Read Central Bicolano Isaiah 23 Bible Online

Isaiah 23 - Central Bicolano bible

Isaiah 23

¹Iyo ini an mensahe dapit sa Tiro. Mag-agrangay kamo sa kamondoan, kamo na mga paralayag sa mga dagat! Raot na an Tiro—an saindong doongan; an mga harong kaiyan saka an ligtas na lugar para sa mga sakayan nagkagaraba na. Maaaraman nindo an bareta mantang pabalik na an saindong mga sakayan hale sa Chipre.

²Mag-alo kamo, mga negosyante nin Sidon! Nagsugo kamo nin mga lalaki

³sa ibong kan dagat sa pagbakal nin trigo na itinanom sa Egipto asin sa pakipagnegosyo sa gabos na nasyon.

⁴Mayo ka nin onra, syudad nin Sidon! An dagat asin an dakulang katubigan nagtaram, “Dai nanggad ako nagkaigwa nin mga aki. Dai lamang ako nakapagpadakula nin mga aking lalaki o mga aking babae.”

⁵Maski an mga Egipcio magkakatirikbahan asin panruruluyahon sa oras na madangog ninda an pagbagsak nin Tiro.

⁶Mag-agrangay kamo sa kamondoan, kamo na mga taga Fenicia! Magdulag kamo pasiring sa Tarsis!

⁷Ini daw an maogmang syudad nin Tiro, na minukna haloy nang panahon? Ini daw an syudad na nagpadara nin mga makikihimanwa sa ibong kan dagat tanganing magmukna nin bagong mga komunidad?

⁸Siisay an nagplano laban sa Tiro, an syudad nin mga hade, na an mga prinsipeng negosyante iyo an ginagalangan na mga lalaki sa daga?

⁹An Kagurangnan nin mga hukbo iyo an nagplano kaiyan. Siya an nagplano kaiyan tanganing ontokon an saindang kapaabaw-abawan sa saindang ginibo asin tanganing sopogon an saindang ginagalangan na mga lalaki.

¹⁰Lakaw asin mag-oma kamo, kamo na mga namamanwaan sa mga bagong komunidad sa Tarsis! Mayo na nin maolang saindo.

¹¹Binikyaw na nin Kagurangnan an saiyang kamot sa ibabaw kan dagat asin rinumpag na niya an mga kahadean. Ipinagboot nin Kagurangnan na garabaon an mga sentro kan negosyo sa Fenicia.

¹²Tapos na an saimong kaogmahan, Syudad nin Sidon, asin inaapi na an saimong banwaan. Maski magdulag pa sinda sa Chipre, dai man giraray sinda magigin ligtas. (

¹³An mga taga Babilonia, asin bako an mga taga Asiria, an nagbugtak nin mga lalaw na hayop sa Tiro. An mga taga Babilonia iyo an nagpatindog nin mga tore sa pagsalakay, naggaba kan mga bantayan nin Tiro, asin an naggaba kan syudad bago sinda naghale.)

¹⁴Mag-agrangay kamo sa kamondoan, kamo na mga paralayag sa dagat! Raot na an syudad na saindong sinarigan.

¹⁵Maabot an panahon na malilingawan an Tiro sa laog nin setentang taon, arog sa mga taon nin pamamayo nin sarong hade. Pakalihis kan panahon na iyan, an Tiro makakaagid sa sarong maraot na babae sa awit:

¹⁶Kuaha an saimong arpa, libota an banwa ika na maraot na babae na nalingawan na! Pagtugtog asin pag-awit giraray kan saimong mga awit tanganing magiromdoman ka.

¹⁷Pakalihis kan setentang taon, aatamanon man giraray nin Kagurangnan an Tiro, asin makikipagnegosyo giraray siya sa gabos na kahadean kan kinaban.

¹⁸An kwartang makukua niya sa negosyo idudusay niya sa Kagurangnan. Dai niya iyan sasarayon o titiponon, alagad gagamiton iyan kan mga nagsasamba sa Kagurangnan sa pagbakal nin kakanon saka gubing na saindang kaipuhan.