.

³An gabos mong lider nagdurulag dangan nadakop bago nakapana nin sarong bosog.

⁴Kaya pabayae nindo ako sa mapait kong paghibi para sa sakong mga kahimanwa na nagadan. Hare ako nindo pagrangaha.

⁵Iyo ini an panahon nin katakotan, pagkadaog, asin nin pagkaribong sa Kapantayan nin Bisyon na ipinadara sato kan Makakamhan na Kagurangnan Dios nin mga hukbo. Nagaba na an kudal kan samong syudad, asin an agrangay sa paghagad nin tabang nadadangog sa kabubuldan.

⁶An mga soldados hale sa daga nin Elam nag-abot na nakalunad sa mga kabayo, armado nin mga pana. Inandam na man kan mga soldados na hale sa Kir an saindang mga kalasag.

⁷Napano nin mga karwahe an matubang na mga kapantayan nin Juda; an mga nakakabayong mga soldados nag-ontok sa atubangan kan mga trangkahan nin Jerusalem.

⁸Mayo na nin depensa an Juda. Kan nangyari iyan, ilinuwas nindo sa sarayan an mga armas.

⁹Nahiling nindo an mga kabtang kan kudal nin Jerusalem na dapat hirahayon. Linibot nindo an mga harong sa Jerusalem dangan ginaba nindo an nagkapira tanganing gamiton an mga gapo sa paghirahay kan kudal. Tanganing makatipon kamo nin tubig,

¹¹guminibo kamo sa laog kan syudad nin sarong tangkeng pagtitiponan nin tubig na naghahale sa daan na sapa. Alagad dai nindo tinawan nin halaga an Dios, na nagplano kaini haloy nang panahon asin naggibong mangyari ini.

¹²Inapod kamo kaidto kan Kagurangnan Dios nin mga hukbo tanganing maghibi saka magmondo, mag-aris kan saindong payo saka magsulot nin sako.

¹³Alagad, nagngisi kamo asin nag-ogma. Nagbuno kamo nin karnero saka baka tanganing kakanon, asin nag-inom kamo nin arak. Nagsabi kamo, “Magkakan kita asin mag-inom, huli ta sa aga magagadan kita.”

¹⁴An Kagurangnan Dios nin mga hukbo mismo an nagtaram sako asin nagsabi, “Dai ko nanggad papatawadon an karatan nindang ini sagkod na sinda nabubuhay. Ako, an Kagurangnan Dios nin mga hukbo, an nagtaram.”

¹⁵Sinabihan ako nin Kagurangnan Dios nin mga hukbo na magduman ki Sebna, an parapamahala kan palasyo asin sabihan siyang,

¹⁶“Siisay ka sa paghona mo? Ano an deretso mo na mag-ukit nin lulubngan para sa saimo sa magapong parte kan bulod?

¹⁷Pwedeng sabihon na dakula kang tawo, alagad pupuroton ka nin Kagurangnan asin itinapok ka niya sa harayo.

¹⁸Pupuroton ka niya siring sa sarong bola dangan itatapok sa sarong mahiwas na daga. Magagadan ka duman sa kataed kan mga karwahe na ipinag-oorgulyo mo kaidto. Saro kang kasosopgan sa harong nin saimong kagurangnan.

¹⁹Hahaleon ka nin Kagurangnan sa saimong katongdan asin ibababa ka niya sa halangkaw mong kamugtakan.”

²⁰Tinaraman nin Kagurangnan si Sebna, “Sa aldaw na iyan, aapodon ko an sakong sorogoon na si Eliakim, na aking lalaki ni Hilkias.

²¹Isusulot ko saiya an saimong gubing, asin ihahagkos ko saiya an saimong hagkos, dangan itatao ko saiya an gabos na awtoridad na yaon saimo. Siya magigin sarong garo ama para sa mga nag-eerok sa Jerusalem asin sa Juda.

²²Itatao ko saiya an bilog na awtoridad sunod sa hade, an kapagarakian ni David. Mapapasaiya an lyabe kan palasyo ni David; an anoman na buksan niya, mayo nin makakasera, asin an anoman na serahan niya, mayo nin makakabukas.

²³Papakarhayon ko an kamugtakan niya siring sa sarong pako sa tamang lugar asin siya an gigikanan kan dangog para sa saiyang bilog na pamilya.

²⁴“Alagad magigin sarong pagabat saiya an gabos niyang kadugo. Makabit sinda saiya arog sa mga koron saka mga mangko na nabibitay sa sarong pako!

²⁵Sa aldaw na iyan, an pako na marahay an pakamugtak, mabubulnot asin mahuhulog. Iyan an magigin kataposan kan gabos na nakabitay diyan.” An Kagurangnan an nagtaram.